剛剛的日本之旅，我自己的購買任務只有一個，花了兩小時，一落機便直奔目的地，買完剛好830pm，吃個豐富的晚餐，之後四日都是為兒子購物，我只是在途中經過望兩眼，合眼緣便買，不合則一走了之，沒有浪費太多時間。
今次最大目的，就係要去日本最大規模的嬰兒用品店Akachan朝聖！
Akachan可以話係香港媽媽的血拼天堂，因為有好多新奇的嬰兒用品係香港搵唔到的，價錢方面，因為Yen平關係，好多都比香港便宜（睇完之後，你會發現，香港的嬰兒用品係好貴！），款式又多好多！而且，Akachan在6月15日起開始接受遊客退稅，點解我會知？因為我問有冇退稅時，在service counter內的中國翻譯對我講的，我在這裏，付了很多消費稅，但你們睇完呢篇文跟住去買，都會比我平8%（淚 ~~~）。
在東京都內，面積最大的Akachan位於錦糸町，相信好多香港人都未必聽過呢個地方，其實位於秋葉原旁邊，在新宿乘中央總武線向千葉方向，便可以直達錦糸町站。
在錦糸町北口出閘，向在行一分鐘就是KIT商場，商場6樓全層就是Akachan；5樓係無印良品同Uniqlo，兩個咁知名的品場都租唔晒全層商場，但Akachan可以租全層，咁你就知呢一層有成個足球場咁大的Akachan，係幾咁有規模！
一出電梯，就係服裝部，一望無際的盡頭，香港真係搵唔到咁大地方！
\
因為夏天關係，BB水上用品非常齊全，吹氣用品之多，震驚香港七百萬人口。
鞋部選擇多而廣，如非我先去了新宿伊勢丹童裝部（這個又係必去之處，另文再談），敗了好幾雙鞋子，才沒有在這裏失手。
強烈推介購買Polo BB鞋！左下角白色Polo logo帆布鞋，我在香港專門店買了，$400一對！同一款在這裏只售￥4,500，即係$279，點解會平咁多？
在香港，好多準媽媽都為之心動的Combi「幻の電動搖搖床」，有新出的典雅柚木啡色，非常名貴的樣子。
售價是￥57,000，即約$3,534，我在香港買要五千幾，這裏平足$2,000！原箱坐飛機寄艙寄回香港，都抵。
BB沖涼用品在這裏的選擇多如恆星，我最欣賞呢個麵包超人沖涼座，靠背可以調高低，躺平BB或坐著也可以，係非常方便的沖涼神器，印象中只是約港幣二百多圓，我沒有買，因為兒子已經可以穩穩的坐著沖涼。
迪士尼系列吹氣浴盤，￥1,371，約$85，0-6個月適用，如果屋企細，這個收納會幾方便。迪士尼吹氣椅子又係可愛到暈低，￥1,834，約$114，買來送禮做手信，又係無敵。
強烈推介在這裏買BB車，無論Aprica同Combi都平過香港，不過這些款式同香港一樣。所以我會推介在Akachan買香港沒有的款式，例如這個Jeep BB車。我其中一部BB車係Mini Cooper，同車廠買專利的BB車，一向同品牌設計相承。Jeep的大車轆粗礦外型，但輕巧的重量，我深深喜愛。
我最欣賞它摺起之後，可以成支棟高企定定。紅色品牌logo highlight仲好有「跑味」。
睇埋個價錢，￥9,074，約$563！在香港邊度可以搵到一部五百幾蚊的BB車係型成咁？除了車重達5kg呢一點未夠輕，我真係掙扎了三十分鐘買好唔買好！
因為同場有另一部我都好想買的BB車，叫「Pockit」，我在香港未見過有呢部聲稱全球摺得最細部的BB車！
就咁睇平平無奇，但係睇埋佢可以摺到好似notebook咁細部，重量是4.8kg，就係佢厲害之處！
價錢方面，￥18,334，約$1,136，淨係睇價錢，或者你試下用相同價錢，去荷花、Mothercare睇下可以買到甚麼？
最後我們好嚴格，希望搵一部3kg以下的BB車，又要香港冇，又要摺得細，本來非常屬意Pockit，但因為實在太多東西要帶回香港結果冇買到任何BB車，但以上情報，對於準父母係一件非常重要的消息，平得太誇張了！
至於我有甚麼收獲？第一係BB揹帶，Akachan的選擇真係多得太誇張，看看揹帶的counter陣容：
幾經試用，結果買了右邊的ErgoBaby Performance 尼龍透氣網布黑色日本特別版。
左邊的星星紋也是日本別注版，不過我嫌佢密封不透氣，香港夏天用，BB會好熱，透氣尼龍較通爽。全黑是我認為最低調而又不影響自己衣著的顏色，我買要￥19,800，約$1,250，退8%稅的話，約$1,157。同香港差不多價錢，但兩個款式是香港沒有的。
