點知，一覺醒來，頭痛得瘋了！
那是一種前所未試過的爆炸式痛楚。
陪月早就同我講過，切不可被風吹到身上任何部份，我亦將房間冷氣的送風口固定了一個不會被吹到的角度。但多手的老公，按了遙控，變回swing！結果冷氣全晚吹著我的頭，陪月估計我是中了頭風。
「係咪核爆咁痛？」佢試圖用幽默減輕我的痛楚，但我心中只說了句：「不怕神一樣的對手......」
好，既然搵出病因，一於對症下藥，陪月姐姐立即說幫我煲驅風茶，不過家中無材料！這個驅風茶，需要茯神、天麻、白芍、南棗、川芎、白芷，家中除了南棗，甚麼都沒有。當時是早上八點半，好多地方都未開工，突然醒起相熟的海味店已經開門，立即打電話求救，因為我記得他們講過，可代購基本藥材。幸好不負所託，由於他們不是藥材店，我要的東西都最少要買一斤，但更好的消息原來仲趕得及宅急便速遞的收件時間，結果經HSBC網上過數後，立即付運，結果下午三點立即收到，效率驚人。
講番呢個驅風茶，唔單止產後婦女適合，連經常頭痛發作的普通人也適合。我記得細個讀書頭痛發作，媽咪都會煲川芎白芷魚頭湯，都是治頭痛的湯水，所以我一見到川芎同白芷，肯定同頭痛有關。
材料（一人份量）：茯神一兩、天麻五錢、白芍三錢、川芎三錢、白芷三錢、南棗一兩。
做法：將所有材料洗淨；將五碗水煲滾，放入所有材料，再以大火煲至水滾，後轉細火將五碗水煲成一碗即完成。
注意：上述材料除南棗外，必需用熱水先浸15分鐘，洗淨藥材上的硫磺才煲，否則碗茶會好酸！
一碗獨家一人飲用的驅風茶就是這樣的。
所以話，產後真係要小心，因為有好多禁忌要留意。唔怪得之陪月千叮萬矚出街唔可以亂吹風，長袖衫長褲係必需，最好加條頸巾，仲一定要戴帽。因為碗驅風茶材料未到之前，我已經要帶BB去兒科醫生度覆診，34度高溫包到自己成個稯一樣......
不過又學識煮一個驅風茶，正宗經一事長一智，豬一樣的隊友都可以係有貢獻。
—————————————————————————
沒有留言:
發佈留言
注意：只有此網誌的成員可以留言。