泰式秘店拿手菜

今日又同大家分享美食！

上星期介紹咗我很喜愛的泰國秘店3D燒魚，今日仲勁，呢條魚何止3D，擁有嘅係藝術品造型，見到都食指大動，「先敬羅衣後敬人」咪就係咁解囉！

噚日覓食去到北角電器道街市，皆因「為食兵團」3位組員同我講呢家泰式店有幾咁好食，仲要無乜人知，果然開咗3年，見到除咗Hong Kong Walker有介紹過，真係無其他雜誌講過喎(心諗係咪無出位嘢介紹咋？！)

即管做測試員。

登登登，裝好身，出嚟俾大家睇：

泰式炸魚 $78

成件擺件，好有動感，似跳水姿態！

不如叫你做「側身轉體360」

擁有浮誇外在美，那內在美得唔得先？

炸得唔錯，邊位微脆，魚肉 juicy，精髓是秘製醬汁，葱花辣椒蒜粒大混醬，酸中帶辣，味覺刺激提升，這做法將平價魚變成美味姿態登場，勁！

最讃大廚心思，拆骨起肉切件，啖啖肉，最啱「怕吐骨男」。

炭燒猪頸肉 $52

呢碟餸與上面條魚相映成趣，猪頸肉樣衰衰膚色不均，看來挑不起我食慾。

叫你做「曬燶咗猪頸肉」

即管放入口，嘩！出奇地好食，真係豬不可以貌相，提名你參加全港猪肉組爭霸戰都有機會響朵呀！邊位燒得非常香脆，滲出微微炭香，肉質爽口絕不嚡口，仲夾雜著濃濃清香肉汁，水準相當之高。

蝦膏炒貴刁  $43

呢碟貴刁似切碎了的粉皮，口感煙韌ok，但蝦膏味唔夠濃，偏淡，而且炒得不均，味道不是整體性，有淡口也有啱味，夾餸都要睇運氣？！

紅咖喱雞 $53

配菜比主菜出色，即茄子、青豆角浸滿咖喱香很醒神，無誠意的雞肉又是雪藏雞柳，嚡口又無肉味，失望！早知聽老板娘話叫燒雞啦，佢燒猪頸肉好味到震，燒物一定有番咁上下水準！

這裏有6款特式菜要先預定，我最想試的是泰式炒鮑魚......下次啦！

呢間舖得嗰4張枱仔咋！去之前記住先致電預約，因為朋友試過某星期六 7點半去到，等咗45分鐘都無位，結果掃興轉場。

泰爽甜

Tai Som Tum Restaurant

北角電器道 299 號街市大樓熟食中心 2/F

Tel: 3622 1795

Opening hrs: 6:00-11:30pm

——————————————————————————————————————–-------------------

本週《MORE》專欄精采內容：

踢走背部暗瘡 家居浸浴作戰

暗粒暗瘡是女性死敵，就算天生擁有完美肌膚，都難免被工作壓力、夜瞓，又或是突如其來的暗瘡侵襲。但我認為最不能原諒的，係你永遠發覺唔到它的存在，一但發現如臨大敵的背部暗瘡！

有咩辦法對付？

詳情請留意今期《MORE》專欄。

微博：http://t.sina.com.cn/yokot/

http://vipblog.orientalsunday.hk/yokot/

http://yokotsang.blogspot.com/ 

貴得有道理？

噚日講過 IFC The Box 係衆多 Beauty Press Con 據點，其實仲有同一層 H One，呢度嘅食物質素更高，當然各大美容品牌也就要花費更大！
上次 Guerlain launch Parure Pearly White 系列的  press con 就是在 H One，我通常晚刻同朋友去 H One 都係必食燒雞，當日 main course 我揀咗燉牛，本來望住大碟上面嗰件又細又黑掹掹嘅牛肉無乜奢望，點知一放入口真係難以置信，又軟滑、又 juicy、仲好重牛香味添，so good！稍後要約朋友再去食過至得！

