2013年12月13日星期五

海味大冒險 ---- 滋陰鮑魚嚮螺煲花膠

終於來到鮑魚大冒險的重要日子，煮鮑魚！
煮之前，又是海味的重要動作---浸發。
浸發鮑魚，其實相當簡單，簡言之，是心機。
浸鮑魚所需時間以大中細隻劃分，
大乾鮑指20頭或以下（1斤20隻或以下）：連浸四日四夜
中乾鮑指20-40頭之間（1斤20-40隻）：連浸三日三夜
小乾鮑指40頭或以上（1斤40隻或以上）：連浸兩日兩夜
浸發期間，必需每日早晚各換水一次，原因是慎防清水發臭，影響乾鮑味道。
完成浸發後，鮑魚邊會有一條腸，把腸臟拔掉（或從側邊剪開鮑魚除去亦可）即可，亦代表乾鮑浸發過程完成。

就趁秋冬日子蒞臨，天氣乾燥，用乾鮑煲一些滋陰補身湯水，加上媽咪推介的大眾皆宜之選--- 鮑魚嚮螺煲花膠，有滋陰，養顏，活血，滋潤保健的作用。
材料：
乾鮑四隻，花膠三塊，急凍响螺兩隻，雪耳一両，蜜棗四粒，半生木瓜一個，瘦肉60元
製法：
1）乾鮑及花膠於早兩天洗淨浸發備用（浸發花膠方法：http://www.youtube.com/watch?v=eCXDM3g8kk0）

2）急凍响螺切開清走腸臟，連同瘦肉洗淨，汆水後備用
3）雪耳用凍水浸軟發開，以剪刀清除雪耳蒂頂硬粒，再洗淨備用
4）木瓜批皮劏開清走囊内種核，隨後洗淨切開數件待用
步驟：
將上述食材一同放入凍水內，水滾後轉慢火同煲2.5小時，但要留意木瓜及雪耳在水滾起計兩小時後才入湯煲內，夠鐘則可熄火，完成一度適合兩人份量飲用之養生湯水。
完成！

由於花膠及鮑魚都屬膠質豐富的食材，湯頭口感十分豐厚綿密，彷彿普通一啖湯都好像有肉在內的感覺！對我而言，花膠的骨膠原成份對皮膚十分之好，可以增加彈性；而鮑魚的豐富礦物成份有抗氧化作用，可對抗游離基，延緩衰老。對平日養生的確非常之好。 
如果你睇完之後覺得好貴呀！對，感覺上好貴，因今次用的是62頭日本一級吉品鮑，但只需$70/隻，一共$280；花膠是中隻西洋肚，約$50/塊，一共$150；瘦肉$60；意想不到的是急凍螺頭居然要$66/粒，一共$132，同隻鮑魚差唔多貴！所以呢個湯水，雖然鮑魚同花膠先係主角，但兩者的價錢並非大家心目中所想的拒人於千里！

————–———————————————————————————————
本週《MORE》專欄精采內容：
「草藥之王」 人參保鮮肌膚
當中，尤以古時視為「靈丹妙藥」的人參護膚品，極為珍貴，究竟人參在美容上有什麼效用？
請留意今期《MORE》雜誌內我的專欄。
發佈者： Yoko Tsang 於 00:03 0 留言
標籤： ,

2013年12月11日星期三

海味大冒險 --- 揀靚鮑魚及食療價值

上回提要，要學整海味，先從鮑魚入手，所以有第一篇海味大冒險，重溫：http://vipblog.orientalsunday.hk/yokot/?p=10806

而上次未講到的是揀靚鮑魚的要點：
1. 要有「令」氣，帶有乾海產的應有的光澤。這一點要些經驗及對照後，才容易上手。
2. 珠邊要齊整，代表由新鮮鮑魚製作。
3. 腰圓背厚，食落才會有啖啖肉之餘，溏心亦會結實。
上圖三隻不同大小的吉品鮑，就是正宗靚乾鮑代表，有令氣，珠邊靚，腰圓背厚。

