辟穀不是我的減肥方案，識食而不濫食，是我的覓食宗旨。
何來 Keep fit 原動力？為的是天下間種種美食！
隔晚扭扭呼拉圈、每星期踩單車兜大球場一圈、時刻運氣 hold 肚以免腰肢多個圈.......那就
放心與美食結伴。
前天一晚走 3 場去勻欽點美食勝地，久不久也要到訪一解相思之苦！
身邊朋友都知我係忠實火鍋迷，唔理春夏定秋冬，沙頭角、西環定東涌，從不介意遠行領航為食總司
令。基本上火鍋料只要新鮮就自然好食，而新鮮同質素同價錢三者也成正比，基本上貴價火鍋店就具
嘜頭保証，例如以下三間，帶埋親戚朋友共嚐擔保有讃無彈：灣仔王子酒店東來居、尖沙咀樓上樓、
英皇駿景洒店駿景軒，食材味道都係一等一，但埋單確實「揦脷」。而湯底也是火鍋店的靈魂，但頗多火
鍋店的湯底水準同股市一樣有上有落，佐敦牛皇星就係例子，記得《新假期》介紹此新店之時，我旋
即 call 齊兩圍枱的朋友試菜，佢個招牌海皇湯超鮮甜濃郁，然而過咗兩個月再番兜，湯底失色了，
色澤清澈、淡然無味的，幸而食材則仍能保持上佳水準，尤其是不同部位肥牛；而謙記是少數能長期
保持湯底水準一致，特別是蕃茄牛腩湯，必食！
當然平價也可以有好選擇，九龍城方榮記是抵食版天后級數，幫襯咗超過十年，家住 CWB 的我要坐
足 45 分鐘車程才可一嚐美食。近日新增即食坑腩，叫碗試試卻有點失望，靚腩部位少之又少，大部
份也很「韌」。說回正題火鍋料，記得唔好點 $98 的手切牛，要點 $168 的頂級牛肉，前者欠牛味
且嚡身，後者是原始牛肉的頂點，又滑溜又能把牛味充斥口腔久久不散，而其他的生料也不過是
$28-$38 碟，相對其他火鍋店這只等同一碟菜嘅價錢；最誇張係超水準的大地魚湯底都只係 $25，又
只等同其他店的約 4 分 1 價錢；只要唔好嫌服務差同環境一般。再唔係等到九點半至食，我首選是
時代廣場不倒翁，全單六折，又係平到喊兼非常好食之選。
第一站：西環山道「煲皇」
上星期 30 度高溫都去了西環山道食煲皇，因為佢算係頗好食而價錢可接受的火鍋店，做商台的朋友
也謂是飯堂。但相信唔係區民都未必試過，皆因位處偏辟，在長命斜中間位置，唔係揸車或搭的都
幾難登峯！
首先最讃煲皇的肥牛，部位分類夠細緻，有牛脊、牛頸、牛邊同牛腋，燕瘦環肥任擇。
點了店內主打...最多雪花的牛腋，爽滑軟熟，油脂分佈平均。
加碼一碟牛脊，肉味重而有咬口。
最有特色是芝心墨魚丸，咬一口會拖住條芝士絲，半溶芝士軟軟的又煙韌，小心芝士燙口。
花膠仔收你幾十蚊碟咁多隻，梗唔係花膠公啦，只是花膠筒，薄身勝在快腍又索湯精華，補吓膠原蛋白。
第ニ站：佐敦渡船角「堂記」
呢餐家庭聚會飯局由於 6 點開始，所以 8 點就散水，之後約咗朋友又食過，去了佐敦渡船角堂記腸粉專門店。
每次食都等鬼咁耐，先是等 20 分鐘至有位，坐低再等足一粒鐘至有即蒸即拉腸粉食，但一分鐘就食晒，說實話幾好食都係假，下次寧願 9 點半至去到，起碼唔使等到呆。冇計，鬼叫佢真係全港最好食蒸腸粉勝地！
點了鎮店燒鵝腸，鍾意佢夠香口，兩分皮夾三分肉，最讃無肥膏！
叉燒腸媲美利苑，香而不膩，叉燒不會嚡口。
牛肉腸軟綿綿，一啖滑入口。
腸粉皮薄而透見餡料，米味濃而香，上碟超熱辣，豉油唔會太濃或太甜搶去腸粉的米味。
嘩，傳媒報導多到可以做牆紙！
第三站：佐敦渡船角「重慶燒」
專登去到佐敦渡船角咁偏辟位置，三碟腸粉又點夠滿足口癮？
再食埋對面重慶燒！
自從重慶燒分店愈開愈多，加上有類似的店鋪開在附近(龍蝦燒)，總覺得重慶燒已經不及當初新開時的惹味。
除了燒平價海鮮仲有一手之外，其餘肉類都已經不覺有甚麼特別。
呢條燒大眼雞抵食又惹味，旁邊附上泰式酸辣醬，與茴香粉出奇的夾。$58
新增四川辣味炒田螺，中我 favourite 超濃味，夠晒辣，$38 碟ok，但碟底多數極細隻。
7 吋長大蝦，$13/隻抵食，肉質爽口。
墨鱼咀很惹味，帶點脆口感，回味無窮！$12/串 (唉，失手影鬆咗！)
其他肉串買相一般，加上用 iPhone 拍攝唔夠靚仔，大部份 $10/串都算抵食兼水準不俗。
一晚掃三間心水食店夠晒滿足，為食兵團下次再出發！
沒有留言:
發佈留言
注意：只有此網誌的成員可以留言。