真空壺/燜燒杯 選好品質？清潔大法？

養生之道-戒凍飲，我已經嚴守近20年！

隨時隨地喝健康溫熱飲品，暖胃暖子宮，女性身體特別需要啊！

簡易焗養生茶、焗滋補湯和焗低卡高營養粥，身體健康靠晒佢，「佢」.......有福氣嘅係指你阿媽或老公或者家務姐姐代勞，而呢個年代「佢」，是指真空壺和燜燒杯吖！

以前，帶保溫杯出街驚俾人笑老土，而家潮流興嘛，明星都愛用保溫杯，高調晒咯！

我早已是真空壺和燜燒杯專業用家，呢刻直情係瘋狂迷上，屋企本來已經有十多個....  

啱啱去日本，款多又獨特，我又新買入十多個真空壺和燜燒杯，部分送俾員工，包括Y's Recipes店長、後緩同事，仲有我位私人助理。

仲有兩個未出場，係專誠送俾讀者㗎（之後會在Yoko Tsang 和Y's Recipes FB Page公佈送出方法，希望大家喜歡，敬請留意）。

-

真空壺和燜燒杯愈趨普遍，你我梗有一個，故此，今次撰文同大家分享-非常實用的兩大重點：

好品質和清潔法。

怎樣選購到好品質的真空壺/燜燒杯？

可以在家中自行做測試：

第一回-檢查是否漏水

在真空壺/燜燒杯中裝滿一杯水，蓋上並倒轉約五分鐘，然後用力搖晃，看是否有水在邊位滲出來。

第二回-測試保溫性能

好的品質，即使放了熱水半小時，瓶身底部仍是涼的；相反，保溫差的，則會感覺到瓶身底部透出暖熱。

第三回-蓋子設計vs保溫時間

想儲熱時間較久的設計是，打開杯蓋還有中栓開關，熱水不會直接接觸空氣，加入100℃熱水，經過6小時後溫度應該約是75℃。 

最普遍設計是打開保溫杯蓋子後，可直接對口飲用，熱水就會接觸到空氣散走熱力，加入100℃熱水，經過6小時溫度約為65℃。 

----

真空壺/燜燒杯的正確淸潔方法是怎樣？

正確清潔方法-

第一點：使用少量食器專用中性清潔劑和淸水，以軟布或海綿擦拭內膽，由於部分壺身較高，建議用長棉棒輔助深入瓶底，使淸潔更徹底。

第二點：清洗時，務必將瓶身可拆的配件分開，如將上蓋及矽膠圈拆開，方能確保沒有積聚污物。

第三點：潔淨後，先用布抹走水分，再放置於通風處自然風乾。

第四點：若瓶身內有異味，可注滿熱水，然後加入一小匙蘇打粉，浸泡一小時，然後用水沖淨便可辟走異味。

*不宜做的事

第一點：切勿使用硬物工具或化學劑潔浄瓶內外，如鋼絲刷、硬身百潔布、研磨粉、去漬油、漂白劑，或含有氯的清潔劑，以免導致瓶內外表層刮傷、生銹或腐蝕，及會破壞內層的防沾塗層，使飲料味道、顏色殘留，日後清洗就更困難。

第二點：切勿將瓶身或不銹鋼杯蓋浸泡水中清洗，因為若水份浸入金屬配件間，或塑膠品之接合縫隙後，會導致污漬或生銹。

第三點：不可將真空壺或燜燒杯整個放置滾沸熱水內消毒，以免造成變形或漏水，加速損耗。

第四點：請勿使用洗碗機、烘碗機清洗本產品，以免造成變形或漏水。

第五點：勿用尖銳的金屬潔具碰觸內膽和瓶身，如鐵叉，以免刮花金屬，或破壞真空保溫構造，喪失保溫調理及機能。

最後，提提大家，如果裝入熱水後，若瓶身外部有發燙的情形，即表示真空的斷熱效果已被破壞，請勿吝嗇，換個新罷了！
------------------------------------

