食爆台灣早午晚

（我的美容專欄， 將於下星期《MORE》面世，更進一步將絕密扮靚心得、 喪食瘦身攻略詳盡分享給大家，Blog上及誌上各有不同介紹， 雙線齊下，保證《MORE》讀者特別靚過人，請多多支持，謝！）

此刻正身處台灣，回到酒店已經晚上十二點九。 
出發到台灣前本來打算暫停執筆一星期，但真係寫 blog 寫上癮，所以上機一刻同自己講，blog 文盡量以圖說故事，圖多字少，但係呢一刻，我真係非寫不可，因為我終於遇到台灣史上最好味的麻辣鍋，妝都未卸就動筆！


酒香雞更香
早上八點十五分，港龍直飛台北，經驗所得，搭呢班機剛好十二點正到達台北市內酒店，夾晒 lunch hour，第一站係「一品花雕雞」。

話說上年一行二十五人去台灣同朋友慶祝生日，因為掛住 shopping 而錯過了，後來從其他有試到的朋友口中得知：「勁得喎！」真心唔開心了幾日，話晒呢間花雕雞係 Wyman 專欄內的台灣推介，我都係因 Y 之名而抄低個地址，今日終於首度試食。

搞呀搞

主打名菜花雕雞，NT$399二人份量，一掀開煲蓋，花雕味四溢，我對以酒入饌的菜式一向麻麻，一來唔飲酒，二來多數都整到酒味大朕過其他味。難得食落口只聞到酒味而冇食到酒味，雞肉又嫩，肯定用新鮮雞整，一路食一路由侍應堂弄，好似食日式神戶牛 sukiyaki 一樣有藝伎服侍咁高級。 

隨花雕雞而點了腐皮、絲瓜同生菜（台灣稱生菜為大陸妹，搞笑），侍應會逐樣幫你烹調，最感神奇係明明食完濃味的花雕雞，之後將煮稠了的鍋汁撈腐皮撈得非常入味，到最後溝水煮絲瓜同大陸妹都可以救得番蔬菜的清啖味，神奇！

門口貼滿中港台明星品嚐花雕雞的照片，不過搵唔到 Wyman。 


一品花雕雞
北市市民大道四段207號（延吉街口）
886-2-25700388


東區貢丸湯王
食完雞就沿延吉街行返去忠孝東路 shopping，在台北潮流重鎮東區中屹立了一間開業近三十年的小攤販，專賣貢丸湯、滷味小吃，每次血拼前必食其貢丸湯，真係好味到香港搵唔返，爽口彈牙肉味夠鮮味。

攤檔由阿婆主理，長期排滿人龍等食，食佢兩粒貢丸等十五分鐘，服未！NT$25

地址我都唔知，我只係記得由忠孝東路 IZZUE 行入去，第一個街口右手邊就係，攤檔旁有呢塊地址牌。

爆果味乳酪雪糕

香港爆起乳酪雪糕熱潮，台灣一樣有，同樣位於東區的 YoFroyo，其乳酪雪糕的果味比香港任何一間都要強，我揀了芒果味乳酪，或者會有人認為濃得太甜，其實係足果粒先有如此效果，加上連 topping 的芒果都新鮮同靚過香港，大 yummy！

細杯都只係NT$65，$16港幣，在香港食起碼近$30！

http://www.yofroyo.com/

麻辣無敵手  小S都訂唔到位的鼎王  

我鍾意火鍋，但怕辣，所以都唔會食麻辣鍋，尤其試過好多麻辣鍋都只係得個死辣，食唔夠五分就變潤腸咀，咪搞！

不過自從迷上《康熙來了》後，主持小S不停話鼎王係台灣最正、最長龍同最難訂位的麻辣鍋，小S在節目上仲試過親自打電話去鼎王即日訂晚上七點八位用餐，響晒朵話自己係明星小S都一樣冇面畀，就知佢幾咁寸！所以，我一個月前已經打 IDD 訂定位，仲得到一個訂位編號，要到場後出示添，幾咁誇張！

裝修靚到絕，香港冇幾多間火鍋店可以一比！

話得自己係鼎王，連個火鍋都係一個鼎，頂！使唔使咁認真先？

點了麻辣鴛鴦配酸菜白肉鍋，萬一辣得滯都有另一面代替，鍋錢每位NT$98，鴛鴦再加NT$150

點知第一口呷一呷麻辣湯，嘩，從未試過咁清純的麻辣感覺，辣味入口即溶，即係辣一辣然後冇晒辣味，但口中隱若感到麻辣的火燙，但又唔會抗拒，最重要係，食完後張咀冇變潤腸，我敢講，全香港所有旅遊書介紹的台灣麻辣鍋，冇一間及得上鼎王！

牛肉只有一種選擇

另一 order 的白豬肉 

滷大腸出色到難以形容，肥瘦比例令你覺得懷疑食肥大腸係唔會肥。

菱格牛肚，爽！

白飯同醬料都係免費任裝

持平一點，好野都有唔好一面，正如我把口同你張咀唔同，我覺得好食唔代表你又有同感，信我一半穩陣 D；到我數佢有乜唔好，你又睇下我公唔公道。 第一，用餐時間限定只有90分鐘，夠鐘即埋單，狠！第二，餃類菜式可以不試，餃皮厚到死，其好處係點滾都唔會滾爛。

不能置信的畫面係侍應每招呼閣下或奉上餐品時，最後會做出指定動作----180度鞠躬，比日本人90度直角鞠躬更勁，挑戰身體柔軟度極限！

鼎王台北光復店

地址：台北市光復北路89號


電話：(02)2742-1166
營業時間:AM11:00 ~ AM03:00
桌數:32

http://www.tripodking.com.tw/

http://vipblog.orientalsunday.hk/yokot/