Yoko Tsang 香港美容及食療專家: Hello Kitty煮中菜

2015年4月29日星期三

Hello Kitty煮中菜

我好鍾意睇東方新地娛樂版（並非擦鞋，連東地娛樂版總編都讚我「嚴重熟讀東地內容」），特別鍾意睇明星由邊間餐廳行出來，我就好想去這些「星級餐廳」試下。
最近舒淇都拜會過全港第一間「Hello Kitty中菜軒」，Hello Kitty煮中菜？繼cafe同拉麵之後，終於有一間我想食的Hello Kitty餐廳，一定要試啦！

店鋪設計係走「日式中華料理」風格，位於佐敦官涌街市旁邊，泊車好方便。

Hello Kitty粉絲睇見個餐牌一定好開心，以Hello Kitty大頭做的流沙包、馬拉糕、蝦餃，睇相已經好想食，實物又如何呢？

好似有靈魂一樣呀！眼神交足戲，仲好好味呀！

另一個招牌菜係Hello Kitty蘋果雞絲飯，招牌原因當然係個「貓頭飯」，印象非常深刻，因為相機食到好飽之後先有得食，加上蘋果係Hello Kitty最愛的食物，仲將雞絲汁放入挖空的蘋果內，我覺得似中日fusion菜。我會建議唔好等相機食先，會好食好多，因為呢個炒飯「相機食得太耐」先到我食。

平心而論，每一道菜都要加入Hello Kitty元素係冇乜可能，店內印上Hello Kitty樣的餐具都可以獨立發售已經係對粉絲的最佳消費籍口，所以我都希望將注意力返回菜式上。
頭盤的驚喜係脆皮牛展，脆皮炸牛腩我食過，換了做牛展真係第一次，驚喜在於面層爽脆牛展煙韌。

「笑哈蝦趣味」將鮮蝦用三個形式處理呈現，XO醬蝦球的XO醬係當店師傅每日新鮮炒製；豉油皇大蝦就因為隻蝦夠新鮮，令豉油突顯出蝦的鮮味；百花釀油條將蝦打成蝦滑再油泡，證明餐廳不是單單只有賣相，廚師都有一定功力。

菠蘿咕嚕肉在Hello Kitty中菜軒就會變成「蘋果咕嚕肉」，特別在蘋果經拔絲處理過再炸，炸完之後同咕嚕肉好似樣，有一種唔知自己夾到肉定蘋果的驚喜。

炸子雞完全不會同Hello Kitty扯上任何關係，難道要刻意改叫「炸子貓」？不過我只想講，他們正正經經的中菜都有相當功駕，炸子雞皮脆肉嫩，至少不是over done。

撇除所有Hello Kitty的叫座力，真的為中菜軒的菜式評價，算是相當有心，繁複的心機小菜都有供應（單是Hello Kitty點心已經相當費神），杏汁豬肺湯（上圖）這些好多菜館嫌洗豬肺麻煩不作供應，中菜軒也一樣有；疏菜從本地有機農場入貨，食材上肯花心機，定價也不是過份進取，無論是否Hello Kitty粉絲也都照顧周到。