另一個開心購物，是麵包超人坐著的D-bike小童單車，適合一歲以上小朋友，甚有設計味的嬰兒玩具。
有四種顏色選擇，睇埋價錢，￥5,547，約$344，無慮即決，買夠兩部。
加埋其他衫褲襪、小配件、揹帶，以及幫朋友買的用品，買了這麼一大車，是不是很誇張？不過我相信父母們去到Akachan，同我一樣買咁多都唔奇。
尋日我提過，在日本幾日，我差一點在池袋東武嬰兒部敗了一部Stokke BB車，因為平得好過份。
左邊的是入門版Stokke Scoot，香港的公價是$6,980；右邊是頂級型號Xplory，香港的公價是$11,480。
Stokke Scoot日本的售價是￥79,920，退稅後是￥74,000，即$4,588。
Stokke Xplory日本的售價是￥132,840，退稅後是￥123,000，即$7,626。
一部平$2,000，另一部平$4,000，真係連日本機票都慳到一張！
我推介去東武買的原因，是日本大部份百貨公司雖然有退稅，但需收取1.1%退稅手續費，即係你只可以退6.9%，而非8%。但東武百貨是少有不設退稅手續費的百貨公司，真正退足8%，連呢一點都考慮埋，我真係為大家讀者設想，幫你慳到盡，哈哈！
不過，因為我坐JAL關係，行李件數上限是四件，實在無辦法帶一件原箱Stokke回香港，所以你們想買上述的大件產品回香港，事前計算一下寄艙行李的件數及重量，你會更加滿載而歸。
當完成了手頭上兩本新書的繁重工作，我說過一定要去一次旅行，放鬆一下，彌補自己閉關2個月的精神虛耗。
本來的旅行目的地，是日韓之爭，後來日圓突然急跌，結果便揀了成本較便宜的日本之旅。也慶幸自己沒有揀韓國，否則便有機會捲入新沙士的陰霾，我肯定要自我同兒子隔離，有一長日子未能見面。
我相信平日圓加上南韓這次事件，日本東京在未來日子會更受旅客歡迎，大家都會揀去日本「放血」！
淨係2件行李已經38.8KG，仲未計另外2件大手提寄艙行李，如果咁樣去坐國泰經濟位，我預計我的超重費大約要200美金！
之不過去日本掃貨，免費行李托運非常重要，最近我有幾位好友都因為坐國泰經濟艙，結果都因超重而加付額外寄艙行李費，每位都要100美金以上。於是大家都好緊張問我超重幾多？加了幾多運費？因為我3月份才去了一次，她們都肯肯定認為我的掃貨個性，一定超重，仲要畀唔少超重費。但我的答案出人意表：「一蚊都冇畀過。」
後來上網check一check，原來國泰經濟艙的免費行李托運上限是20KG（件數不限），雖然我是Macro Polo銀卡會員，再額外多10KG，但一般旅客如果去日本掃貨，只有20KG真係唔夠用，就算我有30KG都係唔夠。萬一超重，每KG收費20美金。
至於我點解一蚊都冇畀過？原來我3月份坐ANA，每人免費寄艙行李上限2件，每件不超過23KG，即是每人有46KG寄艙位，二人同行就有92KG寄艙位，帶2個大喼加2個大手提行李袋，點買都唔會超重，比國泰多一倍有多。
這是我去其中一個買BB用品的戰績！我坐JR將以上戰利品搬番酒店我已經覺得好神奇，更徨論帶番香港，我真係覺得為個仔，真係可以去到好盡！買得咁多，因為真係比香港平好多，我甚至想過買一部STOKKE BB車返香港（平過香港好多好多），不過真係超重（加上被強烈制止）所以先放棄。
就算剛剛坐JAL，免費寄艙行李重量同ANA一樣睇齊，結果有沒有超重？話俾大家知，我買了2兩部小童單車，大大的一盒，一共2盒都沒有超重。（今次重要買BB用品及衣服，日本又多選擇又平過香港，我會另文再介紹去邊度買又平又抵的BB用品，媽媽們要留意這幾日的blog文！）
之前的一篇文章教大家搵平Yen（重溫：Yen大跌！買爆日本搵平Yen攻略），然後到這一篇就是揀航空公司，記住，要掃貨，一定要坐日本航空公司，唔怕行李超重。如果你真的掃貨，住酒店都有貼士，一定要搵有機場巴士直達的酒店，難道要將這麼重的行李從酒店推去車站？再搬落月台？平價酒店而又有機場巴士從酒店出發往機場的，在新宿有華盛頓、在池袋有太陽城王子。當然，也有其他店有機場巴士，不過已經不是平package，這一點值得大家考慮。
