2010年7月13日星期二

平易近人的滋味


昨天試過寸得滯的海南少爺,坦白講,好味何須難相近,有時小店的情味也是色香味以外的得分點。
就在剛過去的父親節,只想簡簡單單的、平平靜靜的渡過,揀了人少但有功架的紀律部隊俱樂部中菜廳,沿加路連山道向大球場方向行入去,正正在聖保祿醫院後面。這是很多地道銅鑼灣街坊也不知的好食肆,就算非紀律部隊成員也可入內進餐。
就在行經加路連山路時,在一堆車房的角落處,赫然發現一間新開的泰國餐廳,名字是一系列港式泰菜店最喜愛的「泰字頭」----泰滋美,膽敢在這條人煙渺少的小街角落開新店,一係自恃廚藝高超,一係自尋死路,當然,我希望是前者居多。

位置正正是加路連山道路政署對面車房再行入轉角死位,雖是行入大球場必經之路,但好易走漏眼而錯過。

一睇 menu,二話不說即點泰式海南雞,以補昨日之不足。還有一味咖喱坑腩,聽名已經覺得興奮,最後加多碟香草肉碎炒飯,一次過試晒大廚的煮雞、調咖喱味及炒飯的功力。

餐廳裝修簡單,牆上加幅近年最興的大陸製佛像畫飾。煙剷食客會最 buy 餐廳的露天位,仲有幾多地方可以歎住煙食飯?

海南雞只係$88半隻,同海南少爺一客海南雞飯相同價錢,但雞肉明顯揀得比海南少爺精,雞靚已經贏一球,只是醬料係普通泰式青紅辣椒醬,輸番半球,淨勝半球。

雞靚就會食唔停,更不能置信的是伴碟淹酸菜,好味到我額外畀錢買多份做外賣送波。

咖喱坑腩($68)的咖喱出奇好味,我最怕咖喱的棷味太搶,會好似飲棷汁,齋食還可以,一送飯就會太膩。好味的咖喱汁一配白飯會變魔術,飯同咖喱在口腔跳舞的奇異感覺,我今次食得到。

唯一要彈係牛腩並非坑腩,只是位置較佳的腩位。近年食肆都濫用坑腩、爽腩之名,卻冇其義,我自小由九記牛腩湊大,坑腩爽腩分得一清二楚,不過佢炆得腍而又爽口,技術有番咁上下。

香草肉碎炒飯($52)連飯底都炒埋,我有點意外,一般泰菜店的煮法是白飯伴碟再鋪上炒辣肉碎,幸好炒得飯粒分明,香口唔油,驚喜。

唯一要彈係肉碎唔多,香葉多,下次要叫佢少飯多餸。

咁好味都只不過 $239,招呼欣勤,好過受少爺脾氣啦!
今次食住咁多先,仲有蝦多士、無骨豬手同埋冬蔭鮮蝦炒飯要試,希望今個星期內試到啦!

好在路口位擺咗塊餐牌,方便你揾到佢。

泰滋美 銅鑼灣希雲街 33 號 A 地下 2577 7822 (雖位處希雲街,其實從加路連山道口丹麥餅店行入去,榮式雞扒隔籬車房行入去就係)

沒有留言:

發佈留言

注意:只有此網誌的成員可以留言。