BB著用！最潮小鞋子攻略

Adidas NMD Runner一出就有19款colourway，全球每一個地點都有恐慌性人龍排隊搶購，彷彿冇NMD就冇晒潮味。
好在NMD冇出BB鞋，否則要撲一對俾我個Yuji BB，我真係唔會咁樣排隊法！

好友在Facebook貼出他的作品，冇NMD又點喎！

我認為一對BB靚波鞋，可以令BB的造型更搶眼。可惜香港的行貨BB波鞋相當乏善足陳，例如Nike的Jordon Retro系列，本來係有Toddler size，但香港就冇行貨引入，就算係水貨店都只有熱賣炒款，來來去去都係Jordan XI，選擇之少，最好的方法，就係上網買。

Yuji著緊的Jordan I，紫色底加螢光橙鞋舌，小朋友著真係靚絕。自己都覺得有點莫名其妙，footlocker.com齊size，仲要由US$49.99減落US$34.99，仲要香港冇，無理由唔買！

二月去日本時，在原宿有幸見到同款女裝，只賣￥9,000（約$630），當然要買做母子裝，可惜冇我size，諗起可能係香港唯一、冇乜可能撞款的母子鞋，真係心嗡。

如果去footlocker.com、eastbay.com呢D外國波鞋網搵BB鞋，搵大熱的Jordan復刻款，keyword係Jordan retro infant（未識行著）、Jordan retro toddler（識行著）。我自己就覺得Jordan一代款式經典又夠簡約，最重要係當縮細成BB鞋款時，同原形唔會相差太遠，忠於原著神髓先靚。

最新入手有呢對Jordan I red elephant print，US$59.99。如果有女裝，我一定會買，可惜，冇。

另一對睇相就決定買的係Jordan I Denim，US$59.99。睇相時唯一擔心牛仔布效果未如理想，不過呢個擔心係多餘，實物靚到震，極期待會有女裝。

上外國波鞋網買BB鞋的唯一缺點，係運費不便宜，一對運費就要US$29.99，兩對就US$39.99，所以起碼買兩對以上先抵，逐對逐對買幾唔化算。

如果想穩陣又百搭，全白色Jordan I，冇可能唔買。US$39.99

我唔係淨係偏心Jordan I，我都有買其他Jordan，例如Jordan IV，老豆在Nikestore.hk抽唔到，我上網一搵就買到對返香港。

Jordan I雖然係心水選擇，但作為媽媽，幫阿仔著Jordan I，幾唔容易，拆開鞋帶，高筒設計幾難著入腳，一定要先撐鬆鞋籠，然後又要幫佢綁鞋帶。所以slip on款式遇上靚款，當然要立即著上腳！

adidas Stan Smith slip on，論正宗，當然係要綁帶款，toddler款有魔術貼搭帶同slip on，坦白講，搭帶款真係怪怪地，不如大膽D買slip on，竟然出奇地有型。

對Stan Smith係日本的戰利品，同時間仲有另一對戰利品係全白Nike Roshe Run，Roshe Run雖然係近年Nike一個非常popular的鞋款，不過將佢縮細成13cm就更加好睇，香港得其他顏色，但我對全白有特殊鍾情，又買。

Slip on造型真係好適合小朋友，自己又忍唔住手：

之前介紹過，去日本一直要朝拜Akachan，今次去就搵到呢對絨面馬仔Polo slip on，斯文紳士打扮不可少！

adidas最近在潮流界掀起大風潮的，除了同Kayne West別注的Yeezy、NMD Runner，Tubular都係非常重要的潮款，特別係我身邊的潮人朋友都加入Tubular系列，BB款仲特別，會同Star Wars crossover，white trooper Tubular。

買鞋俾小朋友，最怕買錯size，去eastbay.com可以搵到size chat，download and print，一比一實物呎吋，立即查出著幾多號鞋先適合。而我知，我應該買得太多了，好快就要再買大D，所以買鞋，買大少少唔怕，至怕大太多，行路會跘倒。

-----------------------------

全新概念食療養生館Y’s RECIPES隆重登場

香港美容專欄作家 Yoko Tsang | Promote Your Page Too

洗澡學護膚

沖涼是每天例行事，過後，皮膚感覺舒適清爽，水分足夠，這並非必然，相信很多人也有乾燥、痕癢、敏感泛紅等情況伴隨出現。大家可知一些看似微不足道的沐浴期間事項，加上選用合適自己肌膚的潔膚品，是相當重要，令每吋肌膚得到真正保護！

