不知何解，有朋友竟然告知近排因為天氣熱、濕度高，咪唔使搽身體保濕用品囉！
唉唷，皮膚缺水不分季節性，流汗多大家也懂得多飲水補充水份。
要知道每次洗澡後皮脂膜被沖洗了，肌膚此時最易蒸發水份，應立即把握良機餵皮膚飲水，長期作戰，能令膚質倍添柔軟濕潤呀！
以下推介我最喜歡的 3 款不同功效保濕用品給大家：
更生去角質：
Clinique turnaround body smoothing cream 更新活膚潤體霜
Clinique turnaround 系列一向我都好 buy，尤其係佢支 concentrate 精華素，搽完番面即時勁滑溜，用耐咗仲有更生嬌嫩煥膚之效。它的成員 body cream 一樣咁抵讚，叫做 cream 實情係 lotion，易吸收唔算立，至巴閉係唔止極速踢走缺水問題，持續使用仲可以去除老化角質、軟化肌膚、掃走暗啞，為肌膚大翻新！
Clinique turnaround 更新活膚潤體霜 $280 / 150ml
含有玻尿酸鈉、乳油木果油立即柔潤肌膚；水楊酸、乙醯葡萄糖胺均勻膚色，並減輕肌膚乾燥脫屑現象。
芳香滋潤：
Jill Stuart Body Milk
Jill Stuart 時裝濃罩浪漫温婉女性化，少女與中女通殺，其化妝護膚品營造甜美國度，最多人追捧當然是其皇牌漸變色胭脂啦，每每拎上手看到其粉色與立體扭花包裝設計，倍感「少女情懷總是詩」，哈哈...形容得有點過火位！
講番呢支 body milk，最引人入勝是其芳香氣味，花香味濃，又帶甜甜的果味，塗上後由嗅覺觸發舒緩與浪漫感覺，連香水都慳番唔使搽，入睡前塗抹全身就最啱。質地頗稀身，很水潤，快吸收極清爽，潤而不立嗰種 feel，特別適合炎夏用，仲可以辟汗味、扮晒體香！
Jill Stuart Body Milk $220 / 250ml
主要植物萃取物為玫瑰、白百合、牡丹、洋甘菊等，散發花漾香氣，同時為肌膚作天然滋潤保濕。
舒緩敏感：
Bioderm Atoderm 維他命 PP 修護霜
此乳霜是專為敏感皮膚而設的，不含香料不刺激皮膚，性質非常溫和，就連 6 個月以上的嬰兒也可使用；而某皮膚科醫生也推介給身邊患有濕疹的朋友 G 使用，她話我知真的可以舒緩乾燥和痕癢不適，但當然不是治療作用！
其乳液質地很易推開、很幼滑，皮膚容易吸收，我覺得因乾燥而起的痕癢能明顯改善，例如是脚踭位，塗後修護效果很好。若然皮膚突發性唔聽話出暗粒，我都係用佢，唔怕情況會惡化嘛！
Bioderm 維他命PP修護霜 $260 / 200ml
蘊含 Vitamin PP(即維他命 B3)修補及鞏固角質層，形成天然防禦牆。提供長效保濕，對抗敏感原。特別適合極敏感性及濕疹(非發炎期)皮膚護理。
***明星推骨瘦面？聽來神乎奇技！詳情請留意我在今期《MORE》撰寫的美容專欄啦！
沒有留言:
發佈留言
注意：只有此網誌的成員可以留言。