中環「越」食之爭

我除了是火鍋痴，也是一個越式 Pho 迷，雖未至於迷到要一訪越南品嚐正宗 Pho（況且越南不是我這種購物狂喜歡之地），但香港數得出的正 Pho，不多。
2008年是香港爆發越式 Pho 潮的一個重要年份，大家爭相開設越式湯河店，但能夠成功留低至今的又有幾多？因為努力經營一個成功的湯底，不容易。
論美味，舊愛是大坑浣沙街的火車頭，可惜原班人馬移籍到銅鑼灣道越南站，連金庸都讚好，是我心目中的香港 top Pho！


卻其實，競爭 Pho 王的重要戰場，是中環，單由蘭桂坊出發，沿士丹利街及威靈頓街便有一系列越式湯河店，統統是中環上班族的至愛，我心目中的秘店是蘭桂坊橫街安和里的明珠越南餐廳，小店不重環境佈局，非常越南，但菜式正宗，湯底雖非最好，但以中環價而言，合乎「性價比」已經值得掌聲鼓勵。


新勢力是威靈頓街芽莊，中午時份長期有人龍，openrice 上的越菜評語，很多都以「如果有芽莊的水準便足矣 」  的比併食評，但我覺得「性價比」一般，除非係食裝修，才值回票價。


前天因在中環工作，和「影子伉儷」試了士丹利街品越，在中環晚飯有度好，邊度都有位，一定唔使爭，人少更覺環境舒適。

友人讚餐牌相片拍得靚，但我覺得 menu 做得靚係應份，正如化妝品的 packing 都係美妙絕輪，用落才知真下。

另一友人則發現品越是蒲和集團的分店，並說蒲和在 openrice 上的食評不太好，我說試完先講。但牆上的畫作裝飾，不俗。

仿水晶吊燈襯白木框驟眼都幾靚吖！但環境有點迫狹，很難想像午飯時段迫爆之時，人與人之間關係真係好 close。


為食兵團慣例，四個人各點四碗粉，另加五碟小菜，多角度包圍，一定試得晒大廚功力。

我點的是牛腱湯河（$42），先呷一口湯，對辦，落足牛骨去煲湯底，但我還是喜歡越南站的湯底，濃郁牛味先轟醒你的味蕾，然後啖化於冇型，清甜不嗆候，但以湯論湯，算中上。
牛腱太薄，少少韌。

朋友點的脆皮蝦餅撈檬（$45），待應說是招牌菜，的確，那份蝦餅是招牌好味，但檬卻不是，像擺了很久般沒生氣，甜酸汁也一般水準。

真正驚喜是串燒大蝦（$68四隻），先燒，起殼再炸，食得容易，因為我有時幾怕剝蝦殼又要準備代巾抹手，拎起支簽一咬落去就係肉，食得方便，又有儀態。除開才 $17 一隻，足足手掌咁長，抵！

粉卷併扎肉（$43）是普通大路貨色，但食得越菜的人多算喜歡粉卷及扎肉，一點以滿足手腹之慾，絕對可以理解，點吧，不會叫你失望的。

青檸燒豬仔骨（$98）燒得熟得滯，肉味幾乎流失，乾爭爭沒肉汁，但食肉獸朋友就話 OK，我只淺嚐，不會用盡 quota。

這一道菜上桌後，我們四個都估了一陣是甚麼菜式，答案卻是意想不到的法式牛油雞翼（$42四隻），和我們一般食開的大大不同，至少上面淋了一些醬汁，破壞了應有的牛油味，放久了，醬汁更將雞翼的脆皮溶化掉，真真正正有點失望。

較好味是龍脷魚米紙卷（$43），兩者味道夾得到，清新帶脆，魚無腥味，相信是年青人必定喜愛的菜式。

坦白講，食完真係冇乜特別驚喜，有好味的菜式，也有失望的菜式！在中環而言，食物定價算平，晚餐又唔使等位，服務也好，是個不錯的選擇，只是問到我會否再次光顧，除非有朋友強烈想試，否則在中環晚餐，未必會揀佢，寧願食明珠越南餐廳。

品越

中環士丹利街34-38號一樓

電話：2815 8863

本週《MORE》專欄精采內容：

上星期帶大家到台灣秘竇尋假眼睫毛，接著一連兩期將寶島最地道、最熱捧的必掃護膚妝品、美肌飲料、瘦身美食，逐一推介，帶路尋寶。

http://vipblog.orientalsunday.hk/yokot/

http://yokotsang.wordpress.com/

http://yokotsang.blogspot.com/