2015年3月17日星期二

這麼近 那麼遠 的東京

東京之旅後,在機場回家的車程中,聽到容祖兒翻唱張學友的〈這麼近 那麼遠〉,正好用了總結這次東京之旅,我看到日本的變化。
站在原宿表參道的行人天橋上,正好是日落的magic hour,拿起iPhone,隨意snap,竟意外失焦,迷迷糊糊的相片,好像代表東京也變得陌生了,是嗎?

因為今日的東京,已經不是我以前所認識的東京。

藥妝店多得泛濫,新宿街頭就似銅鑼灣Sogo後面駱克道;原宿、涉谷的時裝小店幾近絕跡,取而代之是日本的連鎖式時裝集團。食肆門口貼滿「內有中文餐牌」,銀聯標誌比JCB咭更「明張目膽」。

連我最喜愛在晚間流連的歌舞伎町也翻天了!一座全新座落的巨型地標,已經取替原有的COMA Theatre,還送上一隻巨型哥斯拉在上。
夾公仔機店(UFO Catcher)也買少見少,本來五步一小間,十步一大間,現在五隻手指數得晒。
好在仲有我最愛的鬆馳熊可以為我提供晚間消遣。

一場來到東京,又點會少得去中野睇下手錶?我寫過好多關於去中野購買手錶的blog文,似乎已經成為香港人去中野買錶的指南。點解咁講?當日,我就遇到2位朋友,就係睇過我的blog而照跟。在香港約都冇咁易約到,偏偏在東京就遇上。
不過,去中野買錶,今時今日已經冇咁易搵到平靚正款,因為太多香港人、中國人到此朝聖,加上日圓匯率最近都穩定下來,冇款揀,又唔見得比香港特別平,除非日圓突然又再暴跌啦,捕捉到剎那間的跌幅,咁就可以執到平貨。
我去中野買錶已經超過十年經驗,我從未見過Jackroad的Rolex存貨少得咁可憐,上圖一眼望晒,包括了新錶及二手錶,只有兩格櫥窗咁多,以往Jackroad的Rolex存貨是成間鋪每個櫥窗都係Rolex!
識得買的,已經識得網上預留,即是日文的「商談中」,全部都寫上中國人名字。

今次日本之旅,遺憾地身在東京,但已經不是我熟悉的東京。雖然我都算滿載而歸,不過花了不少氣力,去找尋東京的獨有感覺,下一年,我依然會選擇去東京。

另一個遺憾,或者應該用用後分享來提醒大家,關於海外WiFi Egg。我一向都係用網絡商的數據漫遊day pass,不過今年加了價,每日要$198,去五日,即係近$1,000。豈料買package時,有平價WiFi Egg,每日$87,最多可以接駁十部產品,$435/5日,平成半,兩個人一齊用,平均每人$200多D,一於試下 。頭三日,快夾爽;最後兩日,幾乎失去聯絡,完全冇法上網,只能用Whatsapp的text,其餘facebook、傳相等等,慢到喊,應該估到係變了低速傳輸。回港一check,高速4G數據只包3日共1GB,兩個人除開用,每人500Mb/3日,似乎只係適合1人1蛋。魔鬼在細節中,只怪自己冇睇清楚,中伏不得怨人,唯有當成經驗分享,大家留意。 
全新打造個人官方網站www.yokotsang.com已經面世,內容更集中,更易搜尋昔日文章及追縱美容軌跡!

沒有留言:

發佈留言

注意:只有此網誌的成員可以留言。