洗澡看似日常生活簡單事，原來當中有很多細節需注意，護膚還是傷膚，由自己掌握！

洗澡注意事項：
Q) 宜早或晚進行？
以科學而論，是宜晚間洗澡，當然要小心避免著涼，經過一天活動後，身體上布滿塵埃、油脂、汗水，故此在晚上洗澡，方可徹底潔浄。
Q) 相隔多久洗澡？
基本而言，應每日一次，方可保持皮膚潔浄，最多也只是兩日一次。因為身體死皮和油脂容易滋生細菌，引致體味甚或炎症，最常見是致敏原逗留在皮膚，加劇問題。
Q) 洗澡注意要點？
洗澡有適當步驟，先用暖水濕潤全身皮膚，然後在掌心置潔膚液，加少量水搓揉起泡，輕輕按摩皮膚，留意是用指腹，千萬不要用指甲抓啊，否則傷了角質層，就如打開「大門」，讓細菌和致敏原成機走入皮膚。
身體淋浴理想溫度，是水溫宜接近體溫，即37至38度，淋浴時間約15至20分鐘便可。
洗澡後，用毛巾吸走水分，動作是輕揉印乾，而非大力磨擦啊！
根據沐浴後，皮膚出現不同徵狀，就可以了解自己需要哪種潔膚產品，你是那一類？
敏感型-洗澡後，皮膚會一撻撻泛紅和局部痕癢。
角質型-視覺上皮膚粗糙又多紋，觸感上非常乾嚡，尤其是手踭、腳踭部位。
倍護型-女性私密部位時有痕癢，甚或是異味。

敏感型對策
對抗敏感性肌膚，需要成分溫和、天然不含化學刺激物、保濕度高和持久鎖水的身體潔膚液。

日本Enary身體沐浴露 $350/500ml （Y's RECIPES有售，銅鑼灣富明街2號寶明大廈3/F J室  電話：3565 5971）
我媽咪皮膚非常敏感，我給日本Enary沐浴露她使用，自此沖涼後即使懶於塗body lotion，皮膚亦大大好轉，沒有紅也沒有㾗啊！
我已經分享過多次，Enary的面部甲殼水可以拯救敏感肌，自己也是長期用家，以預防常化妝出暗粒，到今次才公開系列中的身體護理品，是媽咪用上一年多了，同樣主要成分是天然甲殼素，還有重點弱酸性氨基酸，性質溫和，能平衡皮膚PH值，是有效潔淨皮膚之餘，可高度鎖水，減少肌膚乾燥痕癢情況，亦可紓緩敏感和濕疹問題，尤其是皮膚極敏感者，洗澡後經常泛紅和痕癢，必試，有效改善問題；對於胸囗和背部容易出暗粒和暗瘡的，呢支沖涼液是好幫手，有甲殼素營養水為皮膚打底，其天然獨特抗菌特性，有效預防炎症令粒粒受控吖！瓶身標明不含防腐劑，那就長期使用也可安心。

角質型對策
新陳代謝慢的，皮膚更新周期就不是正常28天了，這樣會造成角質層厚，即是老化死皮堆積，皮膚自不然粗糙且多紋。

Dove溫和去角質柔膚沐浴乳 約$50/400ml （超市有售）
在潔膚步驟可對付這問題，就是定期使用含磨砂粒子的沖涼液，褪走死皮。以全身而言，每星期使用一次角質潔膚霜便可；對付手踭、腳踭部位，則建議每星期兩次。
提醒大家，緊記要先沾濕皮膚，才用角質霜輕輕打圈按摩，切忌在乾燥皮膚上直接推按，會對皮膚做成刺激。只需用手配合粒子沖涼液，忌再用硬海綿或刷擦，力度太大反而將完好的角質層搓走，表皮保護身體的功能就會減弱。我喜歡超市都容易買到的Dove去角質液，其性價比高，價錢抵，試用了衆多，這支身體用的磨砂顆粒超級微細，甚至比起很多面磨砂膏更輕柔呵護皮膚，加上有親膚滋養因子，洗澡後是潔淨不乾燥啊！

私密部位對策
女性私密部位是否必須用特定配方沖涼液？有很多爭議，女性私處的 pH 值 為3.8 – 4.2， 較身體部位5.2-5.8為低，使用弱鹼性的用品，是以不影響陰部的天然保護能力為大前提。

意大利Helan Linea Mamma女性潔淨液  約三百多元/200ml（http://www.infoskyglobal.com）
個人而言，認為在經期間、懷孕時和游水或健身特別需要，會較安心；而身邊女性朋友有尷尬情況發生時，如痕癢甚或是異味，也會尋找此類產品。
我有用較多人認識的Lactacyd 女性潔膚液，而在懷孕期則更認真研究，找了供媽媽專用的意大利牌子-Helan，是天然成分茶樹油和萬壽菊，不含化學起泡劑、不加防腐劑及色素，標榜弱鹼性的pH值去除陰部多餘的分泌物，有效抑制念珠菌，維持陰部pH值平衡，感覺是能保持較持久清爽潔淨。
-------------------------------
全新概念食療養生館Y’s RECIPES隆重登場

