2013年9月30日星期一

No 1 面膜紙種類---生物纖維面膜

Mask......係好多人護膚品中頭號最愛,效果即時可見嘛,而我簡直狂熱,一星期敷足6日添!
敷mask係咪一定好?當然要睇成份、產地,及用得其法。

今日會同大家講解paper mask紙面膜......但不是推介我心水特定產品,而係指出至like至有效的面膜紙種類。



效果好且不易致敏,我欽點的就是「生物纖維面膜」
呢兩年才始興起,已成為我的頭號至愛啊!
-
什麼是生物纖維面膜?
係以天然蔬果中的複合微生物菌群,經過嚴謹的發酵科技而成。
面膜質地是怎樣?
我會形容為「人皮面膜」,質感像是很軟很滑的膠狀,恰似人造皮膚。

設計優點:
緊密交織而成嘅3D立體結構,形成龐大嘅儲存精華空間,能將豐富保濕成份帶到肌膚底層。

缺點:
我向台灣專製面膜的廠商請教,得知生物纖維面膜成本高,因要用上大量天然蔬果,而且後期發酵製作過程繁複。


我的使用後感:
1)敷上已feel到貼服度比紙面膜高幾班,且質感舒適不刮面。
2)精華成分特別容易被肌膚吸收,因當敷上面1分鐘,皮膚熱力與面膜融合;而且非常緊貼面形,面朝向下甚至跳動,面膜都不會移位或掉下來。
3)很柔韌,基本上用手是撕不開的。
4)即使敷得過久,亦不會反吸皮膚水份。
5)成份是用天然蔬果發酵,故此不易令皮膚敏感。

————–———————————————————————————————
本週《MORE》專欄精采內容:
自製至hit星級秀髮造型
近期至hit美髮工具,星界人物如林欣彤、黎芷珊、連詩雅等個個拿著自轉秀髮。而我用了它常被問及:「你今日去了salon set髮?」因為效果夠pro,髮質靚髮型又富自然動感。
請留意今期《MORE》雜誌內我的專欄

2013年9月27日星期五

Get ready? keep fit !

大家記得嘛?早前,招募讀者們和我一齊做運動......

嘩,估唔到,報名人數遠超場地可容納,確是有點喜出望外!
-
Flexi-bar大前提係過程唔吃力,仲好好玩添!
輕鬆做一part就可以踢走約370卡路里,而且能選擇性針對修減肥美鬆弛手臂、call機肉、大腿外側,講真……從來呢D部位至難減,終於有可靠方法,怎會不心動!
此運動起源德國,本是物理治療的健體運動,同時間仲有確實療效,能幫助舒緩肩頸膊及肌肉痛,確實very good啊!
 適合任何年齡及甚少做運動人士㗎!

當日同參加者傾計,了解佢哋嘅諗法......
讀者「最緊要好玩......其實成日想做運動,覺得自己身體唔好,易累面色又差,但的唔起心肝,怕悶又怕辛苦!」
讀者「喺office成日坐,覺得自己肥又鬆,但一定唔會去街跑步囉,食塵又辛苦,流汗撻住件衫又冇得即時沖涼!」

哈哈,以上兩位所言,又的確係道出8成女士心聲。

其實,我都係呢type,幸而,我對貪靚同養生有要求,所以仲可以自發性揀好玩同高效益運動,Felix Bar真是大愛......
空中瑜珈
將會係我下一個挑戰目標,相對肯定Felix Bar易掌握得多呢!
-
當日同大家一齊玩Flexi Bar,上堂後反應超好,大家都話玩得好開心,嫌45分鐘唔夠添啊!
第二日,我仲收到以下呢位讀者留言.......

Submitted on 2013/09/17 at 3:00pm
Fannie
「我好開心被抽中上第二班。妳真是無誇大,無講錯,真是一試便愛上,容易學,好好好好玩。下課後,有朋友問運動後第二天會否肌肉痛?導師說目前為止,沒有聽過有學員說上完flexi bar堂後feedback會肌肉痛。果然第二天我真的沒有任何肌肉痛或疲勞的感覺。真是很值得推介給朋友。
我本身在其他健身中心有會籍是可以免費上這類型的堂,但我從沒有興趣,也未試過。但我竟然對Phillip Wain的其他堂有興趣,當然是環境和導師因素!我會好好利用一天的免費會籍上其他堂,再考慮待那健身中心會籍完結後轉過來。
最可惜是flexi bar的堂數很少,可能是新課程緣故,而且是安排在星期一至五的日間,上班一族未必可參加到。
最後真是十分感謝妳為讀者們爭取這次認識 flexi bar 及Phillip Wain的機會。謝謝!」

