元旦日去了 Time Square “SML”倒數，企出餐廳露天位置，與蘋果「10」及「9」倒數字眼只相隔十幾個身位，近距離觀賞細型煙花爆破都幾震撼難忘，在彩紙滿天飛舞之時，朋友間祝願新一年：「唔使做、揾多D！」ha ha......
用 iphone4 捕捉歴史性一刻，效果都唔錯喎！
每次飯局上，慣性被女性友人問護膚經，這也是我吸收不同意見的最佳時機：
Janice：「我換咗用 Swiss Programme 全條 line護膚品一個月，真係滑溜咗好多，但喺最近被人話我有一條好深嘅頸紋，有 baby face都嘥氣，出賣真實年齡，點算呀？」
Nana：「你喺《MORE》介紹嗰部神級童顏射頻機係咪咁得，我都想試，但成 6 千幾银，值唔值得買呢？」
May May：「我發覺護膚品中，serum用得最快，有無平靚正推介，唔使慳住用呀？」
……
Q1及Q2我決定容後再談，想率先推介兩款平靚正精華素俾大家，只係百幾蚊支，真係當 mask 咁厚塗都唔肉赤呀！
先講啱啱於一月新鮮登場品牌-Fiorucci，大家無須起疑，的而且確係意大利 fashion牌子，撈過界美容產品剛剛在香港插旗。
40年前 Fiorucci在米蘭開設首間店舖，除型格服飾外，更有小食，播放主流音樂，係非常 hippie 嘅購物意念。
而於我腦海印象，是中學時期有份追捧的厚底增高波鞋，呢個潮流今個冬季又番兜，加多咗 trendy key item-fake fur點綴，依家路經每間時裝小店都梗有一、兩對看門口，所以話 Fiorucci係厚底鞋鼻祖！
言歸正傳，Fiorucci 入侵美容界有咩 selling point 先？我認為是矜貴法國用料但定價超親民，新系列體驗價無一支mark up貴過$138.....夠激！
第一炮共推出 6 件護膚品，入門試用首推高效多功能精華原液。( 體驗價$138 / 萬寧有售)
我從來都認同-「平嘢會有好嘢」……但比率唔高！
呢支主打多功能精華原液值得一試，集合3種美容時興元素，就是骨膠原、Q10、納米維他命C，目標抗皺、修護、均色；原價近二百元，新推出至有的 special 體驗價是$138，以掛上品牌的 serum來說真是地獄價！
招牌 logo 是一對小天使，感覺特別純樸，護膚品成份貫徹主題採用法國天然素材。
精華液質地很水感，一經接觸肌膚無須配合按摩已被吸收，絕不油膩，於冬天而言滋潤感一般，其清爽質地較適合油性肌及混合肌！由於價錢抵用，我毫不吝惜每晚作 hand cream 前打底。
心水必試推介！
相對，以下呢支serum無話題做靠山，相信亦無乜人認識，但真值得一試......
它是我這幾個月愛上的 serum，既沒華麗的包裝、沒耐人尋味的品牌故事，卻因純淨有機成分令我鍾情，每次塗上後深呼吸……玫瑰味充斥鼻腔內，非常醒神舒緩。
我覺得皮膚都會有迷茫期，即係搽極好嘢都好似停滯不前，又或者試得多新科技都想俾皮膚喘息，所以心理上時不時要用天然成分產品緩衝，呢支 serum係我 favourite item 之一：
Natio是澳洲天然美容品牌，系列中最讃是緊緻提升精華素，含有機玫瑰果油、可可巴油、維他命C，同步保濕、去紋、抗衰老。($148 / 30ml 莎莎有售)
質感厚厚的似啫喱狀帶微黏，成分天然溫和到眼部肌膚也適用。
塗上皮膚後，即時有微微減淺紋理效果，像是覆蓋透明薄膜霧化及撫平皺紋、不油膩偏啞緻質感，卻能滋潤皮膚。
這比起另一著名澳洲天然護膚品牌只係約三分一價錢，確是精明護膚之選！
————————————————————–—————————————
本週《MORE》專欄精采內容：
1分鐘甩掉頑固濃妝
我覺得，卸妝一環實情重要過化妝，否則皮膚糟蹋在自己手上，最終落得下場-暗啞、暗粒通通say hi！
上妝容易，卸妝難，尤其是防水妝品，我推介簡而快步驟、強而淨產品，請留意今期專欄內的介紹！
沒有留言:
發佈留言
注意：只有此網誌的成員可以留言。