2013年7月18日星期四

實證冧爆「女王自拍神器」！

數碼世界的頂級潮物---Casio自拍神器TR15，仲要係至渴市桃紅色，在上個月初售之時，我已嘭嘭聲收歸旗下！

外表索到吖！So sweet!

有幾吸引？我在Facebook page告知實物已在手，留言一大堆「好羨慕」、「好想要」、「你就好」、「炒到癲」.......

去到日本，Casio自拍神器TR15大派用埸，
因為頭兩日只得我一個人咋，
留倩影靠自己；為咗呢張相，至靠人哋！

對於女讀者，Casio TR系列自拍神器，幾乎無人不曉；反而甚奇怪，對數碼產品理應比女士熟悉的男士們，竟有不識自拍神器為何物。
事緣，上星期我出席好友Alex的生日派對，主題是街童潮拍，人人自備一部相機，喪影！我當然帶備自拍神器出席啦，果然，神器一出，女士尖叫，男士詫異，點解一部普通DC仔，甚至誤以為係手電添，佢哋質疑自拍神器點解有咁大吸引力？
除了全桃紅色機身，他們難以想像女士愛爆原因。

其實原因好簡單，男士只會對非常專業的相機感興趣，例如生日主角Alex，搞呢個「街童潮拍」主題背後目的，係要俾位另一主角出埸，他最新入手、價值$12,000的Fujifilm X-Pro 1相機，我除了聽到「識貨」兩字此起彼落，真係聽唔到在場男士有其他形容詞去形容呢部機，我都有興趣了解過萬銀相機有幾勁同點樣勁 ！

大家睇相，唔講又點會留意到係我自拍呢？！
Angle完全是自己最喜歡的，掌握在自己手裏！

拍攝前後景深表現在水準之上！

我部自拍神器點樣勁？相信我形容DC相機的能力，應該不比男士們差。
如果講拍攝質素， 自拍神器只屬合格的DC仔，冇得操控鏡頭zoom（只得數碼zoom），閃燈只係LED燈仔（同iPhone一樣），男士們話同電腦芒頂上支webcam仔一樣之嘛！
咁我好想講，如果買齊最貴最頂級的攝影器材，係咪可以變成攝影大師？
影相要講構圖，冇美感冇角度冇意境，即係普通相。
我記得當年狗仔隊影了一張張國榮世紀拖住唐唐的偷拍相，雙方拖住加上哥哥回相輕蔑攝影師的眼神，一張相就係一個故事，俾你用Leica M8影一萬次都未必捕捉得到，所以相靚同相機級數不成正比！

自拍神器正正係方便我搵出最佳拍攝角度的DC仔，擁有最佳拍攝角度，就可以得到最佳的構圖，拍出來相片特別有感情。相機被數碼化，最大優點係拍攝不再受限，傳統相機要透過觀景鏡取景，一定要將相機擺在眼前先可以睇位影相，邊似現在，用單反都可以將部機擺正丹田影o靚模，高低炒盡所有角度！
自拍神器正正用盡數碼的極限，影人可以用不同角度，毋須將自己肢體扭曲，只須將機身架270度任意旋轉扭曲，就能夠搵到理想角度，拍攝時都可時刻保持住女士的優雅姿態。

【相片來源---club.china.com  /www.gucheng.com】

睇住個芒就捕捉到最佳角度，步驟簡單卻幾乎完美表現！
難怪微博紅人郭美美，都被網民評「因為自拍神器而成為上鏡靚真人醜的最佳示範」；用自拍神器自拍就等如照鏡一樣，睇住個芒擺到最靚角度，一按就留'chok倩影'。
-

而我，則非喜歡自拍而愛上，是方便工作，其270度扭動模式，加上鏡頭有21mm wide，自拍的廣闊程度，尤如有人幫你影相一樣......
我最近去日本要影相寫美容專欄，全程只靠自己，
但相片就好似張張都係由其他人幫我影一樣。

自拍預備脫唇毛，先消毒呀！

而我平日拍攝一些示範美容療程的相片，9成是自己揸機，無望鏡頭齋狂襟，放回電腦才揀選啱位合用的，最緊要影得多有得揀，直至有咗自拍神器的幫助，我終於擁有認為最理想的facial過程示範相，甚至自拍按摩背部相都得啊，正相不求人！
-

而另一最大優點，係女士們去旅行冇化妝至啱用，歸功於Casio的美顏功能，今次得我歡心的TR15仲首度加入了美白效果添！
測試：即使冇化妝，相中皮膚都見得人---
1級美白+1級美顏效果
但close up毛孔位會唔sharp，影嚟玩及留倩影ok，工作時則不適合我使用。

好多年前，我已經有用Casio的美顏相機，當時真係驚為天人，冇化妝都可以影到皮膚滑溜無瑕，到後來各大相機品牌加入美顏戰團，但要論美顏得來最自然（我喜歡用1或2級）還是它；今次更加入新的美白功能，對於「美白控」女性，可以膚色亮白均勻，一定好冧！
而我對TR15唯一投訴是電量唔夠襟用，在日本某天幾小時影咗唔夠一百張相（中間有熄機免浪費電），就在最重要關頭自動熄咗機，我要影出專欄相啊！我決定，要買多一嚿後備電池。


我認為自拍神器當紅原因，並唔係膚淺的缺貨炒賣風，而係真正改變了傳統的拍攝概念，特別是自拍風氣，乃近代攝影非常重要的攝影方法，如果你仲笑人玩自拍，其實係咪代表你out呢？




發佈者： Yoko Tsang 於 04:03
標籤： , ,

沒有留言:

發佈留言

注意：只有此網誌的成員可以留言。

訂閱： 發佈留言 (Atom)