起完條題，我自己都睇到頭都大埋，點解會奢華與平民共存？
呢$1,100萬係指每月租金，租邊度會咁鬼貴呢？銅鑼灣之嘛！你又估下租銅鑼灣邊忽要咁貴租呢？京華中心囉！呢，一出以前三越地鐵站口，對正 Giordano 同屈臣氏嗰度咪京華中心囉！
由地庫大家樂、連地面 Giordano及屈臣氏，上到四樓日本城，總面積係51,188平方呎，由下年八月起，將被佢包起晒...
Forever 21
其實呢單料於上星期的各大報章財經版已經有講，事關該鋪呎租$215，月租剛好 $1,100萬，破晒香港工商鋪紀錄，更比原來的租金貴一倍！只係冇乜副刊提到這時裝猛料啫。
美國連鎖店 Forever 21... 我會話佢同 H&M、Zara 係同黨，價錢與 H&M 差不多、而平過 Zara ，潮流觸覺甚至有過之而無不及。
話說日本原宿開設五層高 H&M 轟動全日本，當時勁排長龍，但當 Forever 21 在旁邊同樣開五層高專門店後，H&M 條龍就過咗俾 Forever 21，我都有份參予過檔事件，何況最近去日本的最大興緻就係去原宿 Forever 21 掃貨，每次例必逛個多小時，且必買幾萬￥，咪睇少呢 2 千幾蚊港紙，可以足足買到三大袋衫返港呀！
韓國首爾一樣有 Forever 21，上年 Prada 請我到當地的 press trip，我也到Forever 21 走一轉，掃完貨先去東大門通宵 shopping！
坦白講，有冇人話到俾我知，置地 LV 幾錢租？太子大廈 Chanel 又使唔使過千萬租金？
我係咁意幫 Forever 21 香港新鋪計下成本，每月 $1,100 萬租，當其餘燈油火蠟、人工雜費要 $300萬，又當D 衫零成本，賣幾多賺幾多，每月皮費$1,400 萬，每日要賺 $46.66 萬先夠交租同出糧。就當每個消費者平均買$466衫，每日都要1000人！我知...我每次去都唔止用 $466 買衫，但唔係日日咁幫襯嘛，真係好驚佢最後頂唔住貴租要撒離香港呀！希望大家都會撐行 Forever 21 啦！
家陣仲摷埋衣櫃部份 Forever 21 單品晒俾大家睇... 佢係幾咁平靚正，到時大家夾手夾腳湊好佢，Forever 21 至可以 forever 在港營業！
大家估吓呢條 cocktail dress 要幾錢？估佢唔到只售 $250。最讃斜膊的層次蝴蝶結，是點睛位。
Ruffles tee dress $180，details 位用上chiffon，casual 得來有心思！
Ruffles 裙尾 tee dress $160，襯條 sharp 色 legging，young & cute！
閃石長背心 $240，大 chocker 頸鏈設計...型！
閃粉 print 背心 $89，襯 tight pants 一絕！
至愛百搭中袖針織外套，化妝品 print 很別緻 ，甚有 Moschino 神髓 $280
同樣百搭的 fake print 中袖針織外套，扮 corset 設計甚具玩味，顏色超 sharp $280
小道消息一則：幫我設計浮誇玩味婚禮晚裝的好友兼本土設計師 Mr Mui，半年前告知我有自稱 Forever 21 的老板(有出示名片)邀他成為品牌設計師之一，但因為要到美國，加上他自我的性格，最怕束縛，所以告吹了。唉！如果佢真係當上設計師，我咪可以成為 Super VIP！！
沒有留言:
發佈留言
注意：只有此網誌的成員可以留言。