2010年10月29日星期五

美肌、美唇嶄新玩意!

失驚無神轉凍,皮膚跟著天氣頓覺乾燥!外在保濕唔夠嘅,內在都要同步兼顧至得。
透明質酸......這水盈奧秘成分,付予肌膚水潤及光澤,近年間突然爆熱,瘋魔愛美之士。
別以為只可以塗上面,原來仲可以食落肚。
美肌新食意!
請大家估吓呢條好似膠紙嘅橙色帶係乜東柬?
雖然我係為食,但唔係乜都會放入口喎!梗係好嘢至會食啦!
「肌之子」水凝美肌棒,芒果味...tasty!每盒有 30 條  $440 (SaSa有售)
細支裝美肌水、包裝美肌粉我都食得多,呢款新推出的美肌營養棒真係很特別,每條含有120毫克透明質酸,每日食一條可為皮膚注入6,000倍水分,療程是一個月,我已經食咗個多星期,計吓數......全身肌膚咪有成 72,000 倍水分,嗱......呢 D 只係官方數字遊戲,我作為用家嘅感覺係..........
第一:超級好味,極似食緊芒果乾的味道、啫喱糖的口感,直頭有唔捨得食完的感覺!試過雪凍食仲正。
第二:遇著呢排天氣突變,作為對付乾燥,由內在吸收補水元素確是上策。食咗未夠兩星期,肌膚感覺上不會有很大轉變,食藥都無咁快見效啦!起碼皮膚呢刻與寒風交纏都無發出乾爭爭警號,相信係 work。
第三:乜都好,就係售價未夠好,如果平多兩成,呢個冬天我會日日食呀

美唇新玩意!
衫要襯鞋又要襯袋.....已變得理所當然。唇膏都要襯到一絕?無錯。呢支唇膏特別之處是專為襯牛仔布而設計,這份心思,真係鬼才 Alexander McQueen 都要向佢致敬呀!
主腦 Poppy King 是唇界之神,在過去 20年常被問到同一問題:「那種色調與 jeans 最 match?」結果衝擊了靈感,令這支  Jean Queen Lipstick 最終誕生。
Jean Queen Lipstick 含有高度滋潤成分和維化命E  $190 (Joyce Beauty)
Poppy King 的理念是「微帶橙調的粉紅色,既能抵銷牛仔布藍調,亦能令 total look 生色不少,加上恰到好處的潤澤,與粗礦的牛仔布形成強烈對比。」
我對此唇膏的構思充滿好奇心!但心諗從外表看來咪又係紅色?!原來塗上唇後真係帶微橙調,色澤很 sharp,帶水潤通透效果,我覺得除咗襯 jeans,襯卡其色 trench coat 都會好有型格!唇膏都咁有 gimmick,真係估佢唔到!
=====================================================================


本週《MORE》專欄精采內容:
“Un-makeup” look 噴槍玻璃妝

點至為之絲咁貼、紙咁薄完美陶瓷底妝?答案是“Un-makeup look”,即「化了妝等如無化過」,聽來很玄?!其實既是潮流趨向,也是化妝技術最高境界。
上星期我率先試了一款最新研發的噴槍“Airbrush Diva”,只1分鐘就可塑造 perfect skin,效果神奇,即時愛上!
想知係乜嘢神奇傢伙?請睇今期《MORE》!

2010年10月28日星期四

與最受歡迎證婚律師之約


今年4月之時,我步入人生重要階段---結婚,這種甜蜜歡愉感覺原來可以感染身邊朋友......隨即有多位蜜運多年的情侶也宣告結婚,甚至有女的被笑指迫婚。婚宴去得多,加上自己婚前9個月的準備歴程,我現在成為了朋友們的婚事專家。

昨日與Anthony 林志達律師晚飯敘舊,就由證婚說起。自從有「外賣」證婚後,就成為婚宴中極重要環節,而主持人證婚律師就是命脈,我見過說話勁多懶音、口齒不清的律師,又有目無表情神情呆滯的,甚至乎彷彿只係讀稿機器的,感覺兒戲,場面悶蛋。

而只要見過 Anthony 林志達律師的證婚過程,真摯而專業的措詞,主持大局及控制氣氛的能力,以及事前妥當的預備,這些都是造就他成為 ESD Life Top 10 證婚律師第一位!

我認識Anthony的過程也頗特別!他原先是我老公相識多年的 buddy,但話題都只是談錶論車,只知 Anthony 的職業是律師,卻從來唔知他也涉獵證婚工作。直至我2年前不經意下閱報得知他在證婚界的紅人地位,而當時我在《新假期》需要找七十二行的能人異士做訪問,得知此事自然想找他做專訪,正頭痛如何找他時,老公才彈出一句:「我一早識佢啦!」當時只係覺得世界真係細得咁離譜!