靚鮑魚有時更加係可遇不可求，媽咪教落，靚又抵買，係要買多D。例如上次去買吉品乾鮑，本來冇諗過買62頭的細吉品鮑，但只係$4,300/斤，除開每隻$70，加上又係靚貨，又淨番最後半斤，立即掃晒，亦係上圖最頂那一隻。

乾鮑的大小級別以重量劃分，亦即是行內術語的頭數。剛才提到的62頭，指1斤有62隻。（1斤約重604克）於是乎20頭或以下的為之大乾鮑、21-40頭之間的算中隻、41頭或以上為之細隻。
而我上次分別買了62頭（左）、35頭（中）及23頭（右）的乾鮑，售價分別是$4300、$7800及$14800。不過我當然不是全部一斤一斤咁買，最大的我只買了8隻，其餘都只是半斤。
半斤62頭一級日本吉品乾鮑就有咁多，只不過2千多，其實幾抵食，可惜已經被我賣晒咯。

其實乾鮑有甚麼食療價值？乾鮑之所以值錢，是因為乾鮑經製作曬乾後，營養價值比鮮鮑大大提升了6倍，特別是當中的礦物質成份及蛋白質大大提升了，對手術後的體力進補有極大幫助。當年我媽咪手術後，就立即飲鮑魚螺頭燉湯，體力恢復比其他同日做手術的人回復得更佳。所以老人家非常非常適合飲鮑魚湯，對身體營養補充十分有幫助！

學識分辦及揀靚乾鮑，當然去到最重要一環，落手煮！
明日教大家煲一個媽咪推介的大眾皆宜之選--- 鮑魚嚮螺煲花膠，有滋陰，養顏，活血，滋潤保健的作用。
————–———————————————————————————————
本週《MORE》專欄精采內容：
「草藥之王」 人參保鮮肌膚
當中，尤以古時視為「靈丹妙藥」的人參護膚品，極為珍貴，究竟人參在美容上有什麼效用？
請留意今期《MORE》雜誌內我的專欄。

發佈者： Yoko Tsang 於 01:03 0 留言
標籤： ,

2013年12月9日星期一

台灣旅遊之寶 --- 的士王

對於去過無數次台灣的我，上星期回來，竟然又被我發現台灣的可愛之處！
對於去台北旅行的香港人，呢個甚至係影響你的旅程的重要服務！
就係一架好的士！
今次台灣之旅，從機場往返酒店的車程，就係由Matie Lin負責。
其實，佢係的士車隊的頭目。
但佢為人醒目、爽朗、funny、安全地快捷（笑言自己手車是Sky哥哥) 、滿足客人要求，我甚至覺得佢外型俊俏，成個A貨周杰倫！
最重要係，佢係一個非常熟悉台灣美食的響導。事關我由酒店回機場時，突然好想食「陳家涼麵」（註：陳家涼麵係全台北最出名最好食的涼麵，台北無人不識）。Matie睇下隻錶，話仲有時間，立即車我去（無額外收費） ，食完仲買埋外賣帶番香港添。
都未算，既然食開，一不離二，我仲想食「好記擔仔麵」（位於吉林路，真正用蝦湯煮的擔仔麵，未食過唔算去過台灣），Matie又望下隻錶，即刻話無問題又帶我去（又係冇額外收費）。咁好服務的的士司機，我點可以唔介紹俾大家呢？

因為就這樣從台北的酒店去桃園國際機場，收費只是NT$800！
呢個價錢，可能好多台灣通都識得call這類司機，不過我介紹得，應該比你們一般遇到的更優惠，因為我同Matie講，想介紹你給我的讀者，不過要同我一樣咁抵喎！
Matie快人快語，即刻俾個靚價：
從桃園國際機場去台北市酒店：NT$1,000
從台北市酒店回桃園國際機場：NT$800 + 再加送30分鐘車程買手信食物
想享獨家優惠，記得致電約車時說明是「Yoko嘅香港讀者」
（未必一定由Matie接送，但會由佢屬下車隊提供相同的服務）
包車亦可以，價錢都幾抵：
NT$2,500／包車5小時（eg.包車半日食盡台北美食，做架為食衝鋒車）
NT$3,500／包車8小時（eg.去九份／十份，放天燈，玩一整天最抵）

