2014年8月29日星期五

保護頭髮 潔浄步驟貼士

大家別看少「洗頭」這回事,步驟正確的,就是令頭皮和髮絲健康主因;反之,就是日復日的傷害!
不論是男是女,髮型是短是長是直是捲,以下洗髮程序基本知識,你一定要知道啊!

髮型與妝容同樣重要!我現在是及腰長直髮,
需要時刻好好保護,以免乾燥和打結啊!
-
悉心照顧下,有成績可見,就是如此及腰長度,
營養也足夠至尾部,沒有開叉吖!
-
我屋企其中兩格櫃,放滿了各式各樣功效的洗髮液、護髮素和髮膜等,
供不同季節、頭髮情況使用,量多夠用足一年啊!
-

要點一:洗髮前一分鐘功夫
相信,十居其九女士,洗髮前都無做預備功夫,説的是用髮刷將頭髮徹底梳開,既可以預防頭髮打結,在清洗過程中減少拉扯,也能去除頭皮上皮屑。這步驟只需一分鐘,足以發揮多個效用。

要點二:洗髮過程正確步驟
1)先用溫水將頭皮及頭髮弄濕。
2)將洗髮液倒在手心,加水搓成泡沫,因為豐富泡沫才能溶解污垢;切忌將洗髮液直接塗在頭皮,有機會引起刺激出現頭皮屑問題,也有機會阻塞毛囊致脫髮。
3)搓出豐富洗髮泡沫後,用雙手指腹摩擦頭皮及髮絲,以徹底去除污垢,切忌用指甲抓,會令頭皮損傷,頭皮也是皮膚,需要好好保護,試想,難道潔面時,你們也會用指甲去抓面部皮膚嗎?!
4)然後是用溫水沖掉洗髮液,若是長髮(過肩),宜再用洗髮液潔淨一次,最後用指腹按摩配合溫水不斷沖洗,至頭皮和頭髮徹底潔淨為止。
*油性髮質,宜天天洗頭。
*中性至乾性髮質,則可隔天清洗。

要點三:使用護髮素宜忌
1)塗抹護髮素時,頭髮不宜太濕,因為水分過多會稀釋護髮素營養,使吸收效果減弱,而濃縮的護髮素就如髮膜精華般,補充頭髮所需。
2)切忌將護髮素塗抺在頭皮上,護髮素效用如其名,只應塗抺在髮絲上,以免因成分油膩而阻塞毛囊。
3)可配合戴上浴帽數分鐘,營造蒸汽效果,加強髮絲滲透營養。
4)宜用溫水徹底沖淨頭髮,最後用冷水淋一次(像過冷河般),目的是冷縮原理,令毛囊收縮,也有助髮絲鱗狀表層封閉,以鎖住水份和營養。

要點四:抺乾頭髮咪亂來
1)頭髮在濕狀態下是最脆弱的,抹乾時,千萬別用毛巾大力來回摩擦,容易打結,及傷害髮絲鱗狀表層引起折斷;應該以毛巾配合拍打按壓手法,以吸走頭髮水份。
-

洗髮過程完成後,我習慣在吹髮前再下保養功夫,是使用專攻
頭皮塗抹的修護液,以補充水份,就如潔面後在皮膚塗上保濕面霜般。
家中護理配套:
相中(右邊)全是頭皮專用修護液,功效有防脫髮、育毛、補水、抗敏等,我可以因應頭皮及天氣所需配合使用!
相中(左邊)是頭髮專用營養液,有油狀、乳液狀、水狀,迎合我直髮和曲髮時選用;功效有補充蛋白質、補水、增加亮麗、倍添順滑、減少毛燥等。

2014年8月27日星期三

自製最健康凍飲 冰鎮羅漢果菊花茶

我一向謝絕凍飲,因為凍飲對腸胃唔好、對皮膚唔好,總之冇乜好,所以一向少飲。
我近期的「手袋飲料」是南棗代茶,用炒過的紅糙米加南棗煮成,注入手提暖水瓶放入手袋,隨時飲用,更特登買個Hello Kitty暖瓶,cute cute!(關於這個南棗代茶,請重溫:http://vipblog.sundaymore.com/yokot/?p=13612

不過,爸爸就同我相反(更正:所有男人都係咁),只會打開雪櫃拎起罐可樂,冇益又唔健康,因為他們都沒有養生觀念!
為制止呢個情況,我唯有花多少少功夫,炮製一個「冰鎮羅漢果菊花茶」,有清熱消暑潤肺解燥降火作用,用佢代替可樂、汽水,起碼健康D,如果肯熱飲(或暖飲),咁就為之very good嘞。

材料:
大廣西羅漢果1個、桐鄉杭菊一撮、陳皮少許、清水2公升

製作方法極簡單,將羅漢果洗淨,然後破開;陳皮用熱水浸軟後刮囊,連同清水煲滾後轉慢火再煲30分鐘。熄火後加杭菊再焗15分鐘即成。茶涼後便可飲用,或放雪櫃雪凍飲用。

看似簡單,但精粹是材料這一環,如何挑選靚羅漢果?菊花又點揀?原來好多人都唔識!

