上個月，我在日本購入衆多最新熱賣話題護膚妝品，大家看罷以下我的精采推介，即使未能身處日本，都可以托好友帶回港、網上代購、水貨店搜刮等，輕易買到試用吖！
介紹產品之前，最多人梗係問日本邊度買到！我通常都話一般藥妝店都有，可能有些讀者誤以為係普通的藥房，其實要搵得最齊，一定要行多幾間，唔單止藥房，我連激安之殿堂、@COSME、任何百貨公司內的妝品店都係我的目標，例如日間會行妝品店，夜晚食完飯就會去激安之殿堂，買到凌晨兩三點，所以先會搵到咁多特別的藥妝品。如果時間有限，只可以行一間的話，新宿「AINZ＆TULPE」絕對係首選推介！
我話佢係best of the best，因為樓高三層，貨量同款式都非常多，同埋有個重點：
2樓有半層係Cafe，同行的男朋友、老公、家長，或者對藥妝品零興趣的同行友伴，一於叫佢上2樓坐下休息下，上網打機打發時間，咁你就會買得好放心同安心。
而最最最最重要係，新宿「AINZ＆TULPE」的地庫全層都係免稅櫃位，如果一般藥妝店，通常只有一個免稅櫃位，想免稅，隨時等45-60分鐘。我去咁多次新宿「AINZ＆TULPE」，從未試過要等退稅，真正「速戰速決」，一分鐘都唔浪費。
呢個東京藥妝best kept secret，唔好同咁多人講，我同你知就算啦 ^_^
地址：東京都新宿區新宿3丁目36-10 ミラザ新宿ビルB1F～2F （JR新宿站東口對面、adidas隔籬）
入正題，今年夏天有乜必買品？最直接梗係重溫我的FB Live Video：https://www.facebook.com/yokocolumn/videos 其中的［🏼HK$150 日本超平 好評 護膚妝品］
入面有完整介紹，而呢篇blog，就有其他補足。
話題遮瑕x筆刷
家陣買支名牌化妝掃都要幾百元啦！呢支日本遮瑕筆刷AREA FOUNDY，是雙頭設計，一邊是遮瑕掃，另一邊是遮瑕液，日本大廠出品，HK$200有找，我評為激抵誘惑價，梗要買啦！是2016春天新品，3月上市，在網路充斥達人和日模瘋狂分享，差不多是一致的好評，理想當然成為我東京必買清單！
呢期話題品是AREA FOUNDY遮瑕筆刷，雙頭設計，先在眼底點上遮瑕液，再用遮瑕掃勻開。¥2500/支
遮瑕掃是觸感一級棒的大和匠筆，掃毛濃密富彈性，能夠將遮瑕液刷得特別均勻貼薄，做出延展性極佳的超貼妝；而遮瑕液是加入美容液，水潤輕薄及略帶光澤，可於遮黑眼圈同時提亮修容，黑眼圈淡化，蘋果肌更是立現。我特別喜歡這化妝掃頭有蓋，保存較衛生，也方便外攜補妝。共有兩種色號：COVER 和NATURAL，我膚色較白適合用「COVER」，加上希望highlight效果顯見，呢隻色光澤感強。
使用方法：官方建議先用遮瑕液點在眼底三角位置，然後用遮瑕掃拖得均勻又夠薄。我建議可兼用於虎紋位作提亮，視覺上pump up皮膚，減輕紋理。
淡化黑眼圈外，眼底也像打上了蘋果光，看來較精神和面容立體！
專業卸濃妝水
誰是日本平靚正定妝蜜粉？多年獲得日本最大美容網站@Cosme「蜜粉類第一名」，是Chacott，我在幾年前的專欄文章分享過，它於日本美容界乃權威品牌，芭蕾舞者專業彩妝品，最出名是蜜粉，防汗防油脂超持久妝，¥1500/盒，已有多達170g容量。
在香港和台灣就有很網民留言「沒有專櫃，如何信得過，驚用了假貨、過期倉底貨」，其實在日本藥妝店可輕易買到正貨。
我今次反而不是推介蜜粉，而是滄海遺珠的Chacott卸妝水 ，是專業用的，性質溫和而潔淨力特強，瓶身印上「特別為卸除舞台濃妝」，「供敏感肌專用」，「六大不含-化學添加物、油份、色素、酒精、防腐劑、香料」。用法是以棉浸卸妝水拭抺妝容，不用過水，使用後感覺是清爽乾淨，但防水睫毛液就當然不能卸清。500ml大容量只售約80多港元，抵用！
防倒刺潤甲膜
面部可以敷mask，指甲都有專用甲膜！
這支修護甲膜，在家DIY就可以享有專業美甲效果，用法是先潔淨指甲和抺乾，然後將營養液塗抹在指甲面連及甲邊皮約3mm，即是容易乾燥至倒刺甩皮部位，特別之處是塗上有色甲油後也可使用，當然亦可用在腳甲啦；待數分鐘完全乾透，就可以在邊位捽至捲起，然後整片撕掉。
這甲膜有什麼效用？為指甲及甲皮位置滋養，減少斷甲情況，更可即時令甲面帶微微亮麗，是DIY健康美甲好方法；根據盒上所示含有天然植物油，如可可芭油、黃春菊花精華、山桑子葉精華及海藻精華，所以每次敷上後，指甲都散發清新香味。個人建議每星期用兩次，保持指甲健康啊！
========================================
你好！
回覆刪除請問想要中環45分鐘針清洗牙$800
地址電話，可以給我嗎？謝謝？
My email: milkhuitamama@gmail.com