原因？大家應該心照，有那個女人不想自己行入Hermes就可以買到Birkin？
日本銀座Hermes專門店，猶如門徒一定要進貢 / 拜見的聖地。
不過，女人的好勝心，的確可以戰勝世界，我識得一個好友，每次外遊，都可以順利在世界各地的Hermes專門店，買到Birkin，她不是甚麼VIP，也沒有特殊背景，平凡如你我，點樣才可以做到？
難得她也大方，肯公開她的心得，而她也認為，在日本Hermes買到Birkin的機會最高，比在法國或其他歐洲國家更容易，大家值得洗耳恭聽！
據她講，要買到Birkin，由你一開始行入Hermes時，已經是「戰爭」的開始，而你的對手，就是「可惡」的店員，因為你們能否買到心儀的袋款，好大原因取決於店員，買不到的人多，你說是否很「可惡」？
以香港人的身份，去到香港以外的Hermes，和店員交手，店員的基本「程序」，係會先分辨你是以下哪一個類別：
A. 炒家 --- 店員認定你純粹轉售圖利，根本不想同你多糾纏，快手打發你走就是她的下一步。
B. 用家 --- 最想賣俾你，認定你不會轉售，是真心使用Hermes產品的人。
C. 遊客 --- 知你純粹路過貴境，求其賣個袋俾你，等你回老家後好交差。
店員怎樣決定你是A、B定C？可以咁講，由你和店員的眼神第一刻接觸開始已經開始進行，用最能夠讓你明白的例子做譬喻---同你帶小朋友去名校面試一樣咁認真！
問題係，你唔會直接同店員講：「我唔係炒家，我係海外真實用家，一場來到，都入場進貢，你拎個Birkin俾我睇下！」
關鍵，要令店員相信你是用家，要證明自己是死忠粉絲，非Hermes不愛。如果你是死忠粉絲，你一定可以熟讀Hermes的專業用詞，對，專業用詞，你識幾多？
最基本的專業用詞，分為袋款、用料、顏色及呎吋。袋款如果你只識Birkin同Kelly，絕對唔夠，基本上你要認識所有袋款名稱，才足夠同店員周旋下去，否則只會很快地被紅牌出場。單是皮料，已經有牛皮，山羊皮，水牛皮，鱷魚皮，鴕鳥皮和蜥蜴皮，仲未計帆布料，假如你同店員講：「cow skin」，已經可以collect skin離場。小牛皮叫Togo、大牛皮叫Clemence，仲有7-8款牛皮等你認識，仲要全部用法文名，唔好諗住用英文就可以過骨。色款仲誇張，今年流行大象灰，你以為叫elephant grey？咁就灰晒啦，叫Etoupe；最經典的橙色，除了叫orange，仲有4款都係橙色但又叫不同名字呀！仲未計size呢？你要大定要細？25cm？30cm？35cm？
將袋款×物料×顏色×呎吋，就係你需要記得的「不能忘記的Hermes密碼」的數量，讀熟晒，辛苦過DSE考5*。
至於點應用？就真係睇你隨機應變，考通識科一樣。
不外乎同店員打開話閘子，但店員給你的每一項資料，都暗藏考驗，大概會係咁：
你：「我想要A款、B款同C款。」（A、B同C不可以係Birkin同Kelly）
店員：「只有B同C款。」
你：「D款呢？呢三個款有冇E色？係乜野皮料？」
店員可能會入倉睇睇，或繼續接你。
店員：「D款剛剛返一個帆布款，你要唔要？」
你：「帆布款比較casual，大size先襯我，係35cm？定40cm？」
店員：「Sorry，係30cm，F色。」
如果袋款適合，你可能要接受，當然，你的目標是Birkin，繼續諗辦法耍店員，搵出適合的timing向Birkin出擊。
而店員又會試探下你，到底你識幾多，係咪真係fans，可能你話要orange，佢答冇，但會同你講另一個顏色名，但係同orange好接近，如果你唔識，以為係另一隻色就弊，就俾佢陰到你。
同店員「interview」，真的自由發揮，睇你修行。不過好友的貼士，去日本買Birkin的勝算最高，至少店員不會像歐洲的不停白眼，日本店員的服務態度表現相對欣勤。另外，店員亦未必熟讀顏色及物料，遇上這類新手資淺店員，有好有唔好，你的表現有可能壓倒性KO店員，但店員的職級，未必可以拎出Birkin。如果有信心，應該越級挑戰senior店員，獲得Birkin的勝算更高。
去日本Hermes買Birkin的必勝法，上述只是證明你是fans的interview，但最重要的證明，始終都是你身上的行頭，太陽眼鏡、絲巾、手鐲、袋、鞋，從頭到腳都要進貢，就是另一個部份。
正如我的好友所言，會買會用，自自然然就會成為fans，她的道理很簡單，你只係想買一個Birkin，用炒價買，值得嗎？畀多幾萬炒價，又點解唔將呢D溢價，用來買Hermes的其他產品？當你擁有其他Hermes產品，你下一次買得到Birkin的「能力值」又會大增。
最後你或者好想知，我的好朋友有沒有放售她的「戰利品」？她能夠擁有強大的經驗值分享，因為她是fans又是用家，亦會做炒家，將三個身份合而為一，近乎神級一樣的人物。
我唯一可以幫到你的，就係將以下天書資料交俾你，其餘就得靠你的努力。
—————————————
沒有留言:
發佈留言
注意：只有此網誌的成員可以留言。