選址真令人頭痛，首選環境靚及香港區，是希望屋企人坐得舒適及方便前往，然而，即使中高價食店食物質素往往於當日低於正常水平。
就以剛剛的父親節為例，到了銅鑼灣Time Square「聘珍樓」，到達始知menu只限一張A4紙，只得十多款餸及海鮮，選擇少都唔緊要，更失望的是八成味道差，就連馳名的叉燒亦非常嚡口，乳豬漏單，經多次催促結果食晒收埋碟至「壓軸」登場，最後收費也出錯，服務員告知賣晒的一款餸菜，也照算在內。7個人埋單2千幾蚊，我希望回報不是如此呢！之後轉移到「聰嫂甜品」食杏仁豆漿芝麻湯丸，正呀！
唉！下次節日有咩好揀呢？大家不妨推介我好味食店！
父親節第二天，再帶屋企人試新菜，是2月中才開業的「霞飛會館」，位於中環Coach上一條街。我的評價是高達90分，短期內必定再幫襯呀，早知book呢度做節就皆大歡喜啦！
「霞飛會館」店名由來？
「霞飛」是舊上海法租界時尚名人留連的街道；「會館」則指志同道合的人聚集地方。
這食店就是讓喜歡上海菜的人聚首一堂。
「霞飛會館」是尖沙嘴K11「霞飛點心拉麵」姊妹店，餐廳裝潢走摩登高級路線，
價錢卻只是中價，因為好味更覺抵食。
一講起小籠包，難免會同鼎泰豐做比較，通常輸多贏少！今次居然例外，媽咪第一句居然係話：「好食過鼎泰豐！」我心諗：「勁過鼎泰豐？邊有可能！」點知霞飛會館居然將不可能變成可能，鼎泰豐的小籠包皮煙韌得像橡皮糖，雖然夾極唔爛，但有點假；霞飛的皮終於似番一張麵粉皮，湯包內肉汁更是十分豐富。這前菜足以令我對這餐飯極有信心！
酒糟蝦雖然是前菜，但用的是中蝦，兼且肉質彈牙喔！
單是用料已經講究，還有酒味剛好，不嗆。
馳名炸蝦球內有乾坤，釀在中間的是雞湯！用口用力擠破絕對有《食神》的爆漿效果，一定要小心，但雞同蝦的味道居然很夾，麵包糠炸得入口即溶，功力猶在！
脆鱔是蘇絲黃強力推介的前菜，並說炸得條條分明世間罕見。
以我不吃煎炸食物的人來說，確係可以吸引到我食兩條咁多，
我就覺得脆鱔永遠都是炸得太勁的食物，連鱔的水份都全部迫出，變得似條炸蝦條囉！
燻魚和我剛在上海吃的頗有分別，我在「福1088」吃到的是乾身、香脆、煙燻味清淡、魚身肉味濃。上海的朋友說，試過一定會對煙燻魚改觀。
而這裏已有七成火喉，魚身滑溜，我只嫌它炸了都有點腥。
全晚最驚喜是這味酸菜桂魚片，酸味不過火，反而吊起魚的鮮味！
最欣賞是墊底的芋絲，把湯頭的精華吸收，高纖維既健康又好味。
全條魚起晒片，骨都冇條，男性都肯食！
紅燒元蹄好多地方都要早一日預訂先食到，在這裏居然即點即有，證明廚師早有準備，
一早掛乾元蹄，以備隨時烹調。所以我冇預訂都食到，已經非常抵讚！
其次係味道具層次，肉質滑而有咬口，送飯一流，連伴碟的青菜都揀過冇渣，夠細膩！
糖醋豬柳是意外收獲，因為原本是點糖醋排骨，但上了豬柳。
但好吃的餐廳就是有另你驚喜的魔法，雖然錯了，但豬柳啖啖肉冇肥膏，已經揀得夠仔細。我終於真正可以食到酸到眼耳口鼻走埋一齊的感覺，我嚐酸，可想而知我幾咁鍾意。
杏汁高力是否高力豆沙的變奏？其實做法是麵飽包住杏汁再灑上糖霜，可惜麵包太實、杏汁太少、唔夠勁熱，早知唔浪費quota啦！食完像flash memory一樣一閃即逝。
埋單價錢非常合理，六大一細以中環來說非常抵食！
其實仲有5款餸菜無分享--冰鎮芥蘭螺片、素鵝、花彫雞.....
我同老公兩個人去鏞記埋單都要一半價錢，所以我的中環飯堂要轉去呢度咯！
「霞飛會館」
中環德己立街1-13號世紀廣場4樓
2522 7611
2522 7611
——————————————————————————————————————-
本週《MORE》專欄精采內容：
懶人喜訊 消脂減肥貼
上年夏天，我介紹過一款天后御用的減肥貼，非常受歡迎，可惜代理在補貨一次之後，居然沒有再返貨，一件好的產品就此在香港消失。終於我發掘到更佳代替品S.O.S.Patches Plus燒脂瘦身貼。詳情請留意今期《MORE》雜誌內我的專欄。
沒有留言:
發佈留言
注意：只有此網誌的成員可以留言。