呢碟主菜叫「燉牛」！咪睇佢細得可憐，只得一口牛嘅size，油脂、肉味滿載驚喜！

Guerlain 當日請來示範新產品的 model ，一衆傳媒認同靚到暈呀，真羨慕她的五官與臉形比例，精緻到似洋娃娃，其高貴與媚態非常切合品牌-法國嬌蘭！

轉入正題，噚日提過會揭曉我搽咗乜嘢令皮膚色 tone 即時好似變魔術咁-由暗淡無光變得神采飛揚，就係以下呢兩款產品，先旨聲明價錢確唔平，皆因既有化妝品美顏效果又蘊含大量上乘護膚素材呢！

似 skin care 的 make up！

推介一

Guerlain Lightening UV Base SPF 30 PA+++ $420 / 30ml

呢支係可以全面保護紫外線侵害(因為係PA+++)和抗氧化防曬面霜，兼具修飾，仲有美白和保濕護膚功效添！

相信大家都知，不同色調具有不同修飾功效：緣色可以降紅遮暗瘡印、紫色可以去暗黄膚色，咁呢支淡粉紅色防曬底霜又知唔知有咩功效呢？答案是塗上後即時透出紅粉菲菲的健康感。

此外，特別加入的微閃粒子令光澤感更強，可以掩飾倦容，膚色看來明亮剔透。

質地潤而不膩，在不想化妝的日子，我會單塗它便外出，令膚色看來均勻一點又有足夠的防曬保護。

推介二

雪花秀 Extra Refining Radiance Foundation SPF12 PA+ $760 / 30ml

未正式介紹呢個新歡-雪花秀新粉底霜之前，先重溫我之前追捧開的好嘢：

其實早於幾個月之時，我都一直係用緊 Guerlain 支 Lingerie De Peau 粉底液，我在《MORE》專欄內也有特別提及，盛讃薄、貼、水潤、遮瑕 ok。

咁好用，點解我最近又會轉？因為試新產品就係 beauty blogger 美容使命，哈哈！當然亦因為天然轉乾，所以呢款雪花秀最新粉底霜真係非常合時，讓肌膚有機會進補！

其成分滋補到不得了，融會珍貴韓方草藥配方，包括萃取自韓國西海大青島百年赤松活膚精華、珍雪複合油、選取 5 色種子嫩芽，並以珍貴溫泉水浸泡發芽，加上雪花秀著名「滋陰丹」及「滋陰補衛丹」為肌膚補陰，促進皮膚再生同時延緩衰老。

扭開瓶蓋，未搽上面，那股草藥芳香已飄出來，真的非常怡人。這個味道令我非常深刻，因為記得幾年前第一次到中環雪花秀店做 facial，那股清香在我面上一整天也不散，連同事都嗅到，勁！

試用後感：搽上呢個粉底後，肌膚水分即時明顯提升，感覺很保濕，乾紋都可以被撫平，連續日日用都無出過暗粒，簡直似搽咗護膚品嘅效果，卻又做到粉底應有嘅均色、柔滑肌膚作用，但若然雀斑或印痕明顯的你，這粉底就不適合了！

定價七百幾蚊確實唔平，好在我揀最淺 No 21 Natural Beige 色調，都啱媽咪一齊分享啫！

我無話打你入冷宮喎，俾個機會你同大家 say hi 啦！Guerlain Lingerie De Peau Foundation $420

——————————————————————————————————————–-------------------

本週《MORE》專欄精采內容：

踢走背部暗瘡 家居浸浴作戰

暗粒暗瘡是女性死敵，就算天生擁有完美肌膚，都難免被工作壓力、夜瞓，又或是突如其來的暗瘡侵襲。但我認為最不能原諒的，係你永遠發覺唔到它的存在，一但發現如臨大敵的背部暗瘡！

有咩辦法對付？

詳情請留意今期《MORE》專欄。

微博：http://t.sina.com.cn/yokot/

http://vipblog.orientalsunday.hk/yokot/

http://yokotsang.blogspot.com/ 

神采眼妝教學！

呢陣子特別多 beauty brand 搞 press con，一日有兩、三場，真係無誇張！就以今個星期為例，IFC The Box 絕對係至爆紅熱點，有3個品牌都喺嗰度搞 media launch，搶閘春夏妝品發佈，仲有臨臨種種美白 skincare 趕住炎夏前亮相。

