2015年1月29日星期四

自家「蘿蔔清湯腩」

銅鑼灣係我最經常去嘅區,仲有一處地方好鍾意逛逛添,就係時代廣場......不是買名牌,而是再穿過隔離橋底嘅街市,入面有檔牛肉檔,下午5點幾都仲有靚部位俾我任揀,相對灣仔同埋北角街市(12點左右早已沽清啦,有筍嘢亦留俾酒家囉),呢度可謂真奇妙!
-
噚日下午4點,我去Y's Recipes 巡店,因為有好友預約我,話要狂掃花膠扒;接著5點幾帶埋Yuji同媽咪去街市,yeah.......仲買到超靚部位-牛坑腩和牛筋膜呀,因為老公勁鍾意食牛,一次過買$150蚊煮多D啦!結果,老公當然讚不絕口,仲食咗兩大碗飯添,haha,我係魔鬼廚神,最叻谷肥身邊人!
-
今日分享我煮蘿蔔清湯腩嘅步驟啦!

*我喜歡「牛坑腩」肉位爽中不嚡口、「牛筋膜」位置軟腍多膠質。
*白蘿蔔家陣靚絕,又清甜又多汁又無渣,索晒牛腩汁精華,正。
*若喜歡唐芹菜的味道,可加入以提升整個湯汁的清香,兼減低油膩感。
*用生鐵鍋炆食物,好處是均勻導熱,防止水分散失和減少食物營養流失。Le Creuset 咁靚仔,當然煮得更稱心,食得更開心啦!
-
烹調步驟:
1)水滾放牛腩,以大火6分鐘出水,洗淨備用。
2)醃牛腩-胡椒粉、麻油、豉油、糖,及豆粉(令肉質較滑溜)各少量。
3)以乾葱頭、生葱、蒜、大量薑(拍扁)下油爆至金黃色,落牛腩用大火爆香2分鐘。
4)落生水份量足夠炆牛腩約1小時(完成要有湯汁剩),記得加冰糖(約一粒方糖尺寸),可令肉質更軟腍,先大火滾起轉細火,全過程蓋上。
5)最後10分鐘,加鹽及白蘿蔔。
6)最後2分鐘,加唐芹菜。
-
出面食肆叫個「蘿蔔清湯腩」,牛腩少蘿蔔多就梗㗎啦,部位大多唔靚,明白將貨就價要交舖租人工........所以某些菜式還是自己動手煮,才可以品嚐最佳口感味道。

————————————————————————
全新打造個人官方網站www.yokotsang.com已經面世,內容更集中,更易搜尋昔日文章及追縱美容軌跡!

沒有留言:

發佈留言

注意:只有此網誌的成員可以留言。