儲夠4個人出發，認真抵！
Matie車隊全部都係大型新車，雖然只可坐4人，但座椅舒適，車尾廂夠大，掃貨返機場實夠位！
而我更欣賞Matie的人肉美食字典，例如佢推介：
微熱山丘（鳯梨酥）
自然風火鍋
原創花雕雞
牛老大涮涮鍋（本店在台南）
林東芳牛肉麵
老崔蒸包（蒸豬／牛肉包）
阜杭豆漿 (要排隊）（厚燒餅-面有蜂蜜-加蔥蛋／油條）
今次只係順路經過牛老大，下一次去台灣，我一定會食！
認住呢張咭片，記低電話，可以Whatsapp、LINE、微訊佢本人預約用車。
email查詢亦夠方便

大家想享獨家優惠，記得致電約車時說明是「Yoko嘅香港讀者」喇！
————–———————————————————————————————
本週《MORE》專欄精采內容：
「草藥之王」 人參保鮮肌膚
當中，尤以古時視為「靈丹妙藥」的人參護膚品，極為珍貴，究竟人參在美容上有什麼效用？
請留意今期《MORE》雜誌內我的專欄。
發佈者： Yoko Tsang 於 00:31 0 留言
標籤：

2013年12月7日星期六

美容問題不能亂答 之 對付虎紋（木偶紋）的方法

對於每日來自不同讀者的美容問題，我都盡量回答，但很多的問題都不容易回答......
-
例如最近收到一位Ann Wong讀者的問題：
「想問問對抗虎紋(木偶紋)有效的方法是否只是光學治療?
有沒有價錢相宜的推介？」

如果你以為我只需答句yes or no，然後提供一個價錢相宜的推介便可以解答了一個讀者問題，便大錯特錯，因為這樣輕率的回答，隨時會害了Ann Wong的一生！

答案是要先了解問題成因才能回答。

例如Ann Wong的虎紋是因為本來冇乜虎紋，但年紀大所以面部肌膚鬆馳、下垂而加深了虎紋，變得很明顯？
抑或Ann Wong只是一個20出頭的少女，天生因為膠原蛋白稀少，皮膚呈下陷，所以與生俱來便有很深的虎紋？
大家看看年青及年老的紅星張曼玉就會更明白以上所言。
-
讀者並沒有提供這些背景資料，對我或者一位專業皮膚科醫生而言，都很難解答。

好，我盡量回答！就第一個問題而答，她所說的光學治療，應該是指IPL彩光或Laser激光，要花很長時間及相對金錢才達到效果，所以不認同用光學技術是對付虎紋最佳方法。

剩下2個要項：
1）本來冇虎紋，但年紀大，膠原蛋白流失令肌肉鬆馳所造成？
OR
2）天生虎紋深，因為膠原蛋白稀少而造成？

1）的解決方法可以透過做Thermage或者Doublo，刺激面部膠原蛋白增生，提升肌底彈性並收緊皮膚，從而減淡虎紋；或者注射Sculptra，透過聚左旋乳酸，刺激自生膠原蛋白增生而改善。

2）有些人天生膠原蛋白稀少，點刺激都沒甚效果，唯有注射填充物如Restylane透明質酸，托起底層製造飽滿感而改善虎紋。

到底Ann Wong應該揀1）定2）？
我不清楚，唯有希望佢睇到自己再決定。
所以我對讀者大多數的回覆，都說必須以專業醫生專業意見為準，因為他們專業之餘，亦可以親自會面及診症問清楚你的過去，才能夠以最準確的專業答覆回應你的需要！