如果全部去齊，就會忙過返工！誠然，我只會揀選合適時間、有興趣新品、特別偏好品牌，既是聚舊，也可第一時間掌握最新美容資訊報告俾大家知！

咁多新品喺手，精挑細選下，有幾款的確值得擁有嘅，今日先打頭陣係佢：

Kanebo COFFRET D’OR 的 eye palette -四色眼影 $310

向來買 eye palette，最怕幾種眼影色裏只獨愛一、兩種，其他打入冷宮，咪即係浪費 palette 設計原意，兼且嘥錢！呢盒早前推出的 Kanebo COFFRET D’OR 組合就非常合眼緣，有齊我心儀的顏色，包括粉紅、金啡、深紫、閃亮白米，用上重疊技巧，眼型輪廓層次就此活現；加上微閃粒子，皮膚會看來較潤澤，怕眼腫？眼線就是救星啦！

噚日喺屋企專登化咗個眼妝，即睇示範：

色系＃01 Sweet Brown

Step 1：打底去暗啞、閃亮顯眼窩

先用a色-閃亮白米，以毛掃將全個上眼蓋打亮，目的去除膚色暗啞及突出眼部立體感，緊記要顧及眼頭鼻樑位。

Step 2：加深眼褶位、眼窩更深邃

接著用b色-金啡，以大棉頭集中在雙眼皮褶位來回擦上，色澤會較顯現，中間至尾部要特別重手加色，可令眼窩看來更深。

Step 3：打亮眼頭、增大視效

接著用c色-粉紅，以小棉頭將色澤塗在上眼皮前部三分一，注意也要塗在下眼線前方，視覺上會更一體化，其閃亮度有增大眼視效，也有助散發淚汪汪迷人眼神。

Step 4：輕柔眼線、眼形改造

最後用d色-深紫，這是專供描劃眼線的柔軟質感，以像毛筆的小掃掃在上眼線，尾部拉長及剔起，看來更醒神；別忘記描劃下眼線，只須集中在眼珠底部至尾部，令眼睛看來更圓杏，眼神也不會太兇惡。

Step 5：描內眼線、眼珠醒神

 Bourjois Contour Clubbing(Waterproof) ＃41 black party，防水效果超勁，筆蕊軟硬適中，蠟質柔滑極易描劃，且容易上色，最緊要唔易溶化不怕變熊貓眼，是我至愛之選！(約百元，Watson’s有售)

由於我上排眼睫毛與眼珠間有明顯肉色露出，所以要靠劃內眼線將兩者視覺上連貫，會令眼珠看來更圓大，千奇咪睇少呢個步驟，確是化妝界magic step！

Step 6：搽睫毛液、對比鮮明

我最近先開始試用 Lancome 呢支mascara(Virtuose Precious Cells High Definition Curves & Length Mascara＃011 Intensive Black)，發覺擦頭可以做到睫毛根根分明，亦算濃密，效果自然。不過遇著潮濕天氣，其捲曲度 last 得唔夠耐，要再靠電熱棒幫手！

Step 7：加深上眼線、精靈富神采

Bourjois Liner Glitter Fizz ＃31 black star，超幼長掃頭，容易描劃，最愛黑中帶銀閃，效果 shinny，色澤無咁實，看來更型格；劃上一整日都唔易甩色，那就無須記掛經常要補色。(約百元，Watson’s有售)

妝前妝後對照圖：

自問，妝前妝後分別很大啊！我一向都認同化妝品的確係偉大發明，令女士們增加自信心呀！

***這兩張相 skin tone 有超大分別，聽日再話俾大家知我用咗咩法寶啦......待續。

———————————————————————————————————–

本週《MORE》專欄精采內容：

踢走背部暗瘡  家居浸浴作戰

暗粒暗瘡是女性死敵，就算天生擁有完美肌膚，都難免被工作壓力、夜瞓，又或是突如其來的暗瘡侵襲。但我認為最不能原諒的，係你永遠發覺唔到它的存在，一但發現如臨大敵的背部暗瘡！

有咩辦法對付？
詳情請留意今期《MORE》專欄。

微博：http://t.sina.com.cn/yokot/

http://vipblog.orientalsunday.hk/yokot/

http://yokotsang.blogspot.com/