香港美容專欄作家 Yoko Tsang | Promote Your Page Too

2016 Rolex Daytona 預售價十萬

尋晚Facebook被Rolex Daytona洗版！

面世16年的116520鋼帶Rolex Daytona，終於有新款出！Rolex在今年巴塞爾錶展揭示新一代的黑面同白面Daytona（俗稱黑地同白地），換上新的Cerachrom陶瓷圈，變成：


新Daytona的型號叫116500LN（LN就是陶瓷圈的瑞士文簡稱），機芯沿用舊有的Cal.4130自動機芯，即係話，新錶只係純外觀翻新，Cerachrom陶瓷圈因為硬度媲美鑽石，對用家而言比較冇咁容易撞花，新淨度可以維持更長時間，同埋變成黑圈。唯一係白面的小三圈用回上一代Ref. 16520的黑圈，所以錶評人同玩家都一致認為新白地較有意思，因為似熊貓眼，所以有「Panda面」的別號。
當然，大家極關心新錶幾時正式推出同賣幾錢。根據以往慣例，新錶通常在展出後半年正式推出市場，可以預計新Daytona大約10月左右就到港。
價錢方面，定價為CHF11800，折為港幣大約$94,400，以鋼帶Daytona往績，炒價過10萬並不出奇。果然，有網站做preorder，真係炒過10萬：

自己作為Daytona的用家，Cerachrom陶瓷圈真係Rolex近年在物料上的最偉大發明，沒有Cerachrom陶瓷圈的Daytona，外圈的tachymeter極容易花，一花了，隻錶就好易「顯老」，我其中兩隻冇Cerachrom陶瓷圈的好明顯有這個問題，只有中間的116505LN因為用了Cerachrom陶瓷圈，戴了幾年都好似新錶一樣，所以新「鋼地」用了Cerachrom陶瓷圈，值得擁有！


第一個擁有新Daytona 116500LN的人？又係何方神聖？原來係Rolex代言人，網球明星費達拿！

連佢都係戴白面，似乎白地終於有出頭天！
不過，對我而言，我心目中的Dream Daytona，仍然係「四大美人」！


「四大美人」於2000年誕生，只係出過一年便停產了，新錶難尋，市場上流通的都係二手，錶帶又殘舊，幾難入手，我一直以來都搵緊以上「三大」，第四隻beach yellow非我杯茶，所以無謂放相咯。
除了呢三隻，仲有兩款Rainbow Daytona都係我的dream watch，到目前為止，有兩位「潮流教主」戴緊，第一位係TVB劇《潮流教主》，陳豪旗下編輯莊思敏，劇中每一幕都戴住：

另一位係現實中真正的潮流教主黃偉文Wyman：

兩隻Rainbow Daytona，有黃金款同白金款，定價七十幾萬一隻，靚到一個點係令任何一位女士無法抗拒，所以Rainbow Daytona就用價錢去抗拒你，等你以免受於誘惑，但救你免於兇惡，阿們。

------------------------

全新概念食療養生館Y’s RECIPES隆重登場

香港美容專欄作家 Yoko Tsang | Promote Your Page Too

《姊妹淘》的護膚秘密

上星期我有份做嘉賓的《姊妹淘》播出後，讀者的查詢及PM便接腫而來，大家都想知在節目中我所講的產品係乜東東？
礙於廣播條例，節目中所有產品都只可以背面示人，或者用貼紙遮住品牌名，為了方便大家，我就將節目中講過的產品在此公開。

好多年青女士都會遇上這個問題，買了太濃稠的面霜，點算好？

我自己就會用Moisture Lotion稀釋面霜，加兩滴便足夠。畫面中的，就是我非常喜愛的Enary Mild Moisture Lotion（又稱為甲殼水），因為可以幫到去暗粒同殺菌，平衡肌膚方面亦非常有效。$480一支（Y's RECIPES有售，查詢：35655971）


另一個將護膚品混搭的方法，係可以令Cream Mask有敷一次有敷兩次的功效：

答案就係加茶樹油




節目中綠色樽仔的是The Body Shop 茶樹油 $149/20ml
我屋企長期有茶樹油坐鎮，為粉刺和暗粒皮膚位置抗菌外，被蚊叮蟲咬也會塗抹啊！
關於以上提及過的產品及詳細用法，在以下連結有詳解：http://www.yokotsang.com/articles.php?p=20160114
另外，我都有介紹過其他混搭護膚品的介紹，可以重溫：http://www.yokotsang.com/articles.php?p=20151229

