對付暗瘡的壓箱秘技

無論你將皮膚打理得如何妥善，油脂分泌與塵埃交融，總會令面上有長暗瘡的一天，這一天就像交稅一樣，無可避免亦無法逃避，只係...我真的希望暗瘡像交稅一樣，一年只會發生一次咁大把！

既然暗瘡出現了，如何處理它就是今天的課題，你總不會狠狠地、毫無憐憫地用手指擠迫它、壓破它，引一時之快就會留下永不磨滅的暗瘡疤，色素沉澱好惡搞，切忌！（當然，這些疤總有解決方法，但就要動用到我的彩光之父，又要使一筆。）

如果要對付頑強的玫瑰痤瘡、又或是荷爾蒙失調引致的瘡，都不是這篇 blog 文可以解決的難題。假如只是一至數粒偶發性暗瘡，以下是極速消滅它的好方法！

最新多功能殺荳精華  ~H20+速效抗豆淨膚精華  $260 / 25ml

個人認為係最 multi purpose 的暗瘡精華，應該結集防禦、消滅、去印... 全方位功效對付痘痘！~H20+ 呢支新品的確啱使，尤其喺炎夏，含有海洋草本成分，能抑制油脂分泌，有效預防暗瘡形成。或當暗瘡爆發後，此精華又可對抗細菌，加速凋謝。最特別係萬一唔好彩留下暗瘡印又點算呢？原來佢又含有 AHA及BHA 的酸性成分，可以去除表皮角質層，淡化印痕。

一支暗瘡精華包含三個滅瘡願望，確係醒！

一日消腫精華  Dermalogica Special Clearing Booster  $528 / 30ml

話明係壓箱秘技，我對付暗瘡的秘密武器就係佢！
每當發現臉上有暗瘡開始發作，剛泛紅準備谷膿之時，在臨瞓前搖勻佢，塗少少，記住真係好少好薄點到即止，第二朝起身，立即阻止谷膿、甚至撫平暗瘡的紅腫期，所以我稱之為一日消腫精華。
不過，有好亦有唔好，這暗瘡精華藥力非常霸道，能迅即收乾暗瘡，從而阻止進一步惡化，但太薄的肌膚如大部份女性，若貪心厚敷，第二日就會仿如灼傷泛起微紅，嚴重者甚至會甩皮，所以緊記只可以塗極少份量，足以殺它死。誠然，我以皮膚較厚的男性臉上作測試，效果非常好仲冇灼傷添，所以用佢時要非常小心，功效我俾足 100 分，只係價錢真係唔平，但都值得看門口！

暗瘡面膜  Clinique Anti-Blemish Solutions Spot Treatment Gel  $120 / 15ml

以經驗累積，難纏的毒瘤級暗瘡才會用到 dermalogica，一般的小型瘡，我就會用 Clinique Treatment Gel，佢好似幫暗瘡做面膜一樣，將暗瘡同空氣隔絕，然後慢慢令暗瘡枯乾。
塗上時感覺涼快，但若暗瘡已被擠破有傷口，塗上時會有被灼一吓感覺，似消炎緊咁 work。100% 無香料，是敏感肌與温和派用家的必然之選。

男士遮擋膏  Shiseido UNO Acne Care Paste  約$80 / 10g

暗瘡並非女士專利，男士們若然護理不周，情況可以更惡劣呢！
除使用上述推介外，見人時想掩蓋惱人暗瘡和疤痕，建議塗上這支 Shiseido 出品的 UNO 暗瘡遮瑕膏，遮瑕兼有治療暗瘡成份，質地較稠，不易溶化，係貪靚男士的佳音。而這支遮瑕膏的exactly 售價我也忘記了，只知道屈臣氏有售。
如果膚色較黑的女士都可以照用，因為遮瑕膏色澤較深，但白淨的就用唔著，可用以下推介呢！

女士遮瑕膏  Clinique Anti-Blemish Solutions Cleaning Concealer Camouflant Purifiant Formule  $150 / 10ml

男士們適合用 UNO，一般女士膚質就宜選用這支 Clinique，貼近膚色且色澤較淺、質地水潤，加上 100% 無香料，不會引起肌膚過敏，是我自己的定番暗瘡遮瑕膏。

打機學擠暗瘡

唔係講笑，擠暗瘡都要有一定技巧，除注意衛生外，最基本莫過於不要直接用手擠，因手指上的細菌會從傷口中進入，只會愈搞愈衰，最好隔著紙巾或以消毒針去處理。
我最近愛上了 iPhone app 擠暗瘡遊戲(免費下載)，每塊面上有三款不同類型的暗瘡要待處理，還要評估暗瘡是否成熟，繼而將膿頭徹底清除才算成功，否則尚留一丁點都會使之再惡化，真係要練習加上經驗才行！過程認真，兼要用兩隻手指去玩，笑鬼死！

呢隻 game 叫《Pimple Popper Lite》 ，只有一塊面三粒瘡，若想擠多 D 就要俾錢買完全版喇！

恐佈瘡大鬧 Youtube

警告：以下片段，膽少勿看！前日有朋友在 facebook post 出恐佈極惡級暗瘡被放膿事件，只看世紀大毒瘡不停地沿沿不絕流出毒膿，我睇咗 20 秒已經頂唔順，想減肥又想撲絕食慾，就不要錯過！但我真係再警告多大家一次，真係好好好好好好好核突！ 

***大家知唔知，新世代最有效的科研美肌成分是什麼？

呢股美肌、養生熱潮於日本熾熱，現於香港蓄勢待發，功效比有「補水王」稱號的透明質酸更勝一籌。

想肌齡逆轉？我追捧的 9 Beauty 皇牌 facial 就有此神奇功效！

詳情請留意我在今期《MORE》撰寫的美容專欄啦！

http://vipblog.orientalsunday.hk/yokot/