今年結婚,Anthony義不容辭調配繁忙工作,為我擔任證婚儀式。當時他排期預約要2年前,絕無誇大,在緊密檔期下,我只不過距婚前九個月才找他,自然受驚若寵,更 surprise 的是,他將證婚作為我的結婚禮物,所以昨日提及的晚飯,是我早就說過要請他的!

而這個約會就從一個大八卦開始!相信有些人也許聽過,話說今年初有一對新人在灣仔某五星級酒店擺酒,早上如常進行搶新娘等儀式,到晚宴時,新人準備播放片段時,播出的居然是新郎和伴娘的通姦片段,結果新郎勁尷尬、伴娘哭著奪門而出、現場人士目定口呆、新娘上台宣佈婚禮到此結束,來賓可繼續進餐或離開,並可取回人情。這件事連某電台DJ都有在節目中提及,我則是從某名模御用化妝師聽到這事。但重點是,個個都係話朋友的朋友的朋友告之,從來找不到擁有第一手消息來源人士,即係件事堅唔堅先?甚至我有一位 wedding planner 朋友說他認識該酒店的 event manager,只要一問就知答案,結果又係不了了之。而前晚,我終於獲 Anthony 證實是真人真事!哈,解開了一個接近一年的謎,為這個飯局揭開精采的序幕。

另有一單是婚宴酒席後新人吵大鑊不歡而散事件,事緣親戚輩及雙方父母已回家,新娘子突然說有特別節目"Party Time",原來係安排了外國女模無上裝派對,別有用心是誘惑自己老公(真係唔了解她諗乜),點知老公飲多咗膽大咗手多多,結果梗係嗌交收場,呢勻玩大咗!大家別以為呢單料係報紙早前都有賣嗰對新人喎,別自行對號入座,只可告知主角亦是有知名度的富裕人家。

可惜,還有很多精采內容都不能爆料!

以下為未婚 blog 友提供到一些特別靈感。
原來新人為了令婚禮能令來賓有更深印象或從未體驗的過程,於是產生了更多特別儀式:
1. Ring Warming Ceremony ---- 將新人的結婚戒指遞給在坐各位來賓握在手中 warming,象徵將各位的祝福注入戒指內。
2. Sands Unity Ceremony ---- 新人各握一支注滿沙粒的試管,將沙粒從試管中倒出,堆成一個沙塔代表二人合二為一。
3. Candle Light Ceremony ---- 所有來賓及新人手持一支蠟燭,從最外圍的來賓將蠟燭燃點,然後來賓們互相燃點,直至燃點到新人手中。

絕世好日
早前的十全十美結婚好日,即是10年10月10日,這個百年一遇的大好日子,原來早在三年前已經被 book,而Anthony當日共有8單證婚,結果只完成6單,咁咪得失了另外兩對新人?哈,正如我所講,三年前預約結婚,三年後已經悔婚了,唉,證明世事果真無常。下一個絕世好日就是11年11月11日及12年12月12日這兩日又會有甚麼奇遇呢?一年後及二年後我再見到 Anthony 時,再話俾大家知!

=====================================================================

本週《MORE》專欄精采內容:

“Un-makeup” look 噴槍玻璃妝
點至為之絲咁貼、紙咁薄完美陶瓷底妝?答案是“Un-makeup look”,即「化了妝等如無化過」,聽來很玄?!其實既是潮流趨向,也是化妝技術最高境界。
上星期我率先試了一款最新研發的噴槍“Airbrush Diva”,只1分鐘就可塑造 perfect skin,效果神奇,即時愛上!
想知係乜嘢神奇傢伙?請睇今期《MORE》!

2010年10月27日星期三

點破銀花玉雪春 中環白玉蘭滬菜

最近有食神,一連發現幾間高質食肆,事關搬離了我的愛區銅鑼灣,便要發掘新的用餐據點。
事緣約了大忙人----全港最受歡迎證婚律師 Anthony Lam 林志達律師,所以特登揀了間近他律師樓、又算是較近新居的中環食肆,試菜兼聚舊。
假如讀者中有將近結婚或最近結婚的,相信在揀選證婚律師時,一定聽過 Anthony 的大名,他現時的證婚booking已經排到2013年,佢貴人事忙都賞面赴約,一來他是我們的buddy(也是我們的證婚律師),二來約他只要睇通勝,不宜嫁娶的凶日就是他空閒之日,昨日星期二正是不宜嫁娶呢!
有關傾談之趣事,明天會再續;今日先講與他一起進餐、位於中環交易廣場的......
新食店「白玉蘭」
白玉蘭是上海市花,借花敬佛帶出滬菜佳餚,這店十月三日才開業由美心集團主理。
這裏有多張半圓梳化位設計,坐得舒適、食得招積!
唔單止環境吸引,餐具也講究,令我諗起日本潮牌吉田 Porter 的 logo