揀羅漢果,首要條件冇裂開,拎起搖一搖,要無聲,證明果囊緊附在果殼上。表面要有毛茸茸,好似奇異果咁樣就為之very good嘞。(當然,哪些毛茸茸不會同奇異果一般密)街市好多時有10蚊4-5個,全部都同我的揀選準則相反,咁你就知有幾差。
我買的大羅漢果要$4.5一個。

然後是菊花,坊間圓形一大餅的菊花餅,都係劣貨,因為都係揸過「菊花精」後的剩餘物資,冇乜菊花香味,唔好買。胎菊亦非我杯茶,真正為之very good的菊花,一定要中國桐鄉產杭菊先係靚貨,特點是沒有散賣,原裝「一封」發售,好似一舊磚,一封重500克,都只不過$110,一打開香氣湧埋身,你個鼻會識得同你講:「靚貨!」

陳皮,我坐月時買落好多,不用再買咯。
OK,整個咁健康的「冰鎮羅漢果菊花茶」,當然入落可樂樽再放入雪櫃,一於測試下爸爸會點揀。唉,大失所望,咪又係拎起罐可樂!(唓)

可惜我無氈無扇,真係要搵街頭魔法王班魔術師,將冰鎮羅漢果菊花茶話變就變入可樂罐先得!

2014年8月25日星期一

精華盡吸 敷面膜法

你識用paper mask嗎?
或者你會反問,乜要技巧咩?
Of course,敷面膜紙,咪以為淨係睇品牌、揀精華素咁片面;試想,若然敷上面後,張面膜紙浮起晒,精華根本唔到肉,難道毛孔吸空氣都有用咩?

點揀超級貼面嘅面膜紙?
判斷方法:我嘅要求係企直、跑步、甚至掌上壓......面膜紙都唔會移位,咁就為之very good喇!

在此,矯正一般人思想,非看盒面字眼咁簡單,面膜盒印上「3D剪裁」又如何,每個人面型輪廓有別,有人立體,有人扁平嘛!


我偏愛「生物纖維面膜」,俗稱「人皮面膜」,面膜紙質非一般,是恰似軟啫喱般,製作成本會較貴,好處是當接觸面部體溫,就會牢牢緊貼,尤如第二層肌膚,面膜紙與皮膚形成密封對流,精華營養就可以被皮膚盡吸。

---
此外,最最最重要是質地,如面膜選用的布料有彈性,即使偏細張也可左右兩邊拉到貼貼服服。
還有注意事項,是面膜紙精華素一定要夠多,這樣夠濕潤,才可以緊緊黏附每吋皮膚。

當㨂選到合符以上條件的面膜紙質,另一要告知大家的重點,是進階敷面需注意事項。
事緣某次,在雜誌看到有位從不重視護膚的「美容人」示範喜愛的面膜紙品牌,竟然敷到浮起晒,甚至大幅的掉下狀態,顯然是不懂處理,令我驚醒,別看少敷面膜紙呢回事,真係要technique㗎!
-
心得如下,步驟:
敷面膜紙時,先處理妥當鼻子位置,確保鼻翼邊位冇浮起,接著是撫平眼部四周位置。
然後才掃平開去順移至額頭,到面頰及下巴。
由於大部份面膜紙都不能完全顧及覆蓋眼底部位,及鼻尖,故此需要自己下點心思和功夫,就是看看那邊位有剩餘的面膜紙,剪下來貼在被遺留的皮膚部位,咁就全面都兼顧得到喇!

最後提醒大家,在面膜紙精華約8成乾,就要從下向上方撕掉,否則反吸走皮膚原本水份啊!


2014年8月22日星期五

做Doublo定Thermage瘦面好?

當今市場上,能夠唔用針劑而可以做到瘦面效果,一定是現時叮噹馬頭的醫美儀器:HIFU儀器及Thermage。這兩種儀器,採用截然不同的技術達到瘦面效果,同樣效果顯著,於是很多讀者email問我,到底二揀一,應該做HIFU?定係Thermage?

