2014年2月19日星期三

家居必備 熱痱水+雙氧水+萬能膏

熱痱水
皮膚突然過敏、痕癢、泛紅、出疹......可以話係好多人的家常便飯。
「彩光之父」告知初起以上情況，以熱痱水抹患處也許可舒解情況，因為佢咁講，我至買定支放在家中以備不時之需。
我亦有問：「真係唔清楚皮膚發生咩事都用得？」
dr答：「係，no harm ，即使不能醫治，亦可止下痕！」
熱痱水.......真係N年無接觸過了，在'R'字藥房問藥劑師，我話價錢不是考慮因素，至緊要安全，佢推介咗樂信牌，都只係$38啫；ok，即管試試，加上見到盒面印上註明兒童亦可使用，並無副作用，也就更放心。
上次突發性「光敏感皮膚炎」的初起之時，我亦有試過塗抹，雖然幫不了好轉，卻能短暫止痕吖！
熱痱水除咗主要用嚟俾小朋友醫治熱痱，至大功勞是立即止痕，如蟲咬、曬傷舒緩亦得。
唯一唔好係濃粉紅色素會黏實皮膚，肉眼就不覺，但用棉花滲水抹皮膚就顯見呢！
-

消毒雙氧水
我喺屋企都會周不時割損手指，尤其係鋒利的A4紙邊，仲有速遞送來紙袋封口的釘書釘（非常討厭，點解送件來的人唔用膠紙，貪快用易勾損皮膚的釘書釘呢？！）
咁若然有細小傷口會點做？
我首要任務是用雙氧水消毒防菌（我選用的是大牌子「便利妥」），至怕傷口發炎引致紅腫、難癒、留疤，傷口用咗雙氧水消毒幾次，基本上就可以安心。
而藥膏和膠布係後話，亦不一定須要配合。
-
萬能膏
修復身體乾燥爆坼脫皮等皮膚徵狀、輕度燙傷、蚊釘蟲咬等，我屋企有萬秀倫敦藥膏、娥羅納英雪花H軟膏、凡士林、974軟膏看守坐鎮。
最近再多一件好嘢，是La Roche Prosay，醫學美容品牌破天荒出「萬能膏」，即提起我的興趣。
真正名字是 B5萬用修復霜 Soothing Repairing Blam，外表似大支裝牙膏呀！
專供舒緩修復各種受損脆弱敏感肌膚，如濕疹、痕癢、乾燥、龜裂、皮膚灼熱、甚至係嬰孩敏感泛紅；成分溫和、不含防腐劑、酒精和香料，至啱鎮守屋企，一家人以備不時之需。$250／100ml（售賣點：銅鑼灣廣場1期G03店／旺角荷里活廣場212店）
簡介成分對症效用：
舒敏-溫泉水
健膚及降紅-維他命B5
抗菌-微量元素銅、鋅、錳
修復-積雪草
滋潤-乳木果油
至幫得手係呢幾日乾燥寒冬，塗在手踭、腳踭、小腿，夠晒rich可以持久保濕防乾裂啊！睡前作為hand cream搽手亦非常好，防乾紋亦可防甲邊倒刺；可惜是修復霜太大支，不便帶出街隨時補塗呢！
雖則謂面身都用得，但質地頗黏笠，而且有甘油成分，係給予滋潤但易block毛孔，所以我建議只集中用於身體皮膚，或至多急救鼻邊甩皮部位。
標明初生嬰兒都合用，如舒緩尿布疹、皮膚爆拆，啱晒我生B後試試啊！

——————————
本週《MORE》專欄精采內容：
遮瑕秘技 黑眼圈三級制
很多女性視「熊貓眼」罪大惡極！令她們無勇氣素顏示人，即使化了電眼妝也被黑眼圈大煞風景。一般亞洲女性擁有「熊貓眼」的原因是：循環欠佳及體質過敏，怎遮掉？
請留意今期《MORE》雜誌內我的專欄。
發佈者： Yoko Tsang 於 00:00 0 留言
標籤：

