我素來都欣賞寸得起的人和事和物，某程度上他們都擁有過人的實力，否則只會落得自取其辱的下場。
寸得起的人有大劉，其行徑大家耳目能詳，不贅；又例如 Hermes 服務欣勤，but when it comes to Birkin，都一樣冇情講；買鋼帶黑、白面 Daytona 都係，有幾多人可以施施然行入認可零售商，唔使等兼用正價買得到？
而最近遇上最新寸物，係海南雞飯，睇下有幾寸先？
- 六月二十一日星期一晚上七點正，門口已經有等位人龍，環顧目前港島區，有幾多店舖能觸發此人龍潮？
事緣上星期五在飲食雜誌看到銅鑼灣世貿中心新開的「海南少爺」，請來新加坡文華酒店海南雞飯名店 Chatterbox 兩位廚師主理，主打海南雞飯及一系列新加坡地道美食。Chatterbox 的海南雞飯被譽為全世界最好食的海南雞飯，食雞不識 Chatterbox，就稱食神也枉然。這十年間我遇過的新加坡 press trip，到埗後的指定動作都係去 Chatterbox 歎海南雞飯。
今次過江抵港，刻不容緩，即試 ！
- 枱與枱之間相隔極近，人與人之間關係拉近。望海景的確怡人！
星期六下午三點半，刻意避開中午食飯人潮，點知有午休時段，食雞不成食著閉門羹。
星期日下午兩點再闖，有雞食啦卦，點知門口被截住，海南雞同喇沙都賣晒，唔係呱？算，我去樓上龍皇酒家搵幟哥飲茶。
星期一，盤算多時，決定六點半就去，無理由食唔到，先打個電話訂位；乜話？六點半都話訂位巳爆滿，只剩低少量坐位留畀 walk-in 客！
OK，我六點四十五分趕去，可以順利坐低，但條件係一個鐘內要交枱，為咗食，EQ 要高！當時全店四分三已坐滿。
- 美味的海南雞是經低温浸熟，開放式廚房看到雞被吊起並排而列。
立即點海南雞飯、海鮮喇沙、肉骨茶，本來仲想要魔鬼魚，可惜前日已經賣晒，冇貨返，唯有轉點黑蘿蔔糕。
海南雞飯完全對辦，對辦意思是醬料分高下，海南雞飯的靈魂從來是「三小醬」：薑蓉、黑豉油、辣醬，加上雞油飯及雞湯，做得好這五樣小東西，再差的雞都可以起死回生。對，想說的就是香港食店難用新鮮雞，再好的都只有冰鮮雞，只要雞皮下沒有肥膏、肉身不嚡，已經合格，這點他們做得到。
- 雞油飯香口而不覺太油，沒有太大的肥胖罪惡感，在香港算頂班；雞胸肉也算嫩滑，不俗。 $88
- 三小醬非常出色，你會忍唔住再叫他們畀多點醬料，尤其是薑蓉很幼滑。
- 用杯盛上的雞湯味濃郁，非常好味，非豆泥海南雞餐廳就咁用雞內臟滾湯咁冇誠意。
海鮮喇沙也出色，湯底夠香不太甜也不太辣，火爐十足，有爽口帶子、唔腥魚片，唯獨大蝦非新鮮蝦，肉身唔爽，蝦味一般，用回新鮮蝦會更佳。
- 用料足已經有值回票價之感，最怕遇到所謂的小店海鮮喇沙，湯底用料少、餸少乜都少，真係小喇沙。$88
肉骨茶以鐵沙煲上，外層加上一個竹籃隔熱，感覺熱度十足，可惜就是敗在唔夠熱，以這種陣容上枱，至少第一啖呷入口要燙口，可惜只係我單方面的瑕想，未食到一半已經攤凍晒；中藥味香濃但肉味追唔上，遜於新加坡品嚐過的小檔。 個人覺得最敗筆的是跟湯油炸鬼，好韌又軟lai lai，經理的解釋是新加坡的傳統口味，但他已反映港人口味不愛這種如隔夜油炸鬼口感，並稱將會從善如流。
- 鐵沙煲上的肉骨茶可惜唔夠熱，即等同去食鐵板牛扒但塊鐵板唔熱，要改善。$72
黑蘿蔔糕是用新加坡黑豉油炒蘿蔔糕，味帶甜香，可惜蘿蔔糕唔夠蘿蔔，咬落去真係似食糕，又硬又冇蘿蔔味，可以不叫。
- 色香俱全，欠的是味也。$58
- 兩個人食 4樣嘢，盛惠 337大元！
是很好的美食體驗嗎？最理想當然是去新加坡文華，這也是非戰之罪，正如我也認為台灣鼎泰豐比香港的直營店更佳，味還是當地的好，但形神都到了香港，又唔係經常去新加坡，間中拜會也不錯了。
若然要推介在香港可以品嚐到的美味海南雞飯，北角與旺角「勝利小廚」是平價首選；貴價之選是君悅酒店 Lounge Bar 特製海南雞飯；論難忘的是少年食神 Michael Lam 帶我去深水埗福榮街「泰潮」，其泰式海南雞與醬汁也是絕佳！
「海南少爺」 銅鑼灣世貿中心 P311 店 2111 3166
沒有留言:
發佈留言
注意：只有此網誌的成員可以留言。