一連四日的復活節假，今年選擇了留港消費，本來的計劃是到日本一遊，幾經安排，本來想要的日期訂不到機票，想住的酒店又訂不到，和旅行社幾經磋商，還未有共識時卻發生了日本地震，結果去不了，轉地方也轉不了，最後我決定在港搜尋日式美食，當係去了日本。
很多人到這一刻還視日本菜餐廳如洪水猛獸，以致我到這些餐廳都毋須等位。受輻射感染的食物，都不及大陸「食物鍊金術師」所泡製的「車胎糖」、「食死人雞」恐怖，何況香港入口食物的檢測也未致於惡劣水平，我對日本食物依然有信心的。
食物，好食才是最重要，好食得來又平的話，更加要大力推廣，因為我寧願大家夾手夾腳出錢湊好佢，好過佢捱唔住貴租結業。雖然，佢愈好生意，被業主加租的機會更大，呢個香港經濟的深層矛盾，好難明！
我只不過食了一碗$50的吉列豬扒飯，就有咁大感觸，就係以上因由。坦白講，呢間叫豚兵衛的吉列豬扒專門店，位於灣仔道近天樂里，砒鄰聲稱「座落跑馬地」、實際只係高層單位望到馬場的豪宅駿逸峰。同一碗吉列豬扒飯，去到世貿Tonkichi要$180，加一連貼士，剛好$200。四份一價錢食到「蔡瀾常去150間餐廳」的質素，是我微博的粉絲就知，當晚我已經立即寫上微博激讚！
我不吃油炸食物，都覺得呢碗蘿蔔蓉吉列豬扒飯好味得驚人，蘿蔔蓉加蔥中和了吉列的熱氣，加上我偷聽到廚房的日文對話，好肯定係由日本師傅主理。吉列皮入口即溶，但又不會同豬扒分家，火候十足，唯一係塊豬扒真係唔夠Tonkichi靚，不過我以price for value計，我老公用男性術語「性價比」計，一樣獲得高分！
我的最愛其實係呢塊「豚兵衛燒」，這類蛋燒，銅鑼灣黃金廣場的一門做得很出色，但要$80一塊，這塊豚兵衛燒只不過$38，賣相值$30，味道值$80！中間的煙肉餡料出色，外層蛋燒亦可口，抵食到爛。
然而真正令我喜出望外的是這碗「長崎風海鮮活力鍋烏冬」，份量根本係二人前，湯底用足魚湯料去煲，加上我最愛的稻亭烏冬，大食的我終於屈服在這一煲烏冬。而它的好味度直迫我在日本大阪食過的もつ鍋（Motsunabe ，音：磨諸啦be）（可到此重溫：東京大阪急行之食 飽到醉和牛內臟鍋）。
話明大食，梗係要再添食，三文魚頭燒一客賣$68，但居然有四大件，又係另一不惜工本之作，四件頭三文魚頭燒一般叫價$98-$108，你話係咪平得過份先！
呢間豚兵衛，我一定會再返食，仲諗定食乜添，就係吉列蠔配蝦定食，同樣食品在世貿Tonkichi要貴一倍喔！
豚兵衛 灣仔灣仔道221A地下 2542 0343
———————————————————————————————————–
本週《MORE》專欄精采內容：暗瘡肌膚的終極攻略
上期分享了對付至頑固荷爾蒙斑，今期到對付至惡搞膿胞暗瘡！可以點搞？敬請留意今期《MORE》雜誌內我的專欄。
沒有留言:
發佈留言
注意：只有此網誌的成員可以留言。