1）的風險不高，最多做完之後，未能完全滿足你膠原蛋白增生的目標，金錢同時間亦投資了。大部份天生面無四両肉的人，就算注射Sculptra刺激都難自生多膠原蛋白，這真人例子我見過，而這些人的虎紋亦較深。
2）的風險也不高，只是若果手勢不好，效果「膠一點」，容易被人睇得出「整過喎」，可能又要靠溶解針。
強烈重申：風險不高不代表100%安全，意外總係出乎你意料，乜都唔整就100%安全，但亦無機會容貌回春。

讀者問題的另一半是「價錢相宜的推介」，由於上一半也未能給予確實意見，故未能回答吧！

大家看，一條兩行字的問題，要花一大篇blog的文章才算解答了問題一半，所以有時讀者得不到我的回覆，原因係問題不如你想像中的簡單，若我輕率回答，深怕你會get錯意思！
傷風感冒睇醫生，醫生都會問你過往病歷、有否藥物敏感等等先開藥。
故此，我真要小心行事尤其是指導別人喎！



———————————————————————
發佈者： Yoko Tsang 於 13:37 0 留言
標籤： ,

2013年12月2日星期一

海味大冒險---辨別三大日本乾鮑

之前話過，與其冒險試新餐廳，何不冒險自己入廚？
帶著這份勇氣，我找來身邊所有親朋好友都認同的烹飪高手---我媽咪，學煮海味！
因為我媽咪講過，煮海味本身要有相當廚藝才駕輕就熟，我一學就從高級班開始，或者可以快速對烹飪學有所成。
煮海味從何入手？乾鮑特別考功夫，媽咪建議先學當中的初級組---煲鮑魚雞湯開始。
這篇blog文主要由揀鮑魚開始學起。
乾鮑產地多，日本、南非、中東、墨西哥都有，但論產地及製作過程，都以日本首屈一指，所以揀乾鮑，建議買日本產。
日本產的乾鮑，又分三種類別，即是大家耳熟能詳的吉品鮑、禾麻鮑及網鮑。
這三種類別的鮑魚並無高低之分，主要視乎個人口味，就好似牛扒一樣，肉眼、西冷、T骨各有人好；吉品鮑、禾麻鮑及網鮑，都係視乎閣下口味。

大鮑霸---網鮑

產自青森縣的網鮑，屬大型品種鮑魚，所以成品都是大頭數的，依附在岩石上生長，漁民以網取形式捕獲，故名「網鮑」。特點是肥大厚身，珠邊窄。一斤10隻屬等閒，大至1斤4-6隻都有。由於非常大隻，不容易煮腍，一般家庭較少買，多數由酒樓的經驗廚師主理，較少用來煲湯，多數炆來食。我今次就沒有買網鮑。

意頭菜---吉品鮑
產自岩手縣吉濱灣一帶，是目前最流通的乾鮑，因被稱為「吉品」，加上頭尾翹起的元寶身型，腰圓背厚，甚為吉利，而被中國人奉為上品。特別是鮑魚肚上的一行壓線痕，因為用麻繩串起曬乾時，海草穿頭過尾，壓著肚身而型成。煲湯或炆餸都容易。
吉品鮑的曬乾過程，可以見到麻繩在鮑魚肚上經過。
可以見到麻繩的穿洞，從鮑頭開始穿過。
從側邊睇，吉品鮑頭尾翹起，似足一個元寶。

香味濃---禾麻鮑
產自青森縣大間（Oma），因此音譯為「禾麻」。特點是鮑身薄，容易煮，但鮑魚味濃沃，軟滑易入口，老人家多選禾麻鮑。由於禾麻鮑在曬製時，麻繩從鮑身側邊穿過，故鮑側有穿洞，鮑魚肚上沒有海草壓痕。由於鮑味濃厚，多用來煲湯，湯頭味道極濃。
禾麻鮑的曬乾過程，清楚見到麻繩從側邊穿過。
禾麻鮑的側邊有穿洞留下的痕跡。
從禾麻鮑的側邊睇，扁平貼服，同吉品分別極大。

