例如昨天我又到萬全堂搵錢太做針灸調理身體時，連負責幫我走火罐的姑娘也問道：「你隻腳瘦成咁，點解仲要做埋線減腳，你知唔知9成嚟埋線嘅人，減到似你對腳已經是終極目標！」
唉，其實大家有所不知，熟悉我的人，或同我食過飯的朋友都知，我一食就停唔到口，食量有如相撲手，假若真的喪食唔減，我驚會贅肉橫生呀！
幸好我在食物方面素有研究，其一是我極冧超酸食物，因為可以幫助腸胃消化及健脾(也許這個方法只特別fit我的體質與基因)。所以我堅持每天一早，飲佢......
自行搾一杯超酸檸檬汁加暖水，排毒兼天然直接吸收維他命C，幫助消脂和美肌。
一般方法是切成檸檬片，繼而篤爛佢；我覺得太煩喇，推介切成一半，用手搾出汁來便可，剩番個皮掟入雪櫃仲可辟味添！
又愛又恨衰格零食！
話說回來，我真係可以食唔停口，否則邊有咁多篇食評吖？
昨日，我老公因為突發工作，無啦啦去咗葵涌廣場，買了一堆「口立濕」（廣東話解作鹹鹹濕濕的醃製零食），竟出現咗我從未試過的小食，令我非常興奮。可能好些網友都曾經試過，但我可以講，這類醃製的零食，鹽份非常之高，只可淺嚐而不適合暴食，亦因為好味才會令人暴食，實在係非常矛盾的零食，總之就係一食即肥的衰格零食！
請大家估下係乜：
喬麥麵？真係好似，不過唔係，俾你估多次！
.
.
.
我鍾意用筷子食呀！
正確答案係「話梅條」！
嘩，呢個名我真係第一次聽，將一粒話梅變成條狀，點整？唔知呢。口感好似糖果屋的鞋帶糖，咬兩下質感超煙韌，直頭似香口膠，味道就似我最愛的金梅片，唔會死鹹，最正成件事唔會太人工化，仍然有天然話梅的味道。
我本來就好鍾意食話梅，每次經過銅鑼灣么鳳，例必買幾粒「話梅王」，十蚊粒都係咁買(不過水準好飄忽)。而呢包話梅片，咁大包都只係十蚊，真係平得過份！唉！就在我寫到呢一刻之時，成包消滅晒咯(內咎)，好食指數爆燈呀！
再續衰格零食！
咪以為我食晒就完，我老公又點會淨係買呢包話梅條俾我就算？！
以下零食俾我砌到成梳蕉咁，大家又估唔估到係乜呢？
就係「酸芒果條」！
每片酸芒果至巴閉係獨立包裝，感覺比以前一大樽的「條頭」衛生得多。同樣以酸醋浸製，一打開包裝，酸味四溢，嘩，正呀！大家可能以為芒果一定軟身，點知一咬落去，竟然係爽脆口感，好似食蘋果一樣，我咕應該係用生芒果去做；味道先是微醋酸(講真嫌唔夠酸囉)，之後有淡淡的芒果味，味覺層次一流！售價又係平得驚人，$10/半磅，有6片。
各路好友，唔好問我地址，我淨係知購自葵涌廣場，至於幾樓幾號店，向老公迫供都話唔記得；不過，好友們可以Whats App俾我搭單買，事關佢聽日又會去葵涌廣場，遲通知就後悔莫及了！
———————————————————————————————————–
本週《MORE》專欄精采內容：
Be a ‘Lady Gold Gold ‘ 24K純金美肌熱潮
黃金真的對護膚有成效？你也有些質疑和保留？我最初都有此想法，直至試用兩個月後，我改觀了，想知我的詳測內容，敬請留意今期《MORE》雜誌內我的專欄。
沒有留言:
發佈留言
注意：只有此網誌的成員可以留言。