直接受害者當然是真金白銀用一筆錢 join course 預支的消費者。
我的朋友 A 就是較早前大型瑜珈中心突然執笠的苦主，仲要係執笠前一個月才被氹開新course，大拿拿成萬幾蚊付諸流水，真陰公！
可惜突然結業者大有人在，執前毫無先兆，防不勝防！
翻版事件日前在我身上發生，事件雖不及大型瑜珈中心例閉般震撼，亦未至於上報紙頭條，但切膚之痛令我感受更深，希望大家時刻提高警惕！
相信大家也曾光顧按摩店，前幾個月聽朋友堆勁讃某銅鑼灣秘店，是由幾位泰籍技師主理，夠晒正宗，由於上樓位置隱蔽、格局似廉價時鐘房，但技術出眾價錢平咁話，即管一試，繼而自投罹網買埋套票...約千多元，仲賴精明問明有無時限、每次限用幾多張等等。
及至前幾日船P之際，同船朋友 H 話早一日喺嗰間按摩秘店嘆咗雙飛 4 手按摩，勁爽咁話，仲向衆人分享箇中樂趣！即係一人按肩，同時間另一人按腳，4 手發力齊齊按。
大家聽完心都郁晒想試吓，仲諗住柴娃娃揾日包場搞「歡樂按摩P」！好彩無成事啫！
世事就係如此蹺妙，黃昏落船繼而收到該按摩店泰籍東主來電：「我 day(哋)聽日唔做喇，你 Fri(快) D like(嚟)做埋 two(套) 票啦！」
我即追問：「咩唔做呀？休息係咪？」
點知事實是「Ming(明)天 close，執笠呀！」
我火滾回答：「吓！聽日就執？今日至叫我按晒 D 套票？揼到全身散晒都未夠數啦！唔講咁多喇，回水呀！」
泰籍東主謂：「No money！唔會俾番，係你成日都唔 like(嚟)。」
嘩！咁無道理都講得出，心諗無須再續駡戰，嘥氣！「咁報警囉！差館見！」
此時按摩店東主終於屈服，如是者有幸取回剩餘尾數。
講真 ...錢唔多，但據理力爭係人馬座特性。
家家有本難諗的經！
我估呢件事咁好彩攞得番錢，只不過係該店東主想 keep 舊客，他朝有日再開店，日後好相見咁解，而非良心發現，可惜不善處理，倒頭來聲譽仲衰。
其實我有時試過一些小型美容院，技術一流服務又佳，雖不致坐擁豪華裝修宮廷格局，但收費相宜，這些心中有數的秘店，我只會私底下向朋友介紹，但有時當朋友想開 course 時，銀碼雖不致五位數，但都希望可以用信用咭分期付款，但偏偏不設分期服務，甚至連咭機都冇。
我曾為此向我的女企業家、前輩朋友 P 請教過，原來銀行不肯為這些小型美容院提供分期服務，就係怕小店突然結業，當苦主尚有餘款未供完，但提供服務的公司卻結業，試問銀行會唔追收你的結欠嗎？但銀行又已經將整筆款項、扣除手續費後交晒俾美容院，無論苦主或銀行都係受害者！這就清楚解釋批核分期的難度所在，只係三者間的關係相互糾纏，都唔知係有雞先定蛋先的兩難題，唔明請睇《東地》社長曹雪聰一文，關係類近，精辟獨到，一清二楚！
因為有分期，所以亂使錢；因為亂使錢，所以要分期。
因為會走數，所以唔分期；因為有分期，所以會走數。
無論大型、蚊型店都可以未完租約，或未完成客人預付月費、套票而突然結業，先付一筆錢對消費者無乜保障，如何謹慎行事？天知地知！
***明星推骨瘦面？聽來神乎奇技！詳情請留意我在今期《MORE》撰寫的美容專欄啦！
http://vipblog.orientalsunday.hk/yokot/
沒有留言:
發佈留言
注意：只有此網誌的成員可以留言。