全新概念食療養生館Y’s RECIPES隆重登場

香港美容專欄作家 Yoko Tsang | Promote Your Page Too

蘇梅難得的尋常精緻泰菜

回顧蘇梅之旅，最開心的是我的兒子，第一次搭飛機去旅行，第一次接觸泰國的陽光與海灘，在遼闊的草地上瘋爬，還瘋品嚐泰國菜式！對，他遺傳了我愛吃的個性，而我在蘇梅，也希望可以試到美味的泰菜。

可惜，在這些旅遊區的地道泰菜、海鮮BBQ等等，遊客都猶如待宰的羔羊，所以我對泰國一向印象麻麻，價錢唔得均真係致命傷。

不過今次在蘇梅，竟然給我遇上一間號稱「Thai Fine Cuisine」的Le Siam，食物水準完全恰如其份，環境更是舒適優雅，而且明碼實價，這一點我最欣賞。

就以這個咖喱蟹為例，我有一晚光顧所謂的地道泰國海鮮菜，叫一隻咖喱蟹，明明揀的候好生猛，仲要成1500泰銖，但煮出來，隻蟹完全沒有鮮味，只是以重咖喱味蓋過。但Le Siam沒有捕海鮮的過程，只在餐牌上寫明「Yellow Curry Crab」，售530泰銖，煮出來，仲好食過那一晚的咖喱蟹（只係細隻少少咋），鮮味是其次，肉質結實不鬆散，正宗肉蟹。

信心就這樣來了，一於多點幾款菜式：

炸蝦餅係連我不嚐炸的人都會落搭的好菜！餅身極之彈牙，證明蝦肉多粉少，真正貨真價實，炸的功力剛剛好，沒有燶皮亦完整保留肉汁。


粉絲蝦沙律，淨係睇下蝦肉的晶瑩通透，已經知道係用新鮮靚蝦。


肉碎沙律，在香港叫生菜包，泰國這邊的傳統是沒有生菜跟上，來到泰國，跟隨一下泰國的習俗，用肉碎送飯，竟然很好食。


鹽烤大蝦，這一類海產正常是海鮮價，在Le Siam又係標明480泰銖三隻，簡簡單單沒有其他調味配搭，就必須講求大蝦本身的質素，鮮滑惹味就是我對這烤蝦的好評，十個讚！


蟹肉卷算是比較有fusion口味的菜式，擺盤賣相完全是fine cuisine的格調。


蟹肉蛋餅特別之處是蛋餅極鬆化，要做到泡泡漲的鬆化效果，就一定要將蛋漿攪伴至起泡再落鑊煎，這些心機菜，在香港不容易吃到！


菠蘿炒飯要做得出色其實不難，只需材料靚。為之靚？菠蘿肉是新鮮起肉而不是罐頭貨，腰果鮮炸沒有油益味，肉鬆要靚，炒飯粒粒分明不要太多水，Le Siam就完全合格了。


就連一個普通白飯極具心思，白米加紅米，再加一撮薏米，精美得過份，又有健康方面的考量，我極buy！


讚咁多，都有唔好食的菜式，就係沙爹，個沙爹醬認真冇得彈，係串沙爹唔合格，可以不叫。


餐廳環境典雅精緻，以蘇梅的非酒店級泰菜館而言，可以背上Fine Cuisine之名。


Le Siam Samui @ Central Festival Samui
在Facebook上一search，居然很多打卡好評，假如只有酒店內的天價泰菜館才叫好食，這裏在香港人眼中是平民價的高級泰菜館，應該要被寫入TripAdvisor內！

——————————————————

全新概念食療養生館Y’s RECIPES隆重登場

香港美容專欄作家 Yoko Tsang | Promote Your Page Too

蘇梅必試！鮮果Yogurt Roll

今次蘇梅之旅，第一是參加婚宴；第二是帶Yuji見識陽光與海灘；第三是這個我從未來過的小島，到底有冇美食？

由於今次住的Resort幾乎包羅萬有，好多事情都可以在Villa內進行，為免以為自己冇去過蘇梅，結果租了一架私家車出去市中心，搵美食！
目的地以蘇梅著名商場Central Festival Samui為中心，先泊低架車在Central Festival，出發！