位處中環頂級商業地帶,裝潢格局一絕,唔好以為只係食環境貴夾唔飽,晚市四人套餐只係$798,在中環而言,價格非常吸引;當然,以我一貫的驚人食量,加上又要兼負試新菜責任,又點可以呢個價錢落樓呢!好食而動筆,特別值得。
喺呢度食飯,除了清幽雅緻,更重要是好玩,你估下呢位待應做緊乜?
揭開塊布......用銀槌仔係咁扑落去又做乜?
原來是為隻乞兒雞開封!
講起乞兒雞,真係好耐冇食過,一來製作繁複,需要預訂唔係想食就隨時有得食,對上一次食已經係好幾年前在時代廣場梁山泊(已結業),當時主角乞兒雞出場是由兩位「轎夫」抬出,大鑼大鼓,然後奉上木槌破開,旁邊用餐的鬼佬睇到手停口停,不停影相。
今日再遇,經理話當年焗雞用的石泥基於衛生問題,經已由麵包取代,但仍然保留開封精采過程,因為外國遊客好 buy !
大家估吓我拎住乜嘢?同隻乞兒雞又有乜淵源?
答案係...食完仲有迷你銀槌送作留念,目的是加深印象,突破色香味的境界!銀槌閃閃生輝,不過收到都唔知用來做乜好?
之後到干燒大明蝦($50隻),上桌前都唔知係乜,仲以為係盅燉翅,打開先知係大明蝦,手掌咁大隻蝦食落一D都唔嚡,醬汁調配得非常惹味,紅色醬汁其實係蒜蓉,蝦腸又挑走晒,去「利苑」食隻花竹蝦都收你 $98隻,呢度算非常抵食!
之後到片皮鴨($360隻),三個人食一隻,我都覺得誇張!我喜歡這裡的烤法及片法,唔會淨係得皮冇肉,上碟時既有皮也有肉,對於我從來不食皮的(怕肥膩),份外滿足。
食剩個鴨身,又點忍心佢孤伶伶留喺店,帶埋佢走送俾媽咪,咁我咪又有烤鴨粥食囉!
松子桂魚($158)也出色,並非一味炸至乾身硬脆,而是皮香脆肉嫩滑,茨汁唔稠亦不濃,剛剛好,只係嫌條魚較細條,我睇佢得12兩,待應只分到六件,每人兩件咁大把。
海蜇頭前菜係必食之選,因為口感同普通食肆的處理手法不同,「白玉蘭」的海蜇頭特別在刀章,並非將海蜇頭切粒,而係打橫切片食落去的口感便會有脆也有滑
甜品是生磨杏仁茶,杏仁磨得幼滑,但我覺得略甜,可能本身喜歡清淡,只見 Anthony 食得津津有味,他肯定覺得好正,而我還是喜歡西環正街「源記」的生磨杏仁茶......真係無人能及!
「白玉蘭」肯定會係我翻尋味之選,亦諗好晒下一次食D乜,睇相就知
食至尾聲,隔離枱有人慶祝生日,仲以為只係吹下蠟燭唱下生日歌,點知突然殺出菲籍樂手結他、小提琴伴奏及唱出慢版生日歌,嘩,lum到爆炸呀!下次同朋友或家人慶祝生日食飯,必試!

白玉蘭
中環交易廣場一座四樓(2180 7288)


=====================================================================
本週《MORE》專欄精采內容:

“Un-makeup” look 噴槍玻璃妝
點至為之絲咁貼、紙咁薄完美陶瓷底妝?答案是“Un-makeup look”,即「化了妝等如無化過」,聽來很玄?!其實既是潮流趨向,也是化妝技術最高境界。
上星期我率先試了一款最新研發的噴槍“Airbrush Diva”,只1分鐘就可塑造 perfect skin,效果神奇,即時愛上!
想知係乜嘢神奇傢伙?請睇今期《MORE》!



2010年10月26日星期二

養心安神名方 中藥醫失眠!