由於今次以煲湯為主，我並沒有購買網鮑，反而買了些不同大小的禾麻鮑及吉品鮑。
睇完咁長篇，相信各位一睇上圖就知道邊一隻係吉品鮑，邊一隻係禾麻鮑啦！
而我自己就買了三款不同大小的吉品鮑。

今晚寫住咁多先，下一次教大家揀靚乾鮑的秘訣。
————–———————————————————————————————
本週《MORE》專欄精采內容：
皮膚保青春的必須品
假如你的皮膚是暗啞無光、多幼紋皺紋，被雀斑困擾、倦態無生氣，那麼維C產品就能對症下
藥！想知點樣用維C補美肌？
請留意今期《MORE》雜誌內我的專欄。

發佈者： Yoko Tsang 於 00:03 0 留言
標籤：

2013年11月28日星期四

愈減愈肥 節食唔係好辦法！

最多人實行的減肥方法是節食或禁食，體重數字卻似過山車般快速上落，最終反彈收場！U know why?

在健體中心check過儀器，話我自身代謝率高，所以容易將脂肪消耗，擁有不易胖的身型。
但呢樣並唔係天生，係有根有據，因為我飲食均衡......
奉行-高蛋白質+低GI（血糖指數）食物
雖然我的一貫食量係過火，但食物選擇對，
我偏好的高蛋白質食物是雞肉（去皮）及牛肉（避吃肥膏）、低GI高纖蔬菜。
而蛋白質正是發展肌肉必須品，大家別以為我咁瘦，梗係冇乜肌肉喎，大錯特錯，我是手腳肌肉數字高，而肌肉與基礎代謝率正接掛鈎，肌肉量增加，血液運輸力會變強，可以提高基礎代謝，肌肉足夠自然就能消耗掉儲存的熱量。
故此，想有不易胖的體質，先要鍛鍊肌肉，它正是你的消脂工具！

之但係，好多人用地獄式節食方法，須知率先減去的卻是肌肉和水分，而肥胖的主兇是身體脂肪及內臟脂肪，要踢走呢兩樣衰嘢（有效方法之一，請click入重溫：http://vipblog.orientalsunday.hk/yokot/?p=10691），你的減重數字才是佳績！
看圖示......

５磅的脂肪與５磅的肌肉大小比例。
看罷，相信大家就會明白，你想甩掉的是什麼！
-
千萬別誤以為節食或禁食的方式就會瘦下來！
當身體器官運作，是需要不斷消耗熱量的，但缺乏飮食上蛋白質補充，率先減掉的不是脂肪，而是身體內的水份及肌肉組織，至於你的身體脂肪，有排未輪到啊！
故此，當發現體重迅速下降時，別開心得太早，因為肌肉本來就比脂肪重很多，你減去的是肌肉，非體脂及內臟脂肪啊！
-
而且呢種錯誤減肥方式，很易反彈。
以女神茍芸慧為例，常言減肥，整個月只日吃一餐，仍冇成績！
欣宜，曾經節食忍口多時終爆發，在片埸工作午餐掃兩份lunch box，加宵夜狂擦。
其實，過份節食，確實會弄巧反拙，令新陣代謝減慢，消耗熱量減慢；加上當人體很肌餓的時候，就會按耐不住狂吃，呢刻腸胃吸收是平常的三倍以上，所以會攝取更多油脂更多熱量，得不償失！

唯有健康飲食法-高蛋白質+低GI食物+適量運動，才是邁向成功的keep fit持久戰！


———————————————————————
本週《MORE》專欄精采內容：
女性朋友羨慕我經常踏足日本，大家也異口同聲愛逛藥妝店、食買玩總能給予新驚喜！剛剛上星期，我到日本又發掘潮興美容佳品，火速送上最新資訊給大家。
拉面皮不求人；大賞眼線筆；模疑Gel甲美態
請留意今期《MORE》雜誌內我的專欄。





發佈者： Yoko Tsang 於 00:00 0 留言
標籤：
訂閱： 文章 (Atom)