2014年2月18日星期二

舊灣仔有條隱藏食街

好耐冇寫食評，因為遇到一間好的餐廳比盛女愛作戰尋覓真愛更難度高！
新食肆同現今的假豪宅新樓一樣，華麗的外表卻金玉其外，食物的價錢統統去晒租金同環境裝修，正宗「食裝修」，試問又點敢介紹俾大家。
銅鑼灣區之類區域的食肆，只適用於一班朋友聚會，方便大家的一個地點，大家都只在乎飯腳多於食物質素。就好似上星期六的聚會，選址利舞臺一間泰國餐廳，價錢貴，食物質素很一般，如非幾個朋友好耐無見，想不到要去幫襯的理由。
還是舊區仲有憑實力立足的食肆。
噚晚兩口子搜購了一些BB用品後，本來想去灣仔大王東街食金源小館，途經廈門街，一來懷緬下舊日的喜帖街（雖然現在是一個地盤），二來想穿過廈門街往大道東再轉入大王東街，點知有驚喜，呢條街竟然係小九龍城，一街泰國菜館！
街頭至街尾有三間非常地道泰式小店，坐滿外國人；有兩間英式酒吧，一間日本餐館，一間日式拉麵店；仲有上樓甜品店及川菜館，選擇眾多呀！
小街、僻靜、充滿異國風情，是但碰一間，應該不會有錯吧。
於是選了這間清一色只有外國食客的The Spice House，食泰國菜，連點菜都要講英文，但格局同九龍城的地道泰店一模一樣。
點了飛天通菜及炸燒腩仔，五分鐘後送到，仲以為普普通通，所以費時俾相機「食先」，點知有驚喜，居然係好好味！炸燒腩仔皮脆肉香，正宗半肥瘦一啖肉一啖膏相間。
於是下一道泰式燒雞，立即請相機「食先」。
雖然並非新鮮雞，但雞味濃沃呀，證明是不錯的冰鮮雞，皮脆肉滑，配上大量泰式香料，惹火又惹味。
再來當然是我的摯愛 --- 鹽燒 魚則 魚，看看粗監的分佈結構，唔使燒到3D一樣企上碟都知好好味！
一揭開塊魚皮，白煙湧出，魚香夾雜粗監的礦物味，口水已經流晒出來。
焦點落在這個泰式source！辣到噴火！根本係普遍人類可接受範圍以外的辣度，但呢個source有極邪惡的誘惑，你愈抗拒，佢就愈吸引，好似撞邪一樣，理智叫你唔好醮，但拿著筷子的手卻很誠實，將魚肉浸晒落去，這種原始食慾的腦交戰，我多久沒試過？
晚餐過後，受苦的居然不是舌頭，係我的額頭！關額頭乜事？辣到標暗粒呀呀呀呀呀呀！
真係好可惡！不過我會再食，真係犯賤。
辣到我要公開地址，因為我都想睇下大家係咪會同我一樣辣到出暗粒！哈哈哈哈哈

——————————
本週《MORE》專欄精采內容：
遮瑕秘技 黑眼圈三級制
很多女性視「熊貓眼」罪大惡極！令她們無勇氣素顏示人，即使化了電眼妝也被黑眼圈大煞風景。一般亞洲女性擁有「熊貓眼」的原因是：循環欠佳及體質過敏，怎遮掉？
請留意今期《MORE》雜誌內我的專欄。
發佈者： Yoko Tsang 於 00:05 0 留言
標籤：

2014年2月17日星期一

懷孕第18週 花膠進補時機

上星期，如常找萬全堂錢太，就在針灸期間，錢太突然問我有冇食花膠？
這是我第一次在她口中聽到中藥以外的食材！
「阿女，呢個時候可以開始食多D花膠，有益呀！」點解係宜家適合食？我一直都有食喎。「咁就得啦。」