就在Central Festival閒逛時，突然傳來嘈吵的敲擊聲，原來係賣雪糕。

這是鮮芒果Yogurt Roll，將新鮮芒果肉即肉混入Yogurt內製成，好味得好緊要！

如果只係普通雪糕，我亦唔會試，試過亦唔會寫blog介紹給大家，特別在這叫Yogurt Roll，以新鮮即製yogurt，配以鮮果，加一個強力冷凍盤，造出非常特別的雪糕。

首先，這是零脂肪乳酪鮮果雪糕，味道及口感非常特別，口感上不似香港大熱的Foyo，Foyo似軟雪糕，Yogurt Roll結實很多；Foyo是將配料淋上，Yogurt Roll係將配料同Yogurt好似日式鐵板燒咁樣，將所有材料「刴」埋一齊，所以是Yogurt Roll中帶鮮果肉，有層次得多！

你睇Yuji幾咁期待！就知一定好好味！


先將鮮製乳酪倒在冷盤上。

乳酪慢慢凝固，期間又刴又磋，加強乳酪的口感。


乳酪成型後，就可以加入芒果肉，比例差不多1：1，勁足料！


咁樣人手刴一杯Yogurt Roll，大約要十分鐘，呢份閒情，在香港真係搵唔到！你睇Yuji個心急為食樣，拎定隻匙羹等食！


最後步驟，將乳酪汁攤平，蓋上，凍到佢硬。


然後一剷，一共剷起4 Roll，放入紙杯。


認住呢間Urban Cafe，就在Central Festival G/F的露天餐廳，咁樣一杯人手刴製10分鐘而成的Yogurt Roll，只不過130泰銖，約$29。

以泰國消費而言，並不便宜，但考慮到特別之處、製作方式及味道，真係好超值！

試完一杯芒果Yogurt Roll，太好味，立即encore，Oreo Yogurt Roll，層次更深，脆卜卜的Oreo和Yogurt Roll天衣無縫，十足我細個最愛的「曲奇妙脆」！

基本上，配料自由度極高，100泰銖是乳酪錢，每加一項配料加30泰銖，有士多啤梨、香蕉、提子等等，任你加幾多都得，自由配搭度極高。

後來將Yogurt Roll介紹給同行好友，有朋友說在旺角有非常相似的Yogurt Roll，不過大家試過之後，都一致認為，就算引入香港，要用十分鐘時間製作，條龍肯定長到不堪，師傅仲慘，不停咁刴，連整十杯，真係手都斷，將佢引入香港，有冇得諗呢？似乎較難成事囉。
-------------------------------------------

全新概念食療養生館Y’s RECIPES隆重登場

香港美容專欄作家 Yoko Tsang | Promote Your Page Too

韓國 Vol.1 教你避踩地雷 地膽美食

咁relax嘅情景，香港少有，在韓國倒可忙裏偷暇啊！

-

有緊貼我FB page的，相信也知道我上星期到了韓國4日......

仲post咗3折買韓鞋必去處、明星秘店醬油蟹等誘惑大家，而大前提實情是beauty media trip工幹，工餘以外把握時間狅食狅買，捱夜目的是集合最豐富資訊同大家分享啊（辛苦晒，哈哈）！

-

此行，很高興榮獲當地著名LG Group旗下美容品牌'The History of Whoo后'的邀請。

這品牌在韓國非常著名，代言人是李英愛，行矜貴路線，用的是珍貴素材如冬蟲夏草和人蔘，出自宮廷皇后欽點的韓醫藥材美容秘方，以養生理念護膚，正切合我一貫大力提倡的內外調理方向！

'The History of Whoo后'在香港已經有專櫃喇，我去韓國做什麼？

是率先了解和親身體驗，10月初香港才有售的The History of 后 「還幼」加強版護膚品系列，咩叫「還幼」？我覺得很有意思，是令人充滿展望的「還原十年幼嫩肌膚」.......而呢篇blog敬請軾目以待，9月尾才同大家分享。

-

今篇blog文，集中火力推介大家赴韓四部曲！

vol 1-超級美味韓食店

vol 2-抵買服飾戰利品

vol 3-輔助食極唔易肥

vol 4-瞓少唔易殘方法

Let's go!!

