終於離開冰天雪地的山形縣，一切工作亦已完成，現正身處都係咁凍但至少冇落雪的東京，呢四日一於買盡佢食爆佢！
有乜戰利品暫時唔講住，反正唔會空手而回，下星期一返港後慢慢詳談。來到東京，當然要食食食啦！一離開位於新橋的酒店，就見到早前蘇民峰師傅推介的咖喱烏冬店「古奈屋」，蘇師傅把口刁到冇人有，佢推介得當然唔錯。
立即點是日推介「天使的蝦天婦羅」，講到隻蝦從自然環境中生長，品質最高兼希少喎。
隻蝦果然夠晒味，連鎖式經營但屬香港頂級天婦羅餐廳的質素。咖喱湯汁唔稠，而且冇咖喱辣味，仲可以講得上係鮮甜，去到日本必食！
古奈屋分店周圍都係，連台灣都有分店，去唔到日本，去到台灣都可以試下。
門口有晒精選推介，唔識日文，行出門口指俾侍應睇就得！
去到日本shopping的指定動作，當然係去新宿伊勢丹，全日本最潮的buyer們都被伊勢丹百貨收歸旗下，加上要去Isetan Mens幫老公入貨，呢一站絕對唔可以走雞！點知一出六樓電梯，竟然發現一條人龍出現在Godiva，有人排隊，肯定有好東西！
原來伊勢丹Godiva搞緊朱古力festival迎接情人節，仲擺晒所有朱古力味道任人試食，幫襯買朱古力仲可獲駐店朱古力師傅在盒面上簽名留念，朱古力師傅個簽名都有人要，真誇張！人龍所排的並唔係等試食，而係買Godiva × サロン•デュ•ショコラ限定朱古力軟雪糕。
有朱古力同云呢拿味，每杯要$45，絕對唔平！好在入口真係非常軟滑，7-11或麥當勞軟雪糕同佢差十倍！朱古力味仲非常濃沃，最正係筒邊薄脆朱古力，真係冇諗過朱古力碎可以咁樣加落筒上，可惜呢個奇特體驗，1分鐘就「體驗」完，再體驗就唔該再俾$45！
—————————————————————————————————
本週《MORE》專欄精采內容：
天生鬈曲、禾稈草頭髮救星
長髮伴我超過二十年，幾個女人一埋堆，常常議論我的長髮，看來漂亮迷人，皆因落足心機去打理。唉，實情一切有苦自己知，多得爸爸賜我天生髮質鬈，唯有靠後天去打救，想知我點救，就要留意今期《MORE》專欄。
沒有留言:
發佈留言
注意：只有此網誌的成員可以留言。