在這個冬天，我這個火窩痴幾乎食勻整個港島區的火窩店，好的地方大家心裏有數，新的也食過不少，相也影了不少（錢都花了不少），但連自己也不會回頭再食的，又點可以介紹俾大家？
直至呢個冬天就快完結，先搵到一間我覺得非常滿意的火窩店，雖位於比較偏遠的西營盤，但絕對值得搭車去食！店名仲同我非常喜歡的台灣麻辣窩天王「鼎王」個名相似，係叫做「鼎煌」！
這裏的湯底選擇非常多，價錢更係大眾化，本來想點魚湯底，但第一次試食，唔知掂唔掂，唔夠點。但見到有冬蔭功湯底，定價$58，一於試下啦！
湯底上桌，一撈之下，嘩！湯料超豐富！係咁易就撈到一隻鮮蝦兩件鮮魷，個窩份量唔細，啖湯仲要好飲，湯料足到爆，超值！
其實點冬蔭功湯底配清遠醉雞，幾唔夾的！不過我鍾意食雞，冇計，照點，食落都唔差。
肥牛當然要點本地手切牛啦！佢特別在可以自己發辨揀牛的部位，我就自然揀牛頸脊，仲特登點冇咁肥的部份，雖然冇咁腍，但牛味香濃，不過我老公就嫌唔夠肥囉。
有肥牛就自然要點牛胸尖，將佢拍住肥牛一齊食，掂到暈！呢招食法係唔少「牛魔王」的指定食法，不過今次的牛胸尖切得厚得滯，食落口較韌，呢點我已經即時同對方反映，相信大家睇完去食，一定會切得較薄易入口。
碟肥牛唔夠肥，唔係對方的錯，只係我個人喜好，我老公都嫌佢瘦，自己再整碟「細牛」加肥版，成個賣相當堂配神晒，食到呢一刻佢先笑番咋！佢梗係話好好味啦！
咪以為落籍西營盤，地方會好簡陋，實情係靚裝，不比銅鑼灣的食店差。
食完仲有糖水送，原來老闆在屯門經營糖水店，每日從屯門新鮮帶來各式甜品送客，我要了紅豆沙，不錯，但當然唔夠西營盤正街的源記咁正啦！
食完已經有衝動叫齊成班 friend 再食過，咁橋三月我會搞個三十人開年飯局，咁梗係問下有冇VIP房啦，點知真係有！間房有齊卡拉OK同麻雀，可以俾大家玩到凌晨三點，打邊爐有咁豐富的餘興節目，好耐未試過啦，一於訂房！
呢間火窩店今年一月先開張，新到上openrice.com都搵唔到佢的資料，坊間飲食雜誌都未介紹過，連網上食評都未有，如果你有幸睇到我呢篇食評，肯定係全港最早知道呢間正店的人，一於先食為快！亦有好多明星已經幫襯過，包括影帝梁朝偉同劉嘉玲，證明係掂先有名人幫襯啦！
鼎煌
西營盤皇后大道西399-401號地鋪（近水街）
2151 1801
——————————————————————————————————————–本週《MORE》專欄精采內容：
遊日必掃 平價美容三寶
家陣，香港人最愛遊日韓台三地，我亦然！上月尾到日本山形縣工幹，隨後留
守東京加入激安購物戰團，指定動作當然不少得搜刮既平價又好用的護膚品介紹給大家！
詳情請留意今期《MORE》專欄。
http://yokotsang.blogspot.com/
沒有留言:
發佈留言
注意：只有此網誌的成員可以留言。