2015年6月24日星期三

日本搵食攻略Tabelog運用技巧

去日本旅行,臨上機前都會去機場書店買本日本旅遊天書,你都有這個習慣?

我已經戒了這習慣,每次都係亂行一通shopping兼搵食。 行街亂行一通還可以,去到日本,日文都唔識多隻,點搵食?以前的我,凡遇上寫明內有中文餐牌、內有中文待應的,我一律不會光顧,因為日本食肆要用到這一招吸客,在日本人心目中,這餐廳好極有個譜。

在今時今日,香港openrice橫行,日本一樣有食評網,功能類似openrice,叫「Tabelog」,相信資深旅日港人,一定聽過,但應用上,我可以再詳細一點剖析一下,學懂了,你在日本搵食會更加得心應手。 曾先,你身在日本一定要上到網,開通數據漫遊或租部Wifi Egg上路,最緊要無限數據喎。 然後,用手機上網,去www.tabelog.com這個網址。

在地區一欄輸入你想找的地區,在食品一欄輸入你想搵的食物類別,再search便完成。 當然,你會問,我都唔識日文,成點輸入日文去搜尋? 其實用iPhone的日文輸入,係十分方便及容易,只需在設定、輸入法中剔選日文,而這個輸入法係用英文拼名做輸入,用落便非常簡單。 首先,我相信你一定會知道你所在地區的英文名,譬如新宿就是Shinjuku、涉谷是Shibuya、池袋是Ikebukuro,我今次住池袋,就先鍵入i、k、e、b、u,聯想字已經彈出池袋給你選擇。  

至於食品類別更簡單,sukiyaki、sushi、yakitori、robatayaki等等。  
  有齊上述兩樣資料,按搜尋,就有結果彈出,由高分到低分排列出來。
當中評分準則有三項,分別是「晝」、「夜」及「總合」,即是午餐評分、晚餐評分及總評分。如果你同我一樣未成為會員,就只可以瀏覽總合的評分,但已經非常足夠。 我最欣賞日本人的評分準則,不是單靠「笑臉」、「喊臉」,是認真的從0-5之間評分,得出一個平均分。 

  於是,你便很興奮的想試下每個類別在每個地區的第一位,而答案往往會令你失望,因為大部份都要預約,特別是坐位少的Sushi,所以要留意餐廳的「席數」,我就因而摸過幾次門釘。 

  後來我終於試到一間位於池袋區排名第一位的Sukiyaki,叫月亭,就在池袋西,中午12去食第一輪,應該毋需預約吧。然後網站連結Google Map,一按地址,馬上帶路,方便到極。  

果然,我是頭一批客人,順利入坐。 午餐果然抵食喎,特選豚肉Shabu Shabu,Lunch價格只是¥1,000(約$63),特選豚肉Sukiyaki也一樣是¥1,000。  

但係一場來到,當然要食和牛,極上飛驒和牛定食(Shabu Shabu或Sukiyaki),¥3,000(約$189),唔係貴,一份Shabu Shabu加一份Sukiyaki唔該。  

飛驒是目前盛產冠軍級和牛的產地,蔡瀾已經不止一次推介,今次親臨日本,3片飛驒和牛真正靚到冇得彈,即係大約$60一塊,香港邊一間餐廳用呢個價錢食得到?  

飛驒和牛入口即溶加上豐富的油脂混入極上的牛味,最後當然要追加多一份,單點3片飛驒和牛只需¥2,800,約$176。  

同樣一個餐,晚市定食價要¥10,000(約$630)!我兩個人食午餐,追加多一份飛驒和牛,埋單一共¥8,800,平過晚市一人前,返到香港唔介紹俾各位讀者,「為食神」會罰我變肥師奶呀! 

月亭 
東京都豊島西池袋1-39-1 
+81-3-3986-3321
—————————
全新概念食療養生館Y’s RECIPES隆重登場
Instagram

1 則留言:

注意:只有此網誌的成員可以留言。