-超級美味韓食店

「醬油蟹專門店」

見到咁澎湃嘅蟹膏，人都顛！將白飯塞入蟹蓋內同吃，中和鹹味，絕配啱key。

這是韓國醬油蟹專門店，雖然這類專食店當地有不少，甚至在濕地巿場也有售，但論美味和衛生度，韓國人宴客都㨂這裏，我們衆人吃後也沒肚子痛吖，haha!!

-

醬油鮑魚，也是這店名菜，爽口彈牙。最特別是經醃漬後，連平時棄掉的鮑魚腸臟也上碟食用，現場很多編輯也放棄試食，我即管品嚐，囗感似粉腸，味道不腥，出奇地好味喎，論健康，咁高膽固醇當然不宜多吃啦！

-

我最讚是海苔湯（即是紫菜），與以往飲過的完全不同，看圖大家就會見到紫菜是一pat pat而非一片片的，韓國地膽告知「靚的紫菜才會溶化」。真係太好味喇......好滑溜兼好香紫菜味，我決定要買返香港，一行等人吃飯後專登去了lotte supermarket，店員帶路到賣刺身專櫃，可惜竟然賣晒，或許是太晚了。

-

N位韓星都係嚟呢間，門內有相為證㗎。由於非常爆場，所以提醒大家必需預約，二樓有三個獨立房間，每房可坐12人，傾得興奮嘈吵也就不怕騷擾別人。

-

整楝醬油蟹專門店，外型充滿蟹的霸氣！

-

「牛肋骨專門店」

我以往到韓國必吃多餐牛肋骨，曾經在blog文分享的是位於明洞地舖；但韓國的牛肋骨店質素可以很差參，試過在明洞上樓的一間十級難食，氣憤兼浪費quota。

今次韓國地膽預約了位於三淸洞烤肉專門店，主力食牛，也有少量豬的。牛肉厚身又軟滑juicy，醃了醬汁的帶有果甜香味，超正！豬扒雖然不是大家favourite，試後也讚同肉質不俗。

-

歎完燒牛肋骨，食個冷麵心理上冇咁熱氣，酸醋味仲可以消滯添吖！

-

此烤肉店位於三清洞，逛街舖shopping後鄰近方便。

-

Waffle 窩夫專門店

我一向極喜歡韓國的窩夫，尤其是cafe環境裝修可人兼舒適，甜點款式又多又靚，人人相機先吃！

胃就只得一個，仲要放以上咁多美食，窩夫店在韓國有咁多間，避踩地雷店，最值得應該去邊間呢？

My favourite 係Beansbins Coffee，連鎖分店中最好味是東大門，兩年前吃了兩次，可惜今次欲重溫才知已店舖已關門了，最終到了三淸洞店。

-

韓國蛋糕界明星，紅咗幾個月仲係佢-彩虹蛋糕/蛋卷，偶像劇及MV都會經常見到。

-

一行7人吃掉4個窩夫+兩杯沙冰，可想而知有幾咁好吃幾值得忘卻肥胖！

[網址 : http://www.beansbins.com/ 連鎖CAFE (韓國有好多間分店）]

-

海鮮，在韓國非常值得一吃，很簡單，夠新鮮就好吃，辛辣蟹鍋拉麵、海膽、醃生蝦、灼原隻墨魚連春、活八爪魚.......

下回同大家再續，韓國開心快活之旅......

-抵買服飾戰利品

-輔助食極唔易肥

-瞓少唔易殘方法

----------------------------------------------------------------------------------

全新概念食療養生館Y’s RECIPES隆重登場

香港美容專欄作家 Yoko Tsang | Promote Your Page Too