 嘻嘻，我愛吃花膠，聽完錢太咁講，即係話呢個時候要食更加優質的花膠及更加多花膠啦！

 其實這些中國人傳統智慧，真係好正確。例如孕婦雖要大量膠原蛋白、高蛋白質及大量鈣質，偏偏花膠就屬是這「三高食物」，加上低脂肪，長胎唔長肉，對孕婦真係百利而無一害。

 最開心係，我自己儲落的上等花膠，終於可以大派用場！（詳情可重溫：典藏花膠）

 懷孕之初，我的父母及老爺奶奶最高興，媽咪已經火速主理我的飲食，老爺送了冬蟲草作日常調理之用（日後會詳解冬蟲草對孕婦的好處），奶奶更將她珍藏20年的花膠送給我補身。
這是非常高級的印度洋生開廣肚公！功效最補，而且保存極佳。陳年花膠讓水分自然迫乾，膠質更成熟沉澱，花膠的顏色熟成為金黃帶紅，可謂極完美的花膠！
這樣完成的花膠，在今天可能價值不菲，但20年前，這一堆花膠只不花買了$500！因為以前的人都喜歡將買到好的花膠儲下，買多多食少少，剩低便儲下。到年尾又買過，之前又食D又再儲過，所以儲落咁多陳年花膠。
不過今時今日真係好難儲，這個品種這個大小的廣肚公，已經要過萬蚊一斤。
而我的做法很簡單，例如整我最喜歡的花膠啫喱，大家可以睇片學整：
或者做一個簡單燉湯，用蓮子、百合、圓肉，加一件瘦肉及乾瑤柱調味，加上花膠，燉2小時即成。
這個時候食花膠，記得挑選公肚，例如扎膠公、廣肚公，對母親及胎兒進補較適合。
令外還有一種花膠叫雞泡膠，係另一種非常有功效的花膠，下一次詳談。
——————————
本週《MORE》專欄精采內容：
遮瑕秘技 黑眼圈三級制
很多女性視「熊貓眼」罪大惡極！令她們無勇氣素顏示人，即使化了電眼妝也被黑眼圈大煞風景。一般亞洲女性擁有「熊貓眼」的原因是：循環欠佳及體質過敏，怎遮掉？
請留意今期《MORE》雜誌內我的專欄。

發佈者： Yoko Tsang 於 00:03 0 留言
標籤：

2014年2月14日星期五

立即報名喇！GHC x Yoko Tsang 「魔肌美顏Tea party」

又有機會同大家見面喇！
我搞嘅分享會向來以大家盡興為目標，嚟緊嘅2月23日（Sun)，參加者既可品嚐養顏餐，更可率先了解嶄新魔肌美顏護膚品，兼帶埋返屋企享用令皮膚靚靚，仲有豐富遊戲，大家把握機會報名喇，今次誠意邀請讀者們及博客一齊參予！
-
是日本歷史悠久的美容品牌，其護膚品用上極矜貴科研成份，最新的「魔肌系列」，施展「胎盤納米」魔法令你回復嬰肌。
開估喇......品牌是GHC，以豚胎素起家聞名，日本少女少婦為之著迷啊！結緣於N年前，當時我任美容編輯，在大型的beauty centre有幸遇上，做胎盤回春面部治療外，亦有用其皇牌豚胎液滋潤護膚，效果是很好的，最顯著是能保持著皮膚的滑溜性。當然胎盤液的生產商有保證我始放心用於面上，乃日本生物製劑株式會社，用上尖端技術確保安全及有效性，有晒證書；唯價錢屬中上，但用過就知是值得投資的！
至今，品牌又研發出最新「魔肌系列」，主打胎盤成分提煉，含有細胞生長因子，擁有抗衰老回春妙效，最切合未老先衰或成熟肌膚，其修復受損細胞功效顯著，用後令皮膚水、嫩、滑、彈；更首次配合了最強導入方法-納米技術和微脂囊技術啊！
假如妳成日覺得皮膚搽乜都唔吸收？解決方法就要從幾方面，保持角質層更生，令皮膚管道暢通；此外，應選用「納米技術」的護膚品，分子細小始容易滲透至基底。
-
今次分享會，大家可率先試用魔肌全系列共4款產品，我就特別欽點以下兩款，先俾大家過目：
魔肌細胞精華液 + 魔肌無痕眼霜
-
魔肌細胞精華液 $2,800／150ml （查詢熱線：2882 6070）
質感特別：按出來是黏稠凝露狀，推開即轉化成水感液體狀；我特別喜愛於乾燥天氣下使用，易被皮膚吸收，沒有油膩感不致粉刺，而且比起一般水狀精華，保濕效果較持久，因為用上微脂囊技術，將活性胎盤成分濃縮包裹，進入皮下層爆破釋放，真正改善肌底組織。
究竟成分點樣秒間滑入肌膚？請大家分享會親來見證。
-
魔肌無痕眼霜 $1,480／12g （查詢熱線：2882 6070）
由胎盤成分提煉的護膚品，含有細胞生長因子，去皺效果特別出色，最適合拯救眼部薄弱肌膚。
眼霜質感是輕薄黏稠，塗後像是覆蓋了一層薄膜，彷如隱形eye mask般；當日我會指導創新塗抹法，有助即時拉提緊緻，減淡魚尾紋和去上眼皮水腫，大家拭目以待喇！
-