首先,如你未認識呢兩部機,可以先重溫:全球嶄新瘦面提升技術「壓軸篇」
如果你想比較兩者之別,可重溫:強勢機王 拉面皮回春 <壓軸篇>

以我個人親身經驗,無論HIFU定Thermage,其實無話邊部好過邊部,反而應該理解為,邊一部先適合自己去做?

這個要從面型、輪廓、面部肌肉、皮膚狀態、鬆緊度有密切關係。
先了解兩者特點:
Thermage --- 以強大單極射頻能量,刺激皮膚底層增生膠膠原,使肌膚回復彈性及緊緻。所以適合因年齡或沒有保養的肌膚出現的下垂、鬆馳,透過刺激骨膠原增生,將下垂的臉部提升、鬆馳的肌肉收緊,於是從新得到緊緻的臉型。這類人士的「闊面」並非因天生而成,主要是後天因素導致。
HIFU --- 以高能量聚焦超聲波技術,燒灼深層皮膚或筋膜層,得到拉皮效果。所以天生圓面的脂肪肌肉型女士、咀嚼肌厚實的人士,他們的問題都是先天性的,HIFU儀器就是你所需要的。而HIFU能做到定點式聚焦發放熱能,可以做到輪廓雕型,對輪廓比較有要求的人士也比較適合。

都係唔明?唔緊要,我用真人例子做講解。
以網絡紅人、「世界盃燈神」大埔Lulu為例,她芳齡21歲,天生圓臉,沒有臉部下垂及鬆馳問題,如果要用儀器瘦面,HIFU儀器就適合她。因為她需要以高能量聚焦超聲波技術,燒灼深層皮膚或筋膜層。做完之後,她會立即見到瘦面效果,面部肌膚會感到非常緊緻,不過效果只係短暫,大概七日左右回變回原狀。但不過擔心,約2個月後,細胞重組後,就會變回最初做完儀器的效果。
另一個例子,最近經常出現娛樂版的51歲「美魔女」景黛音,年齡關係,會有臉部肌肉下垂及鬆馳的問題,要令佢出現真人版「美圖秀秀」後的效果,做Thermage刺激骨膠原增生,將下垂的臉部提升、鬆馳的肌肉收緊,就可以做到,不過做完機之後,不會即時出現效果,約2個月後,當骨膠原被刺激增生後,就會出現amazing的效果。

(圖中是約1年半前的我)
而我本人,試過做完Thermage後再做Doublo,就出現出所未有的小臉感,不過,我個人認為過火了,大家見過我都說臉太瘦,因為我先天就是瘦臉,做Doublo會瘦上加瘦,出來輪廓不夠好看。幸好,上述儀器約莫維持12-18個月便會打回原型,加上懷孕後面型肥了少許,現在予人的感覺會較為健康。如果再做的話,我會揀Thermage,因為我會以增生骨膠原為本,讓輪廓變得飽滿細緻有彈性,才是我的需要。


如果你仲係舉棋不定、心大心細,我會建議你去一間有齊Thermage及HIFU的醫美診所,由皮膚科醫生幫你分析後再決定所需。當然,一次過做齊HIFU+Thermage,可以做到非常細緻的面部修型,但budget所限,未必人人都有能力負擔,所以當作出二揀一的決擇時,由醫生做分析會比較有理據。有時讀者問我做HIFU定Thermage好,我真係好難判定,因為我無法為你現場了解,就算提供埋相片,拍攝的角度問題,亦未必讓我能準確分析,這亦解釋了為何我難以解決你們的問題的原因。
————————

2014年8月20日星期三

機械式防致敏對策

因為我的BB都有輕微皮膚敏感情況,令我對預防皮膚敏感又有新的體會。
我一再強調,皮膚敏感只有預防,沒有徹底的根治方法,成功防止敏感,便當成「醫好」而已。

預防方式又係好老土:注意飲食、避免刺激性食物、戒煙酒、小心使用護膚產品,同埋保持個人衛生整潔。

要維持上述紀律,做得到的人,我相信你會覺得世上無難事,又或者你已經係一位成功的社會人士。因為大部份人,包括我,都好難做齊上述事項。

於是乎,我會不停發掘好食又健康的食肆、研發自己適合又喜愛的食材;我一向不煙不酒,這個易辦,時下流行的雞煲、麻辣窩係我的最愛,唯有盡量淺嚐;護膚品難我唔到,我好少中伏;個人衛生呢?我會找些有趣小電器,增加我使用他們的機會而令居所衛生整潔。

