食完要減肥的名店 --- 名人坊

我拼命鑽研減肥，就是為了拼命、亡命、不要命的食食食！看來今次終於有一間食肆可以食到我怕，不為食物難食，而是因為隨時食得過多而減不了！
各位美麗的讀者，不要因為以上的說話而害怕或立即飛走唔睇，我為了這篇blog，特別在《MORE》的專欄內籌備了數篇超強、兼聞所未聞同埋相當有效的秘傳減肥法，下星期一就可以睇得到，所以今個星期，先食，再減！好嗎！


值得我如此隆重推介的食肆，絕對不是因為收咗任何著數，相反，我仲付出了許多--- 截至今晚(不計早前的)，單單這個六月份我共吃了三次，更預訂了今個星期六再食多次，變成飯堂！真金白銀的推介，不比我買化妝護膚品的錢少！


這間食肆就是由名廚鄭錦富主理的「名人坊」，他是昔日林百欣家廚，為富豪、高官下廚近30 年，有「隱世廚神」之稱，此食店更榮獲米芝蓮二星呢！

經我頻密的三次拜會，名人坊的靈魂人物富哥終於步出廚房，和我細味分享點滴，拘謹的富哥話不多，但每每細心地說出食材及烹調重點，邊食邊聽書，為食有回報啊！
富哥謂烹調的宗旨很簡單，就是用最好的食材、最講究的技巧，最用心的炮製家常小菜。


我就是為了以下呢款「花雕飛天雞」而迷上「名人坊」，真係好味到飛天！

這道菜式必需一天前預定才可食到。
特別在用上鮮雞配合花雕等醃料，先醃五小時入味，再以電飯煲蒸熟。上桌時酒香撲鼻，肉質嫩滑，秘訣很簡單，就是用新鮮及心機去煮理。
$380，係貴呀，但從來我覺得好食嘅就唔介意付出！ 

其實最先上枱是免費送的餐前小吃 --- 蘿蔔糕，蘿蔔糕大家都食得多，但三次飯局裏，我與不同的朋友來食，大家不若而同說這是「最好味的蘿蔔糕」，配上香港地道「古早味」的余均益辣椒醬，或獨門炮製的蝦籽XO醬，名人食家馮美基、葉樹堃都讚不絕口。

如果你因為驚咕嚕肉太肥、茨汁稠到好似拔絲咁誇張而唔食，咁你就要試下富哥如何煮出精彩--- 肉不肥，汁濃稠度剛好，皮脆內軟，我從來不愛咕嚕肉都為此著迷，破晒戒。

從來琵琶豆腐，超級炸兼淋上肥膩茨汁，搞到唔知似乜！我根本唔會食，但係這麼一塊冇汁的琵琶豆腐，脆而不油，炸到好似天婦羅般入口即溶，一碟八件，我一人食兩件！又破戒。

咖喱海鮮春卷同琵琶豆腐相似，皮薄而脆，其實好好味，不過我在兩者間取琵琶而輕食咖喱，怕燥皮膚會標粒粒。

驚喜之作係炸乳鴿！
十分十分迷你，但乳鴿就係要咁細隻先至好味，胸骨似軟骨般爽脆，骨肉都非常入味，嬴沙田龍華酒家九條街呀！富哥說如果一早預訂，讓他有多點時間做事前準備，乳鴿便會更加皮脆肉香！七人食飯點了五隻，我個人包辦一隻，再破戒！$60 / 隻

梅菜蒸菜芯就演繹出「食神的最高境界」！用最嫩的菜心配上最好的梅菜，冇加豉油更冇落油，齋蒸！全憑食物的新鮮取勝，梅菜的天然甜味在蒸的過程慢慢滲入菜心，食神個「掂」字就係咁寫囉！

富哥話同我哋投契，仲送我招牌蟹肉炒米粉同薑汁上湯芥蘭，蟹肉雞蛋芽菜都係我 favourite，呢道米粉勁炒時只用極少油，所以保持到爽口，啱晒如我等怕肥膩之士。

疑團：冇黃的蛋？

神奇，這一道紅棗蓮子蛋茶，當中的蛋居然冇蛋黃！心諗.....咩雞會生得出冇黃的蛋呢？
原來係用兩隻蛋合二為一：先在雞蛋開一個小洞，將蛋黃液及蛋白液倒出分開，然後再將兩隻蛋白液倒回開了小洞的雞蛋殼內，再蒸熟，咁就造出一隻冇蛋黃的原隻雞蛋白喇。
如此有心機的工序，當然值得我多寫些文字作介紹拉？
這甜品都係飯後必送的！


名人坊高級粵菜
中環九如坊3號中環蘭桂坊酒店一樓
3650 0066

———————————————————————————————————–

本週《MORE》專欄精采內容：

媲美Botox 熨平皺紋瘦面facial

做facial竟可有如注射Botox去皺瘦面的療效？

這個媲美Botox的瘦面facial叫「時光逆轉療程」，過程無需靠任何科技儀器，全憑外塗產品及技師妙手，就可以守護年輕外貌，真殊不簡單啊！敬請留意今期《MORE》雜誌內我的專欄。

微博：http://t.sina.com.cn/yokot/

http://vipblog.orientalsunday.hk/yokot/

http://yokotsang.blogspot.com/