GHC x Yoko Tsang 「魔肌美顏Tea party」
精采內容預告：
Part 1-「豚胎素」不老之謎
由專家分享胎盤素在國際科研上成果，日本GHC護膚法寶如何確切修復肌膚，由現埸參加者測試實證。

Part 2- Mix & match 魔肌美顏教學
由我指導大家內外漂亮方案：
1）胎盤素養顏飲品及意式甜品調配教學。
2）分享心水滋養護眼及護面產品，及傳授獨特使用秘技。

Part 3-Q&A 美顏智慧遊戲
為咗增進大家護膚知識，出席者當日會以小組形式參予遊戲，好玩開心仲有知識和獎品收穫添！
-

分享會日期及時間：
2014年2月23日（星期日）／下午2：30至4：45
地點：
Restaurant and Bar 
銅鑼灣(獲邀參加者會有專人電郵通知）
名額：
共36位-誠邀18位讀者+18位美容生活博客參加。
細則：
日本GHC誠邀今次出席之當中博客，經了解產品概念及親身試用後，在網上分享博文，讓更多愛美之士吸收專業美容資訊。
-
送禮：
出席者每人可獲贈：
1）GHC 一套四件「魔肌胎盤系列」體驗裝／ 總值$2,090 
2）GHC 胎盤美顏飲1支／價值$230
-

遊戲勝出之該組別，每人可獲贈：
GHC魔肌胎盤系列貨裝護膚品
價值$1,480至$2,800 
特別大奬：
GHC 胎盤美顏飲1盒10支／價值$2,300

-
你想獲邀參加分享會？報名喇……把握難能可貴機會！
請於此文章留言寫上：
1）想參加分享會的原因，言簡意賅便可啊！
2）你們撰寫文章的'blog link'，以供參考。（這點讀者無須理會，只供博客填寫）

截止報名日期：2014年2月18日下午2時正
*被邀出席分享會者，將於2014年2月18／19日收到官方發出之電郵通知。
多謝參加！
-
——————————
本週《MORE》專欄精采內容：
情人節 瘦身美唇解碼
今年情人節與元宵佳節同日，別具意義，將至有什麼要準備？浪漫節目留待男士策劃驚喜，身邊女性朋友就最著重赴盛會前三件事-均稱身段+豐潤嘴唇+性感裙子。怎樣做？
請留意今期《MORE》雜誌內我的專欄。
發佈者： Yoko Tsang 於 00:00 7 留言

