我在《MORE》寫 blog 已經三個月有多，除公開自己的扮靚心得，以及人肉測試不少減肥、護膚療程，講得最多的都係食。論收視，美食當前也難敵點樣整靚自己及點樣可以再瘦D，但俗語都有話「辛苦搵埋志在食」，而我則是「努力經營全為食」，keep 到咁 fit 都係為了肆無忌憚的食食食。姊妹們，不要為了 keep fit 而放棄美食！雖然有人飲水都會肥，食牛肉都會敏感；卻其實我食咁多都會肥，但我去台灣旅行都會帶呼拉圈同行，晚上在酒店房每晚必做20分鐘呼拉圈；我食到一些基因改造食物都會立即皮膚敏感，例如街市售賣的迷你西瓜，一食立即中招，雖喜歡亦要戒。
昨天我的美食目標是香港的國境之南－－蒲苔島，島上只餘一間海鮮飯店。為食兵團團長 M 小姐說蒲苔島的海鮮是全港最好食，另一位 M 小姐的朋友更是海鮮店的老闆。既有地利及人和，加上團長 M 小姐為了食居然班到架免費私人遊艇，我咁唔鍾意曬都決定同行，出發！
近年我已經絕跡盛夏的水上活動，卻其實我早幾年是很喜歡 wakeboard 的，那時的同事都不知我曾經出海，因為完全冇黑過。有機會我會公開我的「抗曬工程」。亦因「抗曬工程」非常繁複艱巨，也是我絕跡水上活動的主因。
落船後在碼頭的左手邊，便見到僅餘的一間海鮮飯店－－明記海鮮。最高峰時，島上共有三間海鮮飯店，可惜公眾船期疏落，明記也只在星期四、五、六及日經營。
第一味豉椒炒蜆，食蜆最好先問店員蜆靚唔靚同肥唔肥，例如我本來想叫蟶子，店員就講明「今日蟶子唔靚」，咁就識做轉食蜆啦。這店獨門秘製的豉椒醬非常出色，帶辣勁而不嗆喉，單係第一道菜已經咁掂，之後肯定正。
椒鹽鮮魷粉皮薄、魷魚鮮，最怕食椒鹽鮮魷食到成口粉，愈厚粉即係炸得愈勁愈老，即係愈唔好食，道理同化妝一樣，愈厚粉愈唔靚，但化一門貼面薄粉，又有幾多人做到？
白灼中蝦又係火喉準確，中蝦灼得太耐會老，其實一拿上手將蝦頭同蝦身搣開時有一下清脆的啪一聲，就一定蝦鮮同灼準時間，朋友 F 原來早係蒲苔擁躉，猛讚蒲苔的蝦全港最好食。
昆布湯又係蒲苔特產，下火袪濕，本來係盛夏定番海鮮單品，不過店員都話咁熱飲熱湯怕唔怕，一場來到當然不怕，果然一飲立即標汗，成個背脊濕晒。
椒鹽瀨尿蝦又係海鮮定番，唔叫真係唔算食海鮮。同樣贏在椒鹽非常惹味，好幾位「椒鹽蝦精」都讚，肉殼分明，搣開個殼就啖啖肉，正。
生炒骨就太肥，我自己只係一般，下次可以不叫。
重頭戲係大鮮鮑，每隻$60，手掌咁大隻。要讚的是非常乾淨，食鮑魚最怕魚腸污糟不堪，一剝開個殼就食慾大減。今次呢隻大鮑就非常乾淨，肉身非常嫩，一嚙就開，仲要啖啖肉，終於明白朝朝鮑魚當早餐欣宜點解咁肥。
本來係用蛋白海鮮炒飯做終結（中間仲有兩個炒菜同泥鯭粥冇介紹到），不過食完都係唔夠喉。
所以補多個蒸扇貝，食多2粒就剛剛好同點解食到2粒，因為已經有人投降棄食，咁我咪食埋佢囉。
返上船，去南灣，另一班遲到朋友接力，先帶兩隻燒鴨上船，我梗係唔客氣，燒鴨左脾唔該！
涼透心推介，必買蒟蒻Jelly，上船時先雪凍，作為晚後甜品，撕開包裝後成個蒟蒻彈出來，撞入口非常正，只係比較貴，$25得12 粒，Citysuper有售。
在明記食咁多海鮮，九個人埋單都只係 $2,350（連大量非酒精飲品），除開 $262一位，對為食兵團而言，又一次將 Openrice 的建議消費 double 係目的所在。如果冇我們咁大食，係唔需要呢個價，一句講晒，平靚正。
明記海鮮酒家（逢星期四至日營業）
蒲苔島大灣
電話：2849 7038
想查詢蒲苔島公眾船期，請到http://www.traway.com.hk/routes.html#Potoi
http://vipblog.orientalsunday.hk/yokot/
***明星推骨瘦面？聽來神乎奇技！詳情請留意我在今期《MORE》撰寫的美容專欄啦！
沒有留言:
發佈留言
注意：只有此網誌的成員可以留言。