首先,真的很感激這位讀者如此用心的留言,令我可以了解你們的想法啊!
大家都對Felix Bar健美運動咁有興趣,我已向健身中心爭取了:
1)讀者優惠體驗價。
2)課堂在放工後都會有得上喇!
-
體驗價 $370 ,就可有以下專屬keep fit套餐:
1)尊享1小時私人健身教練指導 (任何類別也可,如Felix Bar、瑜珈......)
2)10天健身會籍 (無限享用健身室設備及會所設施,如蒸氣浴、任上跳舞、瑜珈、Flexi-bar堂等)
3)最新版本機能脂肪測試......
儀器可檢測出身體肌齡、肌肉脂肪比例、體內礦物質含量等等。

-
 (優惠只限21歲以上女性新客戶)
也可直接致電預約:3980 9838
地址:
銅鑼灣利園2期4樓
太古城中心第4期2樓
尖沙咀美麗華商場11樓

————–———————————————————————————————
本週《MORE》專欄精采內容:
FDA認證 手提美容儀
自問是「專業機迷」!不是打機是做機,我極喜歡鑽研醫學美容儀器的技術、原理及效用。
我家的專業美容儀多得很,足以設定多款不同功效facial套餐,近日家中又添新成員,是
獲得FDA(美國食品藥物管理局)審批,以手提美容儀而言,非常少有。
請留意今期《MORE》雜誌內我的專欄

2013年9月26日星期四

工作點滴分享!

呢兩日未有 update 我嘅 blog,心有不安,知道你們來訪會失望......
是因為剛剛的兩天,我的工作時間很長,昨日尚算回覆精神狀態!
雖然睡眠不足,但內心滿足,是很難忘的體驗,同大家分享有趣點滴吖!


Date:23/9 Mon 
Working time:2:00pm-3:30am (13.5hrs)
拍攝分享工作,將於雜誌及巴士電視出現。
事件有淵源,事緣該產品仍未抵港,我早已在網上見到外國有好多人追捧,而且用後感9成是好評,已心思思想試;殊不知,某天收到電話,是該品牌PR告知香港將會有售,而我有幸被邀率先體驗。
大前提,是我試後的確滿意即時變靚嘅效果,分享內容無須hard sell ,
就是講我心裏所想,我的專業得到尊重,多謝!
-
拍攝通告是14:00-20:00,結果深宵3:30才完成,拍攝時心想做好件事,
自然可以用盡全副精神當回到家,大洗整理後,已跌watt,
好似冇晒電咁,個人好浮,至凌晨5點幾差不多天光方上牀睡覺。
-
合作團隊是化妝師Man Chan及髮型師Ritz 。Man Chan的化妝技術非常貼合我心意,確是超級透薄無瑕,上鏡、真人也兼顧到,近幾個月我同佢合作無間,效果水準被外間好評!
然而,新娘子想由她出手靚爆燈,整日跟足要3萬.....,卻又真係有客喎,因為只要妳試妝,9成9非不出佢手指隙,我初認識她時,常笑言「天價化妝師」!
---

Date:24/9 Tue
雜誌2013美容大賞任頒獎嘉賓
我小睡5小時,早上起來處理文件,接著化妝整頭揀衫......
是要出席雜誌的美容大賞任頒獎嘉賓。
-
同埸的頒獎嘉賓是一眾歌星藝人,GEM、張敬軒、洪卓立、羅力威、
陳嘉桓、龍小菌、Anna R、蔚雨芯,我及化妝師Annie G.........
-
現場聚集勁多fans,出場時嗌得至強氣勢的,大家估到是誰嗎?答案:羅力威。
-
我一向極注重內外美白肌膚,雜誌揀選我頒發多個美白產品獎項確是很貼題,hehe
-
獲美白產品獎項是Shiseido、Lancome、Garnier、OLAY、Étude House,牌pr and marketing表上台接受獎項,恭喜呀!
-
司儀問我有咩美白心得,若要數晒出嚟,心諗真係開3小時talk show都得呀!
結果,我係咁答:「內外同樣重要,外在簡單快捷方法係
4(美白精華):1(修護爽膚水),滲透化妝棉/面膜紙,
敷幾分鐘,皮膚通透亮麗,上妝亦更貼;
內在方面,食療上可自製如鮮磨杏仁汁也可美白。」

而當日,獲獎的美容產品是由OL直選,大部份我都有用吖,下星期《Fashion & Beauty 》雜誌就可以重溫精采片段喇!
————–———————————————————————————————
本週《MORE》專欄精采內容:
FDA認證 手提美容儀
自問是「專業機迷」!不是打機是做機,我極喜歡鑽研醫學美容儀器的技術、原理及效用。
我家的專業美容儀多得很,足以設定多款不同功效facial套餐,近日家中又添新成員,是
獲得FDA(美國食品藥物管理局)審批,以手提美容儀而言,非常少有。
請留意今期《MORE》雜誌內我的專欄

2013年9月23日星期一

抵用好用 心水眼霜

星期六的「Yoko x Lush 鮮製面膜workshop」,大家玩足兩個多小時,過程非常開心,參加的讀者依依不捨啊!
有的留下來圍埋繼續傾扮靚秘方,其中一位讀者問到:眼霜就快用完,Yoko......請問有咩好推介呢?」

老實說,一支甚好的眼霜亦唔會可以令眼部老化情況起死回生,改善及防禦倒有作用!

