務必拯救！頻臨結業的勁好味日式燒肉

香港地做飲食業生意，真係幾矛盾，唔好生意就驚捱唔住貴租，好生意兼又多傳媒介紹，又驚俾業主狂加租！
畀著你做食肆，位處銅鑼灣，星期六晚上黃金時間，居然出現以下場面：

細個讀書學過，呢個情況可以用「門可羅雀」去形容！
冇人幫襯，並非食物難食，反而係食日式燒肉，不過主力燒內臟，而且我個人認為好好味。

店名叫 「博多一丁目Holumon」，同大家常見的日式燒肉大有分別，一來主力食內臟，兩來同普通燒肉店的分別係用慢火燒，燒件肉都要一段時間先會熟。Holumon燒近年在日本大行其道，因為食燒內臟的話，價位平過燒肉，二來慢火燒，即係要食好耐，放工用來kill time真係一流。

睇睇牆上的日本人留言，就知佢好受日本人歡迎，事關Holumon燒在香港真係好少見，印象中我係第一次遇到添！幾年前我去日本，首次遇上Holumon燒時，一個炭爐放幾塊唔著火的炭，叫極加炭都冇火，都唔知係咪路。Menu上就話牛有四個胃，每個胃都有唔同食法，於是叫晒四款，真係好好味喎，自此又學識一樣日本文化食物！

入番正題，我幫視過呢間「博多一丁目」兩次，兩次都係咁少人，每一次以為自己誤憑賊船，點知係又平又好味；第二次就擔心，咁好食都只係得咁少人幫襯，萬一執笠，又少個秘店推介！話晒銅鑼灣人又少又好食又平，真係好難得！

最後，我都係決定公諸同好，大家夾手夾腳夾埋錢湊好佢，等佢唔好結業，話晒佢已經開業年多，唔夠一年就租約滿，我都想佢生意好轉，捱過新租約！

雖然內臟先係主打，但既然有肉揀，又點可以唔叫，呢個牛肋骨，油花分明，邊位肥，骨位脆，必點！

要燒到滴晒油先有咁好火，呢個時候就要趁機燒埋其他食物，打鐵趁熱。

燒三文魚腩就直情罕見啦，又肥又好肉，燒到6成熟，超滑，充滿油香，又係推介之一。

慢火燒雞翼，皮脆肉爽，仲唔怕燒爛埋雞皮，平時個個用猛火燒，皮熟肉唔熟架！

如果用慢火燒，就可以試下厚燒，又係平時的日式燒肉好難遇到的燒法。

呢度仲有我另一至愛，日式內臟鍋「Motsunabe」，又係地道日式而香港少見的食品。食晒D內臟再加烏冬撈埋個湯底，正到暈！之不過，我中途顧住睇火、又掛住食肉，搞到個窩嘅牛腸滾得好韌，咬唔開！

睇埋張單，四個人食到水蛇春咁長張單，除開每人先至$361.25，銅鑼灣消費加如此食量，抵到爛啦！

老實講，呢間餐廳雖然係正，但真係未必適合大部份香港人口味，否則唔會「門可羅雀」！但當你可以了解到呢個食法及其文化，其實係可以一試，最緊要你知道佢係慢燒，火爐的出火位係被一塊鐵片蓋住，隔一隔熱力，就係慢燒的要訣，當你了解埋份精神，加上食物質素同價錢，如果唔係驚佢執，真係唔想介紹俾大家架！

博多一丁目

銅鑼灣駱克道491-499號京都商業中心9樓

2892 0362

——————————————————————————————————————————————————

本週《MORE》專欄精采內容：

劃時代技術 染髮媲美焗油

嶄新染髮技術登場，染後髮絲閃亮光澤、超級順滑柔軟、水分充盈，不但無損，甚至靚過未染之前，既有出「色」效果，更等同特級焗油的修護，點解咁勁？請留意今期《MORE》雜誌內我的專欄。

http://vipblog.orientalsunday.hk/yokot/

微博：http://t.sina.com.cn/yokot/

http://yokotsang.blogspot.com