2014年2月13日星期四

起死回生醬

都說懷孕改變了我的口味，對辣多了一份情意結，令本來不嚐辣的我，多了一程尋味之旅。

 早前在壹週刊看到了一篇訪問，是一位前上市公司主席，毅然在86歲創業---賣XO醬！女士、長者、創業、食物，看得我極投入，記者還走訪其位於屯門的工場，一窺XO醬製作過程，從照片中發現，竟然用原粒一級日本北海道乾瑤柱做（記者並沒有寫出這一點，只是我一睇圖就知用料高質），打破很多XO醬生產商或家庭主婦只用乾瑤柱碎（還要是最低級別的）做的習慣，肅然起敬！
這個XO醬就叫做「蘇太名醬」！雖然買的時候可以試勻原味、中辣或大辣，但由於購買時還未真的太喜歡辣，所以只試及買了原味。除了因為優質乾瑤柱，好味的另一個原因是大量蝦籽，令XO醬的味覺層次更豐富。你只需用李XX的XO醬比較一下便知優劣。
話說在拜年其間，好友「女強人P」以尊貴版李XX的XO醬弄一個XO醬炒蘿蔔糕，本來應該好好味，可惜我試過蘇太名醬，立即比下去，真係返唔到轉頭。同場「靚太C」仲介紹我元朗都有隱世XO醬名牌（可惜我忘記了名字，好在靚太C話下次見面會送俾我），特點是有大量蝦籽，證明大家對食的要求極一致！我期待這瓶隱世元朗XO醬。
我對蘇太名醬另眼相看的時機，在於過年三十在IFC City Super作最後掃貨衝刺時，被蘇太的promotion吸引住，由於突然喜歡辣，結果試食了中辣（沒冇小辣的），那個直衝大腦的辛辣感，快來快去，那個辣味好像用針拮一拮你的味覺神經然後散去，讓你好想捉緊但又逃去無縱，實在太過癮！可惜，有得試食冇得買，因為：
賣晒！
成為年三十晚最大的遺憾！
直至上星期日，再逛時代廣場City Super，終於搵到，居然係最last一樽，大呼好彩！
當下立即行去海鮮部，買越南黑虎蝦，做XO醬炒蝦仁。
本來想再買翠玉瓜整XO醬炒翠玉瓜，不過City Super只有歐洲入口的黃翠玉瓜，$45一條！！
我立即改去惠康須普通翠玉瓜，$16/2條咋！

 將虎蝦洗淨、挑走蝦腸、索乾水份後，在蝦背切一刀起雙飛；然後用薑蔥爆鑊再落蝦仁，直至近九成熟先至落XO醬兜多兩下，即成。
超級色香味俱全！蝦肉非常爽脆、XO醬的辣勁搗亂你的味蕾，只欠蝦味！對，這個蝦甚麼都好，只係冇蝦味，失望。

 XO醬炒翠肉瓜也很簡單，將翠玉瓜洗淨、切片，然後用水灼至半熟。撈起翠玉瓜再索乾水，用少許XO醬的辣油爆香個鑊，再落翠玉瓜，在快要炒熟前至落XO將，兜多兩下又完成，方便至極！
呢個XO醬翠玉瓜合晒我意，味道、咬勁俱齊！

 XO醬可以被我稱為「起死回生醬」，的確值得咁叫，主婦都可以變廚神，大家不妨試下！而且再一次證明，用好的食材自自然然做到一流菜式，不要怕，即管試。
——————————
本週《MORE》專欄精采內容：
情人節 瘦身美唇解碼
今年情人節與元宵佳節同日，別具意義，將至有什麼要準備？浪漫節目留待男士策劃驚喜，身邊女性朋友就最著重赴盛會前三件事-均稱身段+豐潤嘴唇+性感裙子。怎樣做？
請留意今期《MORE》雜誌內我的專欄。
發佈者： Yoko Tsang 於 00:22 0 留言
標籤：

2014年2月11日星期二

懷孕前調理養生篇（一）中醫針灸養胎

在預備懷孕前，我和丈夫在婦產科及生殖科醫生的建議下，先做了一個詳細的身體檢查，結果非常正常，重點是雙方沒有特殊的隱性基因導致下一代會有先天性隱憂。
在這樣的大前提下，根據醫生所言，我們只需一粒正常的卵子和一顆正常的精子，便可以孕育下一代。
不過理論歸理論，就像我尋日做facial時遇上的美容師，面上明顯出現荷爾蒙失調的特徵，月經更加不準，加上工作及精神壓力，就算是青春少艾，想生都難！