例如我寫過呢幾篇文章:《防暗粒,要抽濕!》、《無菌空間護膚法》、《孕婦 BB AirFree》,都係我盡力將屋企變得企理整潔乾淨的小法寶。

而今次我又再搵到新法寶幫手,係一部無線手提吸塵機---Dyson Digital Slim。
未有BB前,我一直與貓毛共存,不過宜家唔得啦,所以要經常吸塵,如果每次都要拖部吸塵機出來,真係好唔方便(懶惰的籍口)。但係無線吸塵就唔同,真係好方便,我當佢同iPhone一樣,擺正床頭充電,一起身就吸一吸,再拎住行出廳,吸下BB床附近位置的貓毛及貓砂等等。

當初第一次想買嘅時候,我唔係咁情願,因為支吸塵管好長,我又唔係高,怕好難用。
後來就知錯晒,呢部吸塵機有8個吸咀可以替換,我日常用都係用尖咀管,輕巧,好多窿窿隙隙都吸到。

反而我欣賞佢有專吸床單被鋪的專用吸咀,呢一點係我從來冇諗過的功能,一吸之下,嚇了一跳,成個垃圾樽都見到微塵飄揚,無辦法,因為我與貓同眠,但呢件事就警惕到我更加要注意張床嘅衛生,亦即係要經常吸床單。
另外長吸管都有一個好處,可以俾我吸我頭頂以上地方,雖然未必經常用到,但有總好過冇。

反而我欣賞Dyson夠方便,唔使用塵袋,每次吸滿垃圾,直接拎入廁所,開蓋,垃圾就會跌晒落去,一沖廁就搞掂,認真方便。

其實我咁落力講到咁好,最大原因唔係叫你跟我買,而係一種自我動力啟發,催眠自己真係好好用、真係好好用, 咁你先繼續有動力做「搞衛生」,同埋覺得「搞衛生」係件有型的事!

2014年8月18日星期一

坐月大成功(三)如何揀選陪月?

坐月要獲得大成功,經驗豐富的資深陪月員非常重要,我很幸運,遇上經驗不錯的陪月員,讓我有一個不錯的坐月康復。
坐月坐得好,會多出好多時間同親子互動,這些難能可貴的照片,就是日後最好的回憶。

有些讀者在FB或email問我:「可否轉介我的陪月員給她?」我問過我的陪月,她真係好爆又冇期,所以我都幫不到忙。而我沒有很落力回答各位的查詢,因為我經歷了陪月甩底的事件,令我不敢就這樣做轉介。

事緣我原定聘請的陪月員因為突發家事,無法如期上班。(甩底原因我完全接受,是情非得已的原因)幸好我是經陪月中介公司UBaby找陪月員,(我找陪月的過程,可重溫:http://vipblog.sundaymore.com/yokot/?p=13264中介公司立即幫我找替補,結果由UBaby的陪月顧問帶同新的陪月員到醫院和我interview(因為事情在我生了之後、住院期間發生的),幸好一擊即中,立即可以上班!

其實這件事我在facebook上分享過,如果你找的陪月是朋友轉介,萬一好似我咁,突然甩底,點算?經此一役,我實在不敢做介紹(雖然發生的機率不高,但以策萬全),我寧願介紹大家去搵我的陪月中介公司UBaby,萬大事都有agency去彌補。

另外,揀陪月的取向幾personal,我喜歡的未必是你喜歡的,例如我傾向「年輕」的,像我揀了但甩底的那一位,大家的談話內容和對答都可以接近一點。後來到我用的那一位經驗固然豐富,年紀亦相當,大家在溝通上會有些少距離,當然,這個並不影響她的服務質素,但陪月對住你一個月,每日8小時,合得來好緊要,所以在面試時,要認真傾多D計,唔淨止睇對方的準備功夫,談吐、外型、整潔、衛生等等都非常重要。

又例如廚藝是我個人認為陪月非常重要的一環及功能,面試時我便問得非常仔細,她會幫你煮足一個月坐月餐,如果來來去去都係個幾味,你都咪話唔辛苦。
我呢個經驗豐富的陪月,最大好處是教識我好多食療湯水。大家見到我的介紹,好多都係出自陪月的推介,日後就會變成自己的食療秘寶。

