真的走漏眼，枉我自稱銅鑼灣地膽，都居然錯過了這一間頂班的潮州菜館。
會錯過，因為位處非常唔起眼的灣仔街市內。話雖是灣仔街市，但我會說這也屬銅鑼灣區內，平時從時代廣場向灣仔方向，行過橋底、穿過街市，轉左有駒記、明記及祥正三大大排檔（呢三間的好味指數係愈「左」愈好味，只要避過頭兩間的街霸拉客，好味自動會從口入！）卻原來我一直只向左轉而沒有向右轉，一轉右在魚檔及燒臘檔中間夾住的「潮味居」，我認為他是銅鑼灣的潮菜天王！
論潮菜，駱克道「新光」是傳統之王，一味鵝頸肉已經稱霸全港，好多朋友聽我講完鵝頸肉都不為所動，因為一般人都以為頸位薄肉，似食骨多過食肉，邊度好食？其實呢度嘅鵝頸肉係起骨淨肉上，食落啖啖肉，鮮滑嫩爽！
而「潮味居」的主打必食鹵水鵝肝！肥美、滑溜、入口即溶，充滿玫瑰露酒的清香，$98六件，完全食出法式口感但潮州風味的鵝肝，太不可思議了！
我們一行四人，多出嗰兩件我都忍唔住要食埋其中一件，膽固醇果然係美味指數的最佳朋友！
另一道必點菜式係普寧豆腐，這道非常潮式的炸豆腐非一般椒鹽炸豆腐可以媲美，外脆，內裡的豆腐卻煙韌，口感非常特別。我有位朋友連續四晚幫襯「潮味居」，都例牌點鵝肝及普寧豆腐，如果唔好食，係絕對做唔出呢種非理智的沉迷式食法！
唔好以為佢係普通炸豆腐，食落就知唔講得笑！
想知一間潮菜館有冇功架，試埋鹵水鵝就知底蘊！食落味道對，上層鋪鵝片、下層是鵝肉，唔韌有咬勁、味夠濃，正！
蠔仔餅當然又係必叫之選，平時我最怕去廟街食炸厚粉脆漿蠔仔飛碟，咬落口全部都係粉漿，唔小心仲會拮損個口！呢度完全正宗，粉少，只以蛋漿及勁多大隻蠔仔煎蠔餅，睇得出非常用心！
見蠔仔餅都咁好味，隨即點多味蠔仔粥，嘩！完全對辦啦！蠔仔肥、粥底綿，湯清味濃。
豉椒鵝腸好簡單，淨係用新鮮鵝腸非雪藏已經殺晒，食落口覺得新鮮到好似剛剛從鵝中取出咁滑溜！
豉椒炒花蛤是我任性強加的，理由是「潮味居」就在街市之中，如果咁都買唔到靚花蛤就要打屁股啦！哈哈，一睇又肥又大，好食到震！呢度最出名係味菜煮，點知整錯咗豉椒炒...無緣！
甜品都唔差，點了綠豆邊清心丸，偏淡味總勝過太甜，掛住食唔記得影相。
壓軸是蓮蓉、奶黃水晶包，即蒸等10分鐘，熱辣辣好煙韌，食到咁飽都仲可以質入肚，唔好味就假！
食完 overall 的感覺係超班，叫咁多都只係$630，每人一百六十幾，十點後部份菜式仲有六折，又平又好食，唔怪得我個 friend 要連食四日，我都想快 D 翻兜！
潮味居
灣仔寶靈頓道2-16A寶靈大廈地下D 及 E鋪
2834 6669
============================================
本週《MORE》專欄精采內容：
10分鐘大眼妝戲法
以前做稿經常介紹星級化妝師秘技，講真難實踐，其實齋睇冇消化都唔係辦法，我集百家所長修煉出10分鐘「化腐朽為神奇」之眼妝，最重要係簡單易學，不受潮流規範，瞬間令雙眼無神變炯炯有神。
即睇今期《MORE》親身講解！
沒有留言:
發佈留言
注意：只有此網誌的成員可以留言。