自從為食好友 Miffy 從台灣空運西門町「牛店」的牛肉麵到我家（詳情請看台灣美食宅配抵港），我這個麵痴就安排了一個台灣美食之旅。就在月底成行前，知道台灣著名的「程班長牛肉麵」在港開分店，二話不說，立即約埋班 friend （當然包括為食教主 Miffy），喪點喪食，一次過將餐牌上的菜式叫齊咁滯。
- 程班長銜頭一流，我不太熟悉台灣當地的美食獎項，但其獲獎無數的報道及放置在店中的獎座，似乎堅有料到！
- 開放式廚房向正銅鑼灣大街，真金不怕洪爐火，對自家廚藝超有信心。
- 店外設有甜品櫃，原來和香港的甜嫂甜品拍住上既賣牛肉麵，也有台式地道小食、港式食品。
為何我稱程班長周身刀？因為佢唔止賣牛肉麵，台式小食如炸雞排、貢丸湯又有，北方水餃又有，港式地道如權發蔥油雞飯又有，台式珍珠奶茶、紅茶又有，地道甜品都有一大堆，細小店面卻選擇繁多，最啱扮蔡瀾，叫齊晒！
4個人點3份麵加6個小食及2款飲品，本來仲有叫魯肉飯，居然落漏單，就係好彩漏單，因為唔會食得晒。
紅燒牛肉麵 ----------- 合格
從來食麵最緊要湯底夠味（台灣人稱之為湯頭夠濃），程班長顯然有其過人之處，比大婆牛肉麵及毓民牛肉麵的湯底都好，呷一口湯已經有一班黃牛衝口而出的味道。可惜牛肉不是用牛腱肉，而是港式牛腩麵的一般部位，我是有點兒失望的。麵亦非我杯茶，厚身麵條滿口麵粉味，但麵痴友人卻喜愛它有咬勁，所以我碗牛肉麵改為「通粉」，像粉絲的朋友，爽口得多。
- 牛肉麵非常正宗，在港難尋，但坦白講，台灣當地衣多牛肉麵都有此質素。
- 還有這碗半筋半肉麵，起初我以為半筋半肉即係牛腱啦，點知唔係，係解一半牛肉一半牛筋。
- 我的牛肉麵則改為「通粉」，並非早餐通粉，有點像粉絲。
如果齋食牛肉麵的話，程班長絕對冇問題，問題出在牛肉麵以外的菜式。我明白香港地租金昂貴，齋做一碗牛肉麵，都唔知要賣幾多碗先維到皮，唯有貪心一點大包圍，本住百貨賣百客，做多一點生意。但太多瓣數未必是好事，顯然地，牛肉麵做得出色，其他台式、港式小食就變得非常一般，因為非主打嘛，縱然還有非常港式兼主打的權發蔥油雞飯，但我一心食台式料理，會冇啦啦食港式料理嗎？
炸雞扒 --------------- 一般
我不吃油炸食物，卻對台北士林夜市的豪大大雞排刮目相看，上年紅磡有間「我愛台妹炸雞扒」，我也立即去試食，雖味道不及豪大大十分之一，但這道炸雞排只得「我愛台味」的十分一功力。
燒鱔 ------------------ 定係炸大腸？
紅噹噹的燒鱔，上桌時我以為係炸大腸，點解會係紅色？咬落去，好煙韌，好似食緊橡皮糖。
貢丸湯 --------------- 有台味
貢丸有水準，但貢丸唔難做，來貨冇偷功減料已成功。
湯水餃 -------------- 不合格
其實程班長毋須賣水餃，又唔係主打北方小吃，隔籬世貿翡翠拉麵的湯水餃好吃得多。
總括而言，程班長真係風火輪咁多瓣數，牛肉麵真係好出色好正，我到台北一定會去試食一次，再同香港作一比較，但兼賣其他東西只係幫補租金的權宜之計，香港分店可否專注牛肉麵，做得更好更美味呢？
程班長牛肉麵 銅鑼灣廣場二期地下
沒有留言:
發佈留言
注意：只有此網誌的成員可以留言。