昨天專登帶屋企人到灣仔覓食，提早慶祝中秋節！
第一站是帶他們到灣仔道街市，阿女帶父母逛街市，haha......角色大兜亂啊。
行街市目的是-----
帶媽咪買我強力推介的超好食一口牛肉粒(需自行烹調的)，同等分量只是city'super三分二價錢咋，質數更是有過之而無不及添！$75 ／盒
呢款一口牛肉粒，齋睇就知幾咁靚仔啦，雪花紋細緻平均，記得上年冬天第一次食嘅時候驚為天人，咬一口肉質超軟滑繼而口齒留香，滲滿牛嘅油香味，令我念念不忘！
由於我從來不愛薯片類乾糧，是以家中十大喜愛小食之一，就是這一口牛肉粒，輕煎、燒烤，或是放湯打邊爐，各有風味，牛魔王一族，必試啊！
新豐肉食公司 灣仔道56-60號
------------------
第二站是帶爸爸、媽咪、家姐到一間極多名人捧場的懷舊 feel 酒家，曾到訪座上客如陳方安生、曾特首、蔡灡、劉嘉玲、周慧敏等。
灣仔「杭州酒家」，天香樓大廚的兒子揸fit、是2010及2011米芝蓮香港指南推介，看似高調，也許你們亦試過，但這間酒家實情愛低調，不愛大肆宣傳，店內陳設懷舊。
我首次幫襯是與六位好友前來，今次帶屋企人試試，全因它有一味出色招牌菜，就是爸爸至愛東坡肉。
東坡肉 - 愈來愈難吃到高水準的了，這裏汁濃味帶甜好吃，媽咪超鍾意係拌碟嚿熱辣辣軟綿綿麵包，我覺得美中不足是肉質未夠「淋」。
招牌菜二是這個比面盆還要大的碟，據稱魚是由千島湖空運來的，半份索價 $398足6人分享。紅椒加葱清蒸，上湯味很夾，雖則魚係我同媽咪 favourite，但係只得兩人狂擦，原來無人爭係無咁好食囉！
雖然我平日很少吃臭豆腐，除非是太子花園街附近出名臭傳千里嗰檔，但係既然標榜是這食店名物之一 ，即管叫來試試。
一口臭豆腐炸得很乾身，又香又脆口，但精粹唔夠皆因一D都唔臭，幸而醮上甜醬來吃味較好。
我愛吃田雞腿，尤其是襯煲仔飯啊！這裏有兩種做法，煙燻田雞腿及炸田雞腿，我兩次都是吃煙燻的，然而，第一次比今次好吃，因為煙燻時間長了點，繼而有少少苦味、肉質也不夠嫩滑了，有點失望呢(我首次吃一口氣掃了半碟呀)！
呢度隻隻腿都鬼咁大隻，等同平時食開嗰D兩倍咁大，真係唔知邊個國家養到佢哋咁強壯！
生煎飽 excellent！全家都讚！夠晒熱、肉汁非常燙口，包身很軟，包底超脆，肉汁juicy帶甜。
涼拌海蜇頭，造型100分---似足象拔蚌刺身、味道10分---爽口清涼但完全無味，沾上醬油＋wasabi也無補於事，可惜之作！
消費: 每人約HK$200 (晚餐)
「杭州酒家」
地址 : 灣仔莊士敦道178號-188號華懋莊士敦廣場1樓
電話 : 2591 1898
—————————————————————————————————————————————
本週《MORE》專欄精采內容：
臨床實驗 我的強效食療
我推介的每道食療也同樣具驗證、具口碑，持之以恒保證必見妙效！主題是超級抗衰老嫩膚、養顏修身降膽固醇，及舒解皮膚敏感解毒。詳情 請留意今期《MORE》雜誌內我的專欄。
沒有留言:
發佈留言
注意：只有此網誌的成員可以留言。