在雜誌看到介紹全港最好的台灣美食特集，當中自然有台灣牛肉麵的篇幅。一打開，不得了，將全港的台灣牛肉麵網羅，但每碗麵都有一句彈的評語，不是唔夠牛味，就係牛肉韌，再唔係就是不夠正宗。這樣的鋪排原來是被該記者搵到一間最正宗的台灣紅燒牛肉麵做壓軸，正！夠膽得罪全港台灣牛肉麵店去讚呢間記者發掘出來的秘店，我身為台灣牛肉麵痴，立即一試，寫埋食評又點話！
話說呢間「三星牛肉麵」 位於西環石塘咀山道這條大斜路的橫街內，基本上要從皇后大道西沿山道行條大斜坡上去，保證行到腳軟兼肚餓，正，餓住去食更加好味，先睇餐牌！
二話不說立即叫牛肉麵，招牌菜「三星牛肉麵」因牛筋賣晒（其實事前已經估計報導一出應該反應轟動，一早有賣晒的心理準備），便點了紅燒牛肉麵及蕃茄牛肉麵。
一上桌，唔講真係分唔到邊碗係紅燒邊碗係蕃茄，大家又估下邊一邊係紅燒？
登登登凳！我當時用口試晒兩碗都分唔到呀！原來蕃茄那一碗要搞一搞湯底下的蕃茄湯料先會變蕃茄湯，相信廚師只係預備了紅燒湯底，加蕃茄底料或麻辣而多出兩款口味。幸好，口味是正宗的，紅燒那一款的「台灣味」很夠，即是很似在台灣食到的正宗味道，反而蕃茄那一碗就稍嫌蕃茄太稠，和湯底結合後太濃味或重口味，可能同後加蕃茄湯料有關，份量調配不好就會有此情況出現。
小食方面點了滷水大腸，滷得入味，腸也洗得乾淨，是好好好味的，但後加的炸蒜可以不落啦，這樣反而太港式避風塘口味，或者應改為炸蒜另上，由顧客決定落唔落。
當然唔少得叫鹽酥雞，炸得好香口喔！油炸肥膩東西我較淺嚐，我甚至覺得這道鹽酥雞比旺角豪大大雞排更好味。
總括而言，是好味的，只是紅燒湯底真的非我口味，因為我最愛的是清燉牛肉麵，清澈的湯底沾上少許淆湯時迫出的牛肉油脂，像水一樣卻散發著濃厚的牛味，在台灣是最夯（夯是台灣潮語，即係最堅最勁）的食法，例如西門町的「牛店」就是表表者！加上台灣一年一度的牛肉麵大賽，全台的牛肉麵店傾力泡製一碗得獎牛肉麵，亦是台灣當地牛肉麵非常風行的原因之一！
三星值得一試，但我心目中被評為湯底無牛味的毓民牛肉麵及不正宗的灣仔Olala一碗麵都比三星佳。而三星也不用氣餒，看到一班幹勁衝天的年青人在廚房打併，絕對有進步空間，至少我會再來一次，看看水準有沒有進步喔！
三星牛肉麵
石塘咀保德街十三號地鋪
2866 6699
———————————————————–—————————————
本週《MORE》專欄精采內容：
一物多用 變身妙法！
得一想二，絕不為過！尤其在扮靚這一環，一件護膚品，不一定只得一個用
途，多諗便可多變，創出多功效美肌體驗，一個價錢兩種
享受，切合環保兼慳錢理念！想知我的推介是甚麼？就要留意今期的專欄內容啦！
沒有留言:
發佈留言
注意：只有此網誌的成員可以留言。