2010年7月26日星期一

「瀨嘢」減肥膏!

(我正在籌備最新的美容專欄, 將於七月內《MORE》面世,更進一步將絕密扮靚心得、 喪食瘦身攻略詳盡分享給大家,Blog上及誌上各有不同介紹, 雙線齊下,保證《MORE》讀者特別靚過人,請多多支持,謝!)

好友們都知我熱愛試用千奇百怪的美容產品,尤其係具有口碑的,所以他們到各地旅行都會識趣地奉獻啱用手信。
點知今勻瀨嘢呀!
上星期,貪靚精 J 小姐啱啱由泰國返港,即急不及待約飯局,去咗最近另一新飯堂... Time Square basement 的利小館(利苑 group),食極不厭的有鹵水豆腐,超滑溜、煎蘿白糕,有蘿白絲非一味用粉,仲有鹹魚茸蒸肉餅,啖啖有鹹魚香,咦...話題拉得太遠添!
其實係想講呢盒泰國出品紅辣椒+黑胡椒减肥膏,她身邊幾位姊妹都有用開,每次有人去泰國必掃大量派街坊。
殊不知尋晚興高采烈試用完,搞到無覺好瞓!
泰國 Sabai-arom 紅辣椒+黑胡椒减肥膏 500泰銖 (港幣約 $125)
J 小姐千叮萬矚:「用手搽上要减的部位後,千奇... 千奇咪捽眼,會辣到標眼淚;大熱天時搽咗出街,仲會感受到由底層「慶」恰恰到出面,仿似持續燒脂的感覺,心情特別高漲呀!」
講到咁誇,尋晚沖完涼即試啦!
我搽咗喺手臂、大腿和 pat pat 位,本來搽完覺得無乜料到,只聞到一朕香料味,點知半分鐘後已經 feel 到一股熱、辣感覺在肌膚內跳動,摸上手是暖立立的,再等待 1 分鐘... 呀!大鑊!左手臂表皮紅咗一大撻,細心 D 睇佈滿紅色細點。
Oh!敏感呀!Why me?
塗後半分鐘微紅一撻!
一分鐘後紅到一大撻,仲佈滿紅色細點!嚇人!

即時置身《壹週刋》投訴專欄的受害人般... 影相為證呀!
此時再次用天然香薰液沖涼,而搽咗呢盒辣椒膏的皮膚「慶」足個多小時,超難頂,好彩其他部位的皮膚無礙咋,幾驚破壞到我星期二即將起程的台灣之旅。
對於好友 J 的一番心意是無言感激的,只怪紅辣椒+黑胡椒成份雙劍合壁太過刺激!
***奉勸辣椒成份超級刺激,皮膚敏感和易泛紅請不要試用啊!
認住你!怕鬼咗你!


小知識:有研究顯示辣椒及胡椒之所以有助減肥,原因就在於含有辣椒素和胡椒碱,有行氣之效,幫助加促新陳代謝,從而消脂。
但個人認為,外塗辣椒膏顶多只能促進塗抹部位的血液循環,並不能真正發揮自身大量燃燒脂肪之效。
我手臂今勻成為壯烈犧牲下的白老鼠,提醒大家要慎選安全有效成份的瘦身產品啊!
明天再續...

http://vipblog.orientalsunday.hk/yokot/

沒有留言:

發佈留言

注意:只有此網誌的成員可以留言。