首先申報:我並沒有失眠,甚至乎天生體質可以一躺即睡,亦唔怕瞓「生保床」。
之但係,不是人人都可以如我「幸福安睡」!貓喵例外.....
例如好友 Miffy,無論前一晚捱到幾點,都係天光就彈起身,好難瞓番,精神唔夠仲買一送一......獲贈大眼袋和暗粒,所以佢成日會約星期日 brunch,哈哈....估到佢瞓唔著想搵人陪。
我的枕邊人更慘,生理時鐘迫令佢小睡四至六小時就會醒,上床後至少二至三小時先可以入眠。如是者為了增加睡眠質素,單係寢具都斥資幾萬蚊,買齊頂級 Tempur 太空枕頭、太空床褥,瞓上去會依照體型,塑造出零壓力承托脊椎(Tempur是唯一獲美國太空總處 NASA 認證的太空物料,美國穿梭機內的座墊、寢具都是採用 Tempur 物料製造),床單被鋪又要買 800 針或以上的布料,滑到隨時跣落床;配合埋有助入眠的薰衣草香油灑落枕頭催眠,都冇法子瞓到八小時........慘!
實情我身邊仲有大量的失眠案例,瞓得好,原來係福氣!
如是者,我向御用中醫師「萬全堂」錢太請教:有中藥可以治療失眠嗎?」結果錢太果然有計,這些酸棗仁中藥膠囊,就是對症下藥,成份全天然,不含西藥安眠成份,測試對象就係我長年累月患有失眠的老公!首次食藥時間係九月二十日。
以酸棗仁為主的中藥安眠膠囊,每晚臨睡前食三粒,可以每晚食,或者有需要時食。
現代藥理研究表明,酸棗仁具有顯著的鎮靜、催眠作用,還含有多量脂肪油、蛋白質、氨基酸、微量元素、維生素 C。

未講解成份前,先講效果......係頂呱呱冇得彈!
話說第一晚服藥,他如常在床上以 MacBook 上網消磨睡不著的時間,我就照樣在床上寫 Blog(係呀,我床頭的 32" 電視接齊電腦、5.1 Home Theatre),正當我想問佢 D 藥有冇效時,只見佢坐姿如常,但雙眼已經合上瞓著!心諗,係咪咁有效呀?咁我幫佢移番正個人,竟然都無嘈醒到,第二朝佢起床時同我講:「我仲想瞓!」睡眠過程中完全冇扎醒過,比佢平時一晚扎醒兩、三次有明顯改善,他的體驗是從沒這麼舒服過!因為這是幾年來首次瞓足八小時呢!

由於想測試藥力是一次性的,還是經調理後會有改善,如是者第二晚不服藥,結果不及第一晚瞓得好,而這一個月間是斷斷續續的食,但整體已經有好改善,至少他沒有晨咁早嘈住我瞓!

起初我都擔心,藥中是否真的沒有安眠藥成份?因為老公從來唔想食安眠藥,生怕一食上癮,以後唔食瞓唔著;但服用錢太的處方,刻意斷斷續續的食,有時一星期服一次,有時兩次,最近這個星期已經停食,都沒有甚麼不良的上癮反應和副作用,後來我向錢太反映效果非常有效,她亦坦白告知我此乃古傳(東漢年代)安眠良方,絕非甚麼秘方。

當然,每個人的體質各有不同,我老公的反應並不代表對所有人都有效,但至少膠囊成份天然,是我放心推介給大家的原因之一;其二是這次的失眠調理,經過真人及連續一個月以上測試,所有未經我親眼見證及親身體驗的療法(無論是減肥、醫學美容、化妝、食療),我都不會在 Blog 上或專欄上介紹給大家,今次大成功,所以篇幅也特別長及詳細,如果長到有 D 悶,唔緊要喎,睇到你恰眼瞓,就更加要記得臨瞓前重溫,早抖!

「養血安神,清熱除煩」服用二法:丸或湯
酸棗仁湯(台灣醫師處方)
成分:酸棗仁、甘草、知母、茯苓、川芎(劑量分別為18克、6克、12克、6克、6克)。
主治:虛煩難眠、夜寐不實、心悸盜汗、頭目眩暈、咽乾口燥,或心煩易怒。
用法:加水煎成 500 毫升,臨睡前服。
酸棗仁丸(萬全堂處方)
成份:酸棗仁、茯苓、甘草、川芎、知母。
主治:虛煩難眠、夜寐不實、心悸盜汗、頭目眩暈、咽乾口燥,或心煩易怒。
用量:每日服 1次,每次 3 粒,暖水吞服,或遵醫囑。

