隨住我完成3個月的坐月，遇上今日萬勝節，正宗為食鬼出牢，我的食評終於回歸！
呢班為食肥妹鬼仲話The Butchers Club位置隱閉，不易找，在灣仔蘭杜街喎！
蘭杜街好難搵？呢條有名「為食街」，我人生最愛的「蝦麵店」就在蘭杜街，我又點會未聽過呢條街名呀？
開放式店鋪設計，店中鬼佬多過唐人，廣東話冇碇企，這樣的格局，未食都應該估到口味正宗。
店中名物就叫Hamburger，沒有古靈精怪的名稱，單刀直入，加上$100一個，明顯係靠實力取勝。果然，用上dry aged美國Angus的漢堡，牛味濃沃得化不開，既有肉，又有油脂。而且，為了豐富肉味的層次，在牛肉上有芝士，芝士上有兩片厚煙肉，連麵飽也是在鐵板烘至燶邊，難怪一等就是15分鐘才完成。不過，呢15分鐘相當值得，當牛味、芝士味、煙燻的豬肉味夾雜其中，我的味蕾相當忙碌呀！
炸到咁樣的薯條，我又點會食？不過身邊人好此道，唯有淺嚐一口，炸得好好味呀！原來叫Duck Fat Fries的原因，是用了鴨油去炸，所以有另一番味道。
不過此行重點，其實係呢個期間限定的「A Burger Takeover」，與名廚crossover，今次已經去到第5回，由名餅廚Gregoire Michaud設計，不設外賣，到底有幾特別？
原來係用豬肉做漢堡！事實上，上星期就係我的為食肥妹鬼好友推介話一定要試呢個漢堡飽，包我很難忘喎。的確，我不太能理解，豬肉都可以做到牛肉般香濃味道，係咪可以叫做分子料理呢？$160試一個分子料理般的漢堡，又真係幾難忘的，算呢隻肥妹鬼冇介紹錯啦！
由於漢堡飽真係好好味，我都忍唔住買多個外賣打包返屋企，當宵夜！我又為食肥妹鬼上身啦，今晚要帶埋「骷髗骨精小王子」出巡萬勝節，想知佢嘅造型，今晚留意我個facebook page啦！
————————————————————————
全新打造個人官方網站www.yokotsang.com已經面世，內容更集中，更易搜尋昔日文章及追縱美容軌跡！
沒有留言:
發佈留言
注意：只有此網誌的成員可以留言。