洗面都要學？！

想皮膚靚？洗面都要有學問！

身邊朋友常提問：「買咩洗面嘢好呀？係咪夏天就用爽身啫喱質地，冬天就用奶狀會潤 D？咁咩牌子好呢？」

真奇怪，點解呢個錯誤觀念會廣泛流傳於普羅大眾？

其實選擇潔面產品係應該因應每個人的膚質，而膚質會時而受環境氣候、身體狀況轉變，所以潔面產品也應對號入座。

以我自己為例，慣用的潔面產品從來都不是以季節區分，而是根據當時的皮膚狀態，例如感覺偏乾？T 字位泛油？有暗粒粉刺？...如何力保水油平衡呢。所以為我看門口的潔面用品一定要時刻有齊 4 款，絕對唔誇張，對潔面認真一點，就是打好美肌基礎！

以下是我試過咁多品牌的潔面產品後，來個至愛推介，大家不妨參考！

泡沫慕絲

適合膚質狀態：水分充足，但 T 字位泛油特別嚴重之時。

洗面泡最啱趕時間出門前用，而身邊男性朋友亦話最鍾意用 mousse 洗面，貪佢夠方便唔使自己起泡。一按即出的泡沫，功效潔力強但含水量較少，可以深入潔淨毛孔且抑制油脂，解決泛油問題，用後感覺很清爽，但要注意補水力不足。

心水推介：

Clarins White Plus Detoxifying Cleansing Mousse

泡沫慕絲有 D 按出來似溶咗，質地太稀，呢支就完全無這個情況，泡泡好豐盈細緻，仲好似有彈性咁。最鍾意係結合美白排毒天然植物成分，如椰子脂肪酸與蔗糖、日本柑橘等等，於洗面同時亮白皮膚；我覺得唔只潔淨效果好，用耐咗明顯見到膚色無咁黃，仲有 D 光澤，非常得！

Clarins 美白排毒潔面泡沫慕絲 約$260

曼秀雷敦清爽潔面泡沫

如果嗰排皮膚唔聽話，出粒粒，我就必定將呢支潔面泡沫推上戰場，除咗清潔仲可以幫手抑制暗瘡，及防止細菌生長，因為有天然黃柏樹精華，仲可以減少過量油脂分泌，但用完真係幾乾，所以有需要至會利用佢！價錢抵到爛，係解決暗瘡皮膚問題的廉價勞工呢！

曼秀雷敦清爽潔面泡沫 約$40

磨砂

適合膚質狀態：角質層厚、粗糙、毛孔阻塞、膚色暗啞之時。

每星期梗要為皮膚進行一次大掃除深層清潔，要促效，磨砂膏此刻發揮最大效能，要揀顆粒體積超微細，始能徹底捽走毛孔及皮膚細縫間污垢、同步去除老化角質和死皮，令肌膚外表立刻得到改善；在搓揉時注意 T 字位由於較粗糙，應重覆來回，也不妨順便幫臉部做按摩，促進血液循環，膚色更健康呀！

心水推介：

Suisse Programme Double Action Exfoliating Mask

這牌子因為揾嚟大 S 做代言，加上密集式廣告，即刻多人識咗。咪睇推介呢支潔面產品要成 4 百幾蚊好似貴咗 D，實情佢係 Kinder 出奇蛋！既是磨砂啫喱又係煥膚面膜，用法是先濕面後敷上 10 分鐘，再用手指全面打圈按摩才沖洗；內含有水果酵素，停留在皮膚能溶化老化角質，助肌膚細胞更新。效果係點？有一次朋友來我家打麻雀，大家柴娃娃試我 D 護膚品，結果佢地都超讃 Suisse Programme 呢支產品，尤其係個男嘅，話用完皮膚即時柔軟仲好鬼滑溜，千年死皮無晒，感覺煥然一新，最難得係唔乾，仲笑說：「好耐無呢種初戀感覺！」

Suisse Programme 透白雙效潔面磨砂/煥膚面膜 約$450

潔面梘

適合膚質狀態：皮膚缺乏生氣、全面偏油、有暗瘡、黑頭及粉剌之時。

先旨聲明，潔面梘並唔等同番梘，係由很多修護及潔淨成分提煉而成，專供面部幼嫩肌膚用。一嚿優質潔面梘可以發揮很好的潔淨力又有護膚功效；好處係潔面產品種類中最襟用，唔好處係要有耐性加水慢慢搓出泡沬，可以温和地去除多餘油脂和污物；尤其適合有暗瘡時使用，因為不會如磨砂般刺激，但又能起到徹底清潔效用。

心水推介：

Erno Laszlo 藍藻潔面梘

一嚿潔面梘賣 $450？屈指一算可以買近 30 嚿冲涼番梘呀！此梘當然不同彼梘，是這品牌皇牌熱賣貨再推加强版，為何仿如阿凡達藍色身驅？原來是藍綠巨大螺旋藻，含超過 70 種豐富養份，用後會有滋潤及肌膚很柔軟的感覺，更標榜可活化細胞，令骨膠原增生。Size 有如女仔手掌般大，可想而知幾咁耐用呢！

用法很特別，聽話跟足指示真的可以緊緻面部肌膚和增加彈性：以潔面盆裝滿暖水，將藍梘浸入，然後打圈至起泡，此時將藍梘塗於面上按摩數秒，繼而以潔面盆內之藍梘水往臉上潑 20 次，然後再用清水往面上潑 10 次後洗淨。嘩！聽到都知對活化皮膚好啦，但係耐性唔係人人有。靚喎，我當然會持之以恆啦！

Erno Laszlo 藍藻潔面梘 $450

潔面奶

適合膚質狀態：皮膚偏乾、缺水、多幼紋，和較敏感之時。

潔面奶質感柔滑，搓揉時力度可以很溫和，不易刺激肌膚，於潔面過程中能鎖住肌膚天然水分，用後特別軟滑又唔繃緊，皮膚極乾燥時用就最啱；亦可當作卸妝乳，當然防水產品例外；但用後常感覺肌膚有點膩。

心水推介：

Clinique Take The Day Off Cleansing Milk

我一向都有追捧 Clinique 幾款產品，尤其係 turnaround 系列同埋勁得嘅卸妝油。而呢支洗面奶亦係我同家姐屋企必備，是天然植物配方，乾性或敏感性肌特別啱用，其親油因子，仲可以輕易卸走彩妝和粉底，一邊卸妝一邊保濕，感覺很温和，味道很清香。

Clinique 潔面奶 約$250

潔面 Tips：

1) 一般來說，洗臉最好用溫水，即接近皮膚的水溫是最適合、最温和。

2) 間中配合冷水和熱水交替洗臉，讓冷熱溫度來刺激皮膚，從而促進血液循環，更能增加肌膚的彈性。

3) 若然面部容易充血泛紅，建議以冷水洗臉，這樣能將擴張的血管收縮，皮膚溫度下降，有助鎮靜肌膚，令面色恢復正常。

4) 正確的洗面方法是輕輕讓泡泡按壓到毛孔中，而非打圈，因為打圈會令毛孔撐大，同時也令皮膚受損而變得鬆弛。

5) 一天只宜洗臉兩次，因為皮膚懂得自我保護分泌皮脂和汗水，形成一層保護膜，而洗臉後約三小時，皮膚的保護膜就會恢復原樣，因此洗臉次數不宜濫。

6) 潔面後在肌膚微濕之時，應把握黃金時間立即塗抹爽膚水和保濕品，因為這時候皮脂膜被洗去，就正是肌膚最脆弱容易流失水分，和最能吸收護膚精華之時。