萬全堂
香港皇后大道中 88 號勵精中心 15 樓
電話:2525 9288


大家亦可依從個別體質,遵醫囑配合以下中藥成分:
血虛甚者,可加當歸、龍眼肉養血安神;
兼陰虛舌紅脈數者,可加生地、麥冬養陰清熱;
內熱口苦苔黃者,可加山梔、黃連;
遺精盜汗者,可加五味子、龍骨、牡蠣;
心神恍惚健忘者,可加人參、菖蒲、遠志。
=====================================================================
本週《MORE》專欄精采內容:

“Un-makeup” look 噴槍玻璃妝
點至為之絲咁貼、紙咁薄完美陶瓷底妝?答案是“Un-makeup look”,即「化了妝等如無化過」,聽來很玄?!其實既是潮流趨向,也是化妝技術最高境界。
上星期我率先試了一款最新研發的噴槍“Airbrush Diva”,只1分鐘就可塑造 perfect skin,效果神奇,即時愛上!
想知係乜嘢神奇傢伙?請睇今期《MORE》!



2010年10月25日星期一

Hair styling ....... 好玩小工具!

除咗化妝護膚品,我仲好鍾意留意髮型產品!
請大家先估下圖蝴蝶結的用途:
Bubebu 開估:「喵喵......係前髮專用魔術貼呀!」
特別為化妝時設計的「無痕瀏海魔術貼」玩意,於幾年前由日本吹遍港台,首次接觸是由星級化妝師介紹、之後見到《女人我最大》都有講,再見到通街泛濫疑似品,本以為係人都知道?原來帶領潮流之都巴黎竟然仲未流行,點解會咁講?記得今年二月到巴黎影婚紗相,設計師好友為我們搭路約當地雜誌御用 makeup artist & photographer,竟然對我帶來的瀏海魔術貼覺得很新奇!(我覺得出奇至真......)
一直用慣是平實長方形黑色,最近逛 Sasa 俾呢款花巧型蝴蝶結款吸引住,$5 / 個,有淺灰、粉紅、粉紫等等,太 kawaii 了.....真係襯唔起,所以揀唔落手,唯一是黑白波點最受落,可惜剩番 last one (CWB 羅素街間 SaSa),為了湊夠一對,我會再搵!
這個充滿 CdG 影子的蝴蝶結,比起那片像未完成製作的長方形魔術貼 fancy 得多,喺屋企都可以姿整;在洗臉或化妝時能輕易黏住瀏海,不讓秀髮掉落或捲翹,比起用頭箍和髮夾更方便舒適。
淘寶都有售,款式相同,包裝不同,除非一次過買大量先至抵,因為快遞要成 $20!
淘寶網商店
http://item.taobao.com/item.htm?id=7053690537
可愛蝴蝶結魔法劉海貼
一口價 $1,快遞另加 $20
另外,Yahoo 拍賣就搵笨,仲貴過喺街鋪賣!
Yahoo 拍賣
$6 ,郵寄平郵 $2

請大家再估下圖夾子的用途:
Bubebu 開估:「喵喵......係吹前髮時專用造型固定夾呀!」
我半年前把心一橫剪了齊蔭,依家又努力留長,尷尬期是前髮唔長唔短唔聽話左彎右曲,當我見到呢個夾之時,確實好懷疑其功效是否能達標........心想 $39啫,搏一搏也值得。
另一款塑膠製的只售 $12,我有80%相信「平嘢無好嘢」定律,加上認為金屬可更容易固定造型,所以棄膠揀鐵。
用法:洗髮後,用風筒先吹乾髮絲,然後以此小工具夾著前蔭,再用熱風直吹片刻,便可做出時興的斜瀏海髮型,再噴上輕量定型水便能 keep 得造型更持久。初用未必會成功,因為夾的上方容易令頭髮夾到起折位,使用心得是要盡量夾近髮根。
使用後,斜前髮 style 真的特別貼服,而且 keep 到一整日。相信天生髮質捲曲都很啱用!

$39 / Sasa

=====================================================================
本週《MORE》專欄精采內容:


"Un-makeup" look 噴槍玻璃妝
點至為之絲咁貼、紙咁薄完美陶瓷底妝?答案是"Un-makeup look",即「化了妝等如無化過」,聽來很玄?!其實既是潮流趨向,也是化妝技術最高境界。
上星期我率先試了一款最新研發的噴槍"Airbrush Diva",只1分鐘就可塑造 perfect skin,效果神奇,即時愛上!
想知係乜嘢神奇傢伙?請睇今期《MORE》!