眼部問題如黑眼圈及眼周細紋,令人陷入苦惱......
老生常談的解決方法不是人人做到:
減少眨眼 
唔准捽眼
不熬夜
少看電腦
勤按摩
冷熱敷
等等等......

我的眼霜推介,確是好用又抵用,答案值得在此公開分享!
-
話說,上兩星期又俾我喺屋企尋到寶,哈哈......相信你哋未曾到訪過我屋企,都估到護膚妝品有幾堆積如山有幾震撼啦!皆因好多新品經常等著我試用,而舊有已開封的......儘管多好用,偶有忘記呢!
上兩星期又俾我搵翻支好嘢出嚟,是幾個月前開了封的眼霜。

我用開的眼霜貴至二千幾元平至二百多元,當然,從來不認定貴就係好喎,以下要推介大家則只係三百多元!

是2011年已推出,唔知你哋試過未呢?未就值得俾個機會佢喇!
Kiehl’s Midnight Recovery Eye
深夜奇蹟修復眼霜 $320/15ml
我喜愛的主因是乳霜混合多種天然油份,咁就可以達致我3大基本要求:
保濕+潤膚+鎖水

含油份的眼霜,大家必須慎選,只宜由全天然植物或花提煉萃取,忌會block毛囊的礦物油或化學精油,唯恐眼底出油脂粒啊!

呢支眼霜就含4款具修補皮膚功效的植物油:
金雀花萃取--獨特的強化血管功效,可以加強眼周血液循環代謝,從而減少黑眼圈和浮腫。
月見草油--有豐富奧米加6,是人體必需的脂肪酸,可幫助修復肌膚皮脂膜。
橄欖油--與天然皮膚脂質結構非常相似,可以幫助潤膚,以達到油水平衡。
薰衣草精油--具治療性,可鎮定舒緩肌膚。
最重要是此眼霜不含防腐劑。


是幼身唧嘴,按壓出來可以控制如一粒米的份量。
建議每邊眼使用份量:
上眼皮3粒+下眼皮4粒
這支眼霜早晚塗,都足以用上兩個月啊!

用無名指的指腹去輕按眼睛,上下眼皮也是由內到外。
每邊眼重覆最少5個圈,幫助帶走毒素廢物。

是白色的乳霜狀,帶有淡淡天然薰衣草的香味。
雖然多達4種天然油份,質地出奇地輕薄,感覺是恰度滋潤,
絕不黏稠或油膩,之後上妝也沒有推出擦紙膠粒。
————–———————————————————————————————
本週《MORE》專欄精采內容:
FDA認證 手提美容儀 
自問是「專業機迷」!不是打機是做機,我極喜歡鑽研醫學美容儀器的技術、原理及效用。
 我家的專業美容儀多得很,足以設定多款不同功效facial套餐,近日家中又添新成員,是
獲得FDA(美國食品藥物管理局)審批,以手提美容儀而言,非常少有。
請留意今期《MORE》雜誌內我的專欄

2013年9月19日星期四

消暑食療 改善內熱敏感

上星期,自知身體發出小警號,一日內面部皮膚突然出現兩小撻泛紅,外表疑似蚊針,初起會很痕癢,約12小時後會像是小暗瘡,通常2日就復原。
我知好多人都經常有類似情況,究竟乜因由?
其實我已深知是體內發出之輕微敏感徵狀,中醫謂乃「內熱、肝火」。 
我的導火線是睡眠不足及精神緊張,令免疫力下降;更有中醫告知,經常做光學熱能醫學美容,都會令身體內熱喎!