總括而言,陪月中介公司的最大好處是掌握了不少陪月員的評價,中介公司會收集用家事後的意見,掌握陪月員的特性,於是你將你的喜好告訴中介公司,由中介公司的「陪月顧問」為你挑選,例如我自己只面試過2位陪月員,第一位即是甩底那一位,第2位就是陪足我一個月的陪月員,換言之在我身上的成功率是100%,除非你特別奄尖(其實我自己就真係幾奄尖^_^),但成功百分比我相信不會低。

uBaby網址:http://www.ubabygroup.com/
電話查詢:2111 9638
------------------------

2014年8月14日星期四

爽膚水、緊膚水、化妝水、柔膚水 拆解疑團 (vol 2)

上星期呢篇blog文收視率極高[重溫請click入:爽膚水、緊膚水、化妝水、柔膚水 拆解疑團 (vol 1)

今篇blog文再續前緣......
上文提要
爽膚水、緊膚水、化妝水、柔膚水---
四種都具有潔淨肌膚,褪去老化角質,及平衡肌膚酸鹼值的功效,以維持皮膚在健康狀態,擔當重要護膚角色。
此外,各自側重不同功能性;

今回,就同大家分享我近來的心水推介:

爽膚水給予肌膚清爽,補充水分,適合中性肌膚使用。
Kiehl's金盞花植物精華爽膚水 $330
瓶身透視花瓣,是主要成分金盞花來的,那金盞花對皮膚有什麼用處?係傳統藥用草本,有天然抗菌和排毒效用啊!
呢支爽膚水成分完全來自植物,包括金盞花萃取精華、常春藤、龍膽、木槿、尿囊素,不含酒精,性質溫和,任何肌膚類型都啱用。
用途多多,除爽膚潔膚外,由於當中具有天然消炎及鎮靜傷口效果,所以可以舒緩肌膚過敏情況,亦有助於暗瘡疤痕加速癒合;即使不小心有刀傷,也可以用來輕抹潔淨患處。甚至是男性可用於刮鬍後,以棉沾濕敷上一分鐘鎮靜肌膚。
我媽咪皮膚極易泛紅敏感,她用上了半支份量,稱讚可以舒緩敏感粒粒引起的㾗癢。

緊膚水重點收細毛孔,平衡油脂分泌,特別適合油性肌膚,及夏天使用。
HR pure ritual care-in-lotion $650
呢支係緊膚水結合潔面霜功效,毛孔粗大、皮膚粗糙至啱用的美容液。
卸妝後,使用潔面產品,毛孔未必夠乾淨暢通,我建議用一種美容液,是為肌膚做好準備,迎接隨後的護膚程序。這care in lotion是水狀,結合透明質酸、腺苷和 HEPES 等複合配方,令膚質持續保持潔淨幼滑,重點是瓶身標明的收細毛孔,而我著重是重整角質,有大掃除功效,幫助抺走老化角質,加速細胞更生。

化妝水特別供妝前使用,具保濕、平滑角質層效用,軟化皮膚令底妝更貼服。
Clinique 勻淨科研補濕亮肌精華水 $330
我使用的是1,2號,專為乾性及混合性偏乾皮膚而設。於妝前用上,皮膚立即軟化、滋潤,令底妝貼服度大大提升,因為含有極潤補濕成份,如橄欖角鯊烯 、可可巴酯等,還有天然補濕因子複合物,瞬間提升肌膚水分含量,令毛孔像是飲飽水狀態,也就飽滿通透。我已試用兩個多月,其亮肌成分確能有助改善膚色暗啞問題,是剔透咗!
水感偏厚稠,延展性高,成分是高效補水亮肌,故此我會先用爽膚水抹浄面部皮膚才使用,取約5元份量,用手按摩及輕拍全面及頸部,吸收後仍保留一點黏笠感,是頗滋潤啊!

柔膚水營養豐富滋潤肌膚,解決乾細紋,特別適合乾性和衰老肌膚,及冬天使用。
Shiseido 全效無痕美白健膚水 $680
呢款號稱「健膚水」的等同「柔膚水」功效,是建於爽膚基礎,主攻修護肌膚的奇妙水。洗臉後抺上,其份子比起精華素更細,是易被皮膚吸收打好基礎;水感質地,使用後皮膚即使柔軟起來,首步曲解決乾燥,長期使用增加通透感。
含有科研美白成分外,是植物橄欖葉精華、柴胡精華、輔酵素Q10、紅葉精華、白芷精華,給予滋潤抗粗糙和抗衰老美白。
很喜歡聞此健膚水味道,是淡花香氣味,結合白合、茉莉、玫瑰等9種類植物,仲有頂調、中調、底調之分,恰似香水製作般認真啊!