Yoko Tsang 香港美容及食療專家: 米芝蓮一星的故事---MIST

做香港人很幸福，一街都係美味食肆；在香港經營食肆也很光榮，因為做得好，就有機會榮登「米芝蓮星級推介」！
當我知道有一間拉麵店榮登2011年香港區米芝蓮星級食府，仲以為係中環排晒隊的豚王拉麵，卻原來係一間銅鑼灣的型格小店「MIST」獲得一星推介！

這是正宗的鹽味拉麵，圖中是半份，點一客的份量唔止咁少！

早在上年尾當MIST剛開業時，我已經食過一次，當時打著來自東京表參道山拉麵名表MIST的牌頭，拿手的是鹽味及味噌拉麵。這股清新口味在港不易嚐到，但我也認為非普羅香港人可以接受，很多人歸咎價錢太貴，$100碗拉麵喎！份量還十分精緻呢！但我認為這非主因，事關香港人其實係最愛豬骨湯底，你睇所有東京旅遊天書都推介大家食新宿歌舞伎町的博多豬骨拉麵，親身去過更誇張，整間店的中日顧客比例係10:1！在港做非豬骨湯拉麵，是挑戰！

亦因為MIST的堅持，獲得一星也實至名歸。當然，一星之名並非全因拉麵，MIST也經營和式食事料理。後來機緣巧合，認識了MIST的老闆Christalbel，如今榮登米芝蓮星級食肆主理人，立即約她再試MIST，分享她的喜悅！

真愛留住日本大廚
Christalbel本來係廣告人，重金禮聘日本大廚來港獻藝，我最擔心萬一大廚走佬，間鋪點算？點知Christalbel輕描淡寫地說：「開店不久，大廚戀上女侍應，現正打得火熱，想返回日本都難！」哈，有真愛留住大廚個心，拉麵肯定好味啦！
當然，以上只係講笑咁講，其實榮譽感才重要，試想想，在日本做得再盛名，都未曾被米芝蓮喜許，今日在異鄉成名，仲要係國際間最最最最最重要的榮耀，睇怕大廚要在港落地生根啦！

米芝蓮食客似FBI
其實我最八卦Christalbel出書前知唔知自己被選中成為米芝蓮食肆，這個謎底亦被解開。原來在某日，一位洋人男顧客光臨，飯後對侍應說想認識MIST的老闆，並表示自己是米芝蓮的人，當時Christalbel還以為是輪胎公司的職員。後來該洋人迅速在衫袋內取出米芝蓮證件........揚一揚就放回衫袋內，仿似一個FBI探員，之後Christalbel才如夢初醒。期間想請對方喝杯飲料，洋漢立即晒手擰頭，表示不能接受，否則會被視為受賄。
直至出書前，米芝蓮方面向MIST索取店相及食物相，Christalbel做印刷業的丈夫就直覺地認為應該入選了，事關需要時間排版印書嘛！當然，米芝蓮方面亦沒有明言會否入圍，Christalbel要直到出書當日，接獲記者來電告知成為一星級食肆，才發現夢想成真，當街哭了出來！

米芝蓮級和食事晒冷
睇了咁多字，目的係吊下大家胃口，以下就是我當日的試食菜式：

MIST獨創拉麵壽司，以拉麵代替壽司的飯糰，難度是將拉麵卷成飯糰狀而不散開。雖是放在匙上，但用筷子夾都唔會散，中間的海膽拉麵壽司，更係十分新鮮！

煙熏豬腩肉及豬肩肉，後面四件係豬腩肉，前面一大塊係豬肩肉。肩肉嫩滑，但不及腩肉的入口即溶。當然，腩肉的肥膏係嚇得我一陣陣，我怕肥，只輕嚐，但腩肉真係比肩肉佳。

焗三菇上的粉末是麵包糠及豉油粉，麵包糠大家聽得多，豉油粉係將頭抽製成豉油磚，之後磨粉而成，口味非常特別。

這個是季節限定的柚子拉麵，以柚子製湯，果味濃沃，最佳是採用十一月份的青柚子製成，現在已經過了時節，要到下年十一月才有。而最新消息是，MIST經過一整年的調配，將於月內推出豬骨湯底拉麵，到時一定要再試！

成名都要保持質素
這次的食評寫咁長，原因是我眼見很多好味的食肆，往往被大眾傳媒推介後，因蜂湧而至的顧客而手忙腳亂，結果拖夸了質素。最新鮮的例子是豚王拉麵，在微博效應及TVB《為食一條街》介紹後，雖然每日限售二百碗以保持質素，但大廚看見街上的長龍、心中又想盡快滿足等候的顧客，而且每日都似做極唔會停唔會完，大廚都係人，都會累，多用心都好，質素自然比輕輕鬆鬆地做略差。近來有好些朋友對我說豚王不是想像般好食，第一，他們期望過高是主因；第二，我說大廚不是機械人，叫你每日返工不停淥二百個麵，你捱得住一個星期唔辭工已經偷笑！
又例如我最愛的銅鑼灣登龍街新翠華煲仔飯，主理煲仔飯的朱師傳是我老公的廿年老同學，八、九年前第一次食，的確驚為天人，是世間最好食的煲仔飯！後來日漸成名，每年冬季，看他一人獨力支撐眼前二十煲煲仔飯，煲飯動作仲快過玩《Cooking Mama》，雖然依舊美味，但驚為天人的感覺已經失去。（順帶一提，朱師傅已經在筲箕灣開店，叫紹華小廚。）
所以我最希望MIST可以保持質素，不要因手忙腳亂而影響質素。