------------------------

全新概念食療養生館Y’s RECIPES隆重登場

香港美容專欄作家 Yoko Tsang | Promote Your Page Too

美肌秘訣 開門八件事

護膚兩個字，每個女性都掛在口邊，但說易行難，所以才有千古名句：「世上沒有醜女人，只有懶女人！」而我認為，恆心及毅力只是護膚的第一步，踏出這第一步，就要昂然進入關鍵時刻，正確的護膚常識。

以下8項，我稱為「美肌開門八件事」，唔係事必要你做，但你必需要認識，之後你的「護膚世界觀」就會打開竅門一樣，更加得心應手！

第一點：地圖塗面法

臉只得一塊，但膚質非完全相同，大部分香港女性都係混合肌，即T區油、面頰乾，兩區要分別對待，切記！　

泛油盛的皮膚部位，忌用太油的護膚品，否則加劇堵塞毛孔，宜用清爽型的、零油脂或輕油脂，注意補充大量水分就可減少因乾燥而出油。

相反，乾燥的皮膚部位，就要使用含高水份和適當油份的護膚品。

所以，不同種類和效用的保養品，可供每次護膚時候mix and match。

第二點：油份須補充

皮膚乾燥，就會標油，這是自然現象，然而油脂搭上空氣中塵埃，容易造成氧化和發炎，導致粉剌和暗瘡。

要維持肌膚水油平衡，防油脂分泌過盛，注意補水也要適量補油。

建議皮膚選用天然植物萃取的油份，減少致敏機會。

補充面部肌膚油份，可以使用一至兩滴純正面部專用護膚油加入面霜，或是添加了油份的精華液/乳霜。

第三點：補水後鎖水

有讀者告知，怕皮膚黏膩感覺，習慣只塗抹精華素，不使用面霜；更甚者是潔面後，什麼也不塗抹，只在臉上噴泉水噴霧吧了！這樣便大錯特錯！

補水之後要注意鎖水，即是使用精華素後必需配合乳霜，否則空氣蒸發皮膚水份，即是沒有持續保濕，皮膚自不然乾燥多紋快衰老。

如使用片裝面膜，無需清洗過水的款式，敷後就可省去塗抹精華素步驟，但也必需緊隨抹上乳霜以鎖水啊！

第四點：按步就班法

每次護膚都用上幾件產品，要皮膚真正吸收到所有護膚品營養，就必需按部就班將成分區分-由小份子到大份子，逐層塗抹覆蓋，否則阻礙皮膚滲透啊！

若然不清楚護膚品的成份結構，其實可以憑感覺去辨識粒子大小-稀薄（小份子）還是黏稠（大份子）。

除此之外，每塗抺一層護膚品，要待自然乾透或以指彈拍打助吸收，證明皮膚已經滲透了，才可以再塗抹下一步驟，否則阻礙吸收，甚至是阻寒毛孔致暗粒。

第五點：治粗大毛孔

毛孔部位泛油多，加上空氣中塵埃接觸致氧化，容易導致出粉刺和毛孔撐大，使用具消炎抗菌成份的調理護膚品可以幫助改善和預防問題。我喜歡使用認為有效的是-打底精華液如茶樹油，或啫喱面霜如甘草酸，作為防護屏障。

此外，塗抹在泛油脂盛的毛孔粗大T字位，宜用清爽型的、含輕脂的護膚品，透氣且減輕毛孔負擔。

第六點：皮黃暗啞No

素顔最忌「皮黃」，膚色泛黃暗啞，看來沒精打采！睡眠不足，運動不足，氣色不好，這亦跟氣血有關，飲食上可注意，多吃溫熱補氣血食物，如南棗、紅棗、黨蔘、北芪、薑、杞子、米水，可以促進氣血，令臉色紅潤，手腳回暖。

第七點：防暗粒卸妝

錯誤的卸妝方法，是爆暗粒和粉刺元兇，我極力預防愛護肌膚！

卸妝步驟心得是-

Step 1:首先，是用卸妝水配棉花抺淨一遍，帶走臉上大量妝物。

Step 2:接著，才用卸妝油或卸妝乳，在乾面上按摩及加水乳化。

Step 3:最後，用潔面產品及過水洗淨，確保沒有殘留物。

毛孔乾淨，可防暗粒和粉刺，也令往後護膚品更易滲透至肌膚深層吖！

第八點：抗眼底皺紋

呢點愈早實行愈好，眼紋一旦出現，做機或打針都不能100%挽回從前。眼精華+眼霜修護外，補水防乾紋，最佳辦法是在塗抹護眼產品的最後加多一個步驟-就是印上極少量薄薄的有機牛油果油或99.9%純度角鯊烯油，油份令皮膚鎖水效果大大加強，兩者特點是親膚性強易吸收，研究謂面部外，也適合眼部薄弱皮膚使用唷！

--------------------------------------------

全新概念食療養生館Y’s RECIPES隆重登場

香港美容專欄作家 Yoko Tsang | Promote Your Page Too