2014年2月10日星期一

懷孕後體會

每位懷孕媽媽心願都很簡單,只希望生個健康的BB就已經心滿意足。
我自己又何嘗不是?每一次產檢、照超聲波、驗血、量BB長度、度BB頸皮、睇下BB有無鼻骨等等,都好似人生一個個重要關口,坐在醫生面前屏息以待,只希望上天能給予一個好消息。感恩,每次都可帶著微笑步離診所!

現在只等最後的BB結構檢驗,便可以安心等待新生命面世了。

講起產檢,每個媽咪朋友好緊張分享自己的經歷,我相信因為有經驗的媽咪都希望將自己的親身經歷分享,期待新手媽媽好友一切順利。各位好友的心意,在此先一一道謝。但有一點我又很奇怪,每一位朋友都問我等睇醫生(產檢)時等得耐唔耐,而我都係答:「好準時呀,最遲嗰次都係等十分鐘之嘛!」嘩,你睇個位醫生好貴呀?「唔知喎,最貴一次照超聲波加驗血係千零蚊。」
朋友話邊有咁準時呀?就算有預約,次次都要等個幾兩個鐘先有得睇喎!「真係無等咁耐喎,何況我老公都無咁好耐性陪等啦。」

而我位婦產女西醫真係咁喎,每次上去都只得兩三丁client添!後來再同多幾位媽媽朋友講起,都話冇可能唔使等就有得睇,我先知道睇產檢係咁誇張。可能我位婦產醫生唔係坊間星級名醫呱?呢位女西醫係我御用中醫萬全堂錢太介紹的,佢只係話呢位女西醫「好有經驗,不過年紀有點大。」我反而覺得咁咪仲好,即係好有經驗,應變能力高?!如果係六十年代港大醫學院畢業,就更加係香港精英,絕對值得信賴添啦!

可惜,我呢一個見解並未獲好友認同,再聽多幾個,更覺香港好似只有「兩位」婦產科醫生,其他都不入流!當然,我絕對相信有一位好的醫生跟進自己個案,一定會倍感安心,但太側重於某一兩位出名名醫,而忽略了其他醫生,甚至口脗有點猜疑他人專業性,就未免那過,似是羊群效應了;像現在這般,舒舒適適不用我及老公久等,同時又得到足夠的照料,起碼每次產檢也有充足時間,我滿意啊!

反而,大家在討論應順產還是剖腹,才是一個各有千秋的話題,總之各有好處亦各有缺點,如康復快慢、是否願捱陣痛、迷相擇個吉時......所以到這一刻,雖然已經訂好心儀醫院,但仍未確實到底順產定係剖腹好呢?

還有一個我有點不明的習俗,不妨和大家討論一下,到底懷孕初期,是否要等BB足三個月才可以公佈喜訊?否則BB會小氣?
我一心希望BB平平安安,故此隨俗也無妨,何況等三個月才公佈亦沒有甚麼壞處,所以都係照足習俗指引。不過,我同期有位ABC媽媽朋友,早我兩星期懷孕,在確定懷孕時,已經早早公佈。因為她在北京工作,當地婦女一懷孕便急不及待告知全世界。那麼,顯然呢個習俗並非全國性,只限部份中國地區,以我所知,台灣都有此禁忌。
怎樣也好,總之懷孕後始深切體會到種種事情,嚟緊還要研究奶粉、尿片、嬰兒車、床仔、營養品......仲有迫切的陪月員,oh...呢件事已經困擾我,稍後與大家再談。

在此,特別多謝長期支持我網誌的讀者,自從我將懷孕開心事共享,收到很多衷心祝福,原來透過文字大家也可相處如朋友,確是我呢幾年勤力寫blog的最大回報!


——————————
本週《MORE》專欄精采內容:
人節 瘦身美唇解碼
今年情人節與元宵佳節同日,別具意義,將至有什麼要準備?浪漫節目留待男士策劃驚喜,身邊女性朋友就最著重赴盛會前三件事-均稱身段+豐潤嘴唇+性感裙子。怎樣做?
請留意今期《MORE》雜誌內我的專欄

2 則留言:

  1. 懷孕三個月前公佈會令BB小氣,我覺得在中國文化是迷信之談;但因為懷孕頭三個月是會有很多變數和不穩定,容易陀不穩,所以為免令親人失望,還是在懷孕三個月穩定下來後再公佈,就皆大歡喜!

    回覆刪除
  2. Yoko, 可否給我婦科醫生的資料呢?

    回覆刪除

注意:只有此網誌的成員可以留言。