清內熱肝火之最佳消暑食療,我一向認同療效的是:
1)冬瓜赤小豆扁豆水(要煲1.5小時)
我連喝3天已經好有效,皮膚突發泛紅停止,而且冇成日口乾乾。
2)西瓜 (夠方便)
若然冇時間煲嘢,其實食西瓜都係好選擇,可以清心消熱氣,但不宜過量,因為果糖高。

前日又再拜訪萬全堂錢太,錢太一開口便笑我:「稀客!」
是啊,這幾個月也沒有找她調理身體了......再激起我原動力,就是身體有事相求---鼻敏感又重來(想再做番針灸療程),加上面部時不時無啦啦一小撻泛紅(要搵解救方法)。

錢太因應我「內熱、肝火」情況,叫我飲一款自煲的藥材水,她說日日飲用也可,並謂我先生也合適一齊享用。

由於製作超簡單,決定同大家分享:
材料---
只須3種藥材
綠豆+黃芪+枸杞子
效用---
清熱解毒、利水退腫、補氣、降壓
製法---
6碗水加入全部材料(洗淨),大火煲10分鐘,約剩5碗水,供全日服用;非常容易方便。

*注意:陰虛陽亢者不宜。
————–———————————————————————————————
本週《MORE》專欄精采內容:
Ms Barbie 韓式時尚誘惑「咬唇妝」
當今至hit的韓式「咬唇妝」,演繹出性感誘惑神髓,柔弱楚楚可憐般,成為女生及男生皆大愛的妝容啊!何謂咬唇妝?
請留意今期《MORE》雜誌內我的專欄

2013年9月17日星期二

激光後遺症的可能性

噚日,收到一位讀者在我網誌留言。

她透露很擔心......皮膚的現況;於我所知,其實有很人也有相同遭遇,為減少受害者,大家也務必了解,希望當時人別介意我在此公開事端:

「Yoko, 有事要向你求救:
 事緣大約一個月前, 我發覺左面頰突然間生左一撻白色既嘢, 連化狀都蓋不住. 摸落去是平滑的, 我好驚自己生白蝕呀! 
我呢兩年都有做laser去班, 美白及收緊. 波長是1064. 舊年就大概一個月做一次, 但近半年就密d, 有時一個星期一次, 有時兩個星期一次. 我自覺面上的班有改善, 而皮膚亦比之前緊緻. 我唔知係咪自己既皮膚唔適合做laser呢? 
睇前兩期的忽然一週, 朱慧珊話佢就係因為做laser去班, 點知自己皮膚唔受得, 攪到起白班救唔番. 我睇左果篇報導才懷疑自己都係咁情況. 我驚撻白色嘢愈來愈大撻變鍾無艷, 咁我應該點做好呢?」


有兩個情況可能性:
第一
激光療程後斑色素被帶走,局部變白,膚色看來就有深淺色差,須靜待時間讓膚色漸均勻。

第二
依我所理解及估計(因為未曾親眼見過真人皮膚),亦有可能是俗語所謂「反白」,因為時間也頗脗合......
「反白」是激光後約半年才會出現的問題。
事件並不屬常見,但確實有機會發生。
「反白」也就是做激光後色素脫失(post-laser hypopigmentation)。
如果該激光是直接破壞黑色素細胞,所造成反白的機率就較高。
-
「反白」可以好返嗎?
若患部的黑色素細胞功能不正常,這個狀態可能持續數年。
-
還有什麼須注意?
須有忍耐力,距離時間夠久,防曬措施加強,作息正常,也就只有靜待黑色素細胞自然恢復。
-

提提大家:
凡事忌過量,適可宜止!
1)注意愛靚也不要太心急,激光治療太頻密,細胞還未復元。
2)亦切忌太進取,能量過強亦容易出事故。
3)laser facial被坊間說成如一般保養facial看待,實情持續做絕對有風險,有機會反黑或反白,一個療程便應該停一停,好讓皮膚休息;其他儀器技術如彩光、射頻、超聲波則不會有此情況。

最後,希望呢位讀者不要太擔心啊!建議可向醫生查詢,了解清楚,求個安心!
————–———————————————————————————————
本週《MORE》專欄精采內容:
Ms Barbie 韓式時尚誘惑「咬唇妝」
當今至hit的韓式「咬唇妝」,演繹出性感誘惑神髓,柔弱楚楚可憐般,成為女生及男生皆大愛的妝容啊!何謂咬唇妝?
請留意今期《MORE》雜誌內我的專欄

「反白」可以好返嗎?
若患部的黑色素細胞功能不正常,這個狀態可能持續數年。

還有什麼須注意?
須有忍耐力,距離時間夠久,防曬措施加強,作息正常,也就只有靜待黑色素細胞自然恢復。

提提大家:
凡事忌過量,適可宜止!
1)注意愛靚也不要太心急,激光治療太頻密,細胞還未復元。
2)亦切忌太進取,能量過強亦容易出事故。
3)laser facial被坊間說成如一般保養facial看待,實情持續做絕對有風險,有機會反黑或反白,一個療程便應該停一停,好讓皮膚休息;其他儀器技術如彩光、射頻、超聲波則不會有此情況。

最後,希望呢位讀者不要太擔心啊!建議可向醫生查詢,了解清楚,求個安心!