於是我請教了我的御用中醫---萬全堂錢太，她的答案是必需要有健康的身體配合，讓受精的卵子可以順利「著床」，在子宮中孕育，便算成功。

OK，說易行難，怎樣才算「健康的身體」？經我一番資料搜集，我定出四大調理方針，都是針對女性體質的溫和健康調理。
好明顯，第一篇就是教大家調理身體。
回想當日，我告訴錢太正準備有懷孕打算，錢太拍心口保證：「阿女，乖乖地聽我話，準備應診服中藥粉，包你三個月內成功！仲有，幫埋你之後長胎唔長肉，做個靚媽咪！」於是我每星期準時預約應診，配合針灸及依時每日服食錢太處方的中藥粉（當然同時也有其他調理，將會逐一同大家分享 ），結果如她的神機妙算，就這樣成功了！

其實心裏很明白，我明顯被「長胎唔長肉」呢句說話吸引住！

亦即係話，想生仔，搵錢太，預約時講明想同Yoko一樣成功懷孕，護士就識做。

但戲肉梗係點樣可以「長胎唔長肉」啦！答案係咁樣：
重點就係針灸！
留意膝頭對落的一針，呢一個就係關鍵的「足三里穴」，只要刺激呢個穴位，就可以幫助泵血去子宮，呢一下可以令胎兒吸收最多的養份，而不是將這時自己進補的養份被自己吸收，結果肥了自己。
而長胎唔長肉亦有兩個位於膝頭上的「梁丘穴」及「血海穴」同樣重要。
就這樣每星期針30分鐘左右就可以，我每星期都針一次。只係針落足三里穴呢一下真係相當酸疼，但如果只係受一下酸痛就可以長胎唔長肉，絕對值得！
至於足三里穴再落的一針，係錢太把脈時發現我有些痰，順便落針有助化痰，證明錢太的照顧極之細心！

針灸以外，還有一些安胎中藥粉，因為在我懷孕初期，錢太把脈時說我有點不穩，一定要好好養胎，藥份成份每星期都不同，視乎當時情況及體質由錢太決定加藥粉調理，到三個月時已經不須再吃了，目前只須焗促進氣血紅棗南棗花生衣茶。
至於長胎唔長肉的成效，大家可以看看我個肚：
第17週只是輕微的隆起，大家可以放心，無論中、西醫的檢查都說十分正常，我的增磅幅度都在西醫的預期之內，每次產檢時，西醫都大讚進展極佳。加上我巧妙的穿著，好多朋友都唔覺我係有身孕呢！
其實呢個孕婦調理，係唔少在中環工作的孕婦的摯愛，因為調理時順便在房間休息小睡，大過肚就知，懷孕初期真係好易渴睡，對於懷孕又要返工的女士，真係一大福音，唔少人就係咁樣在午飯時間睡到夠鐘才返公司。而且仲有好多明星媽咪在懷孕時都係由錢太主理，當然又係主攻長胎唔長肉啦！

如果有孕婦想學我一樣長胎唔長肉，在致電預約時，可以直接同護士姐姐講，睇完Yoko個blog，想試下同Yoko一樣的長胎唔長肉調理，錢太就知點做。
萬全堂
香港皇后大道中 88 號勵精中心 15 樓
電話：2525 9288
——————————
本週《MORE》專欄精采內容：
情人節 瘦身美唇解碼
今年情人節與元宵佳節同日，別具意義，將至有什麼要準備？浪漫節目留待男士策劃驚喜，身邊女性朋友就最著重赴盛會前三件事-均稱身段+豐潤嘴唇+性感裙子。怎樣做？
請留意今期《MORE》雜誌內我的專欄。

發佈者： Yoko Tsang 於 00:03 1 留言
標籤： ,
訂閱： 文章 (Atom)