之但係，最多讀者朋友的問題，都係去日本有乜好做，其實自己久別東京三年，剛過去的這一次日本之旅，真的冇點計劃過，連買旅遊書都冇，所有地方都係即興就去，見乜食乜、見乜買乜，plan？好在身邊人係日本通，我先咁放心咋！
首先講食，我很喜歡新宿的百貨公司，近期必行的就係位於新宿JR車站內的Lumine EST，最潮的店都在這裏。通常我和老公會兵分兩路，佢行新宿Isetan Men館，我行Lumine EST，再加對walkie talkie，約定個時間會合，再加walkie互通位置，再見面都不知幾咁易。有時我自己會找間食店坐低等佢，所以Lumine EST地庫B2的下午茶店HARBS就係shopping後最佳集合店！
這裏的士多啤梨蛋糕，只可用怪你過份美麗來形容。
所以條人龍都誇張得好犀利，今次時間太趕，等唔切，唔食咯，不過可以介紹給大家認識一下，下午茶都係浪漫，只要你肯等。
食唔到士多啤梨蛋糕，不如試下窩夫，就在新宿車站南口出口處，就有一間Mr Waffle，又係排晒長龍。我對日本的人龍店情有獨飪，有人龍就代表受歡迎，是鐵一般的定律！
行埋去一睇，真係口水都流埋，有原味、朱古力味、杏仁味、蘋果味，加上香噴噴的窩夫味，用個鼻聞一聞都知道所在地！
我自己就揀了原味同朱古力味，以朱古力味略勝一籌。不過，買的時候要留意，因為以外賣店形式經營，當你手指指話佢店員知你想要邊款同幾多之後，佢又會用一大揪日文問番你轉頭，點算？其實佢一定係問你，宜家食？定係帶走返屋企食？宜家食，佢就會俾你新鮮出爐熱辣辣窩夫，返屋企就會俾凍了的等你返屋企翻熱。我們遊客當然揀即食，你只要答店員「Ima Taberu」（音：衣麻他啤lu，解作立即食），新鮮出爐窩夫等住你！
買方面，新宿的店鋪都係日本連鎖式經營的品牌，所以我不特別介紹給大家，反正靚，但不便宜，只要根據自己的個人口味選擇就可以啦。所以要搵特別東西，一定要去原宿。搭JR去到原宿站，記得搵竹下口，一出就係竹下通，沿竹下通直落，兩旁小店多不勝數，一定滿足到你的發掘心理。
落到最底，有條大馬路，過對埋馬路，行入條小路，就到達大名鼎鼎的裏原宿，以前屬於日本潮流發源地，今日都係，不過已經由寧靜小區變成特旺遊客區，小店林立。今次令我大手購物的店，係一間帽子屋Polcodot：
簡單咁講，店內的帽款，在香港真係搵唔到，顏色、型狀都非常特別，不要睇下圖中三款好似好平常，全部都係特別剪裁，不規則帽型。我最欣賞店員的認真配襯態度，當你見到頂帽，唔知點戴同點襯，記得問店員，佢地會好認真咁幫你襯，又教埋你點戴，雖然你唔識日文佢又唔識中文，但身體語言做配襯，大家一定可以互通！
行足成日，食埋晚飯，又點會就咁返酒店？香港人通常去遊戲機中心打下機夾下公仔，又酒店同夜店，冇日本人帶路又唔識點去，咁就不如去日本宜家非常流行的飛鏢酒吧，有飛鏢有桌球，嘗試過一晚日本人的晚間娛樂，氣氛不錯的。我介紹這間位於涉谷道玄坂Uniqlo店樓上的BAGUS！（就在109左手邊斜路直上就係啦）
電話：+81 3-3463-6669
————————————————————————————————-
本週《MORE》專欄精采內容：
攻日搜刮新發亮美容＜妝品篇＞
想睇東京購物最新資訊，除了我的blog，仲有我的專欄介紹。今次我想講，日本的睫毛真係頂呱呱，好過韓國同台灣的不知幾多倍！想知有幾好同去日本邊度買得到？請留意今期《MORE》雜誌內我的專欄。
沒有留言:
發佈留言
注意：只有此網誌的成員可以留言。