2013年7月18日星期四

實證冧爆「女王自拍神器」!

數碼世界的頂級潮物---Casio自拍神器TR15,仲要係至渴市桃紅色,在上個月初售之時,我已嘭嘭聲收歸旗下

外表索到吖!So sweet!

有幾吸引?我在Facebook page告知實物已在手,留言一大堆「好羨慕」、「好想要」、「你就好」、「炒到癲」.......

去到日本,Casio自拍神器TR15大派用埸,
因為頭兩日只得我一個人咋,
留倩影靠自己;為咗呢張相,至靠人哋!

對於女讀者,Casio TR系列自拍神器,幾乎無人不曉;反而甚奇怪,對數碼產品理應比女士熟悉的男士們,竟有不識自拍神器為何物。
事緣,上星期我出席好友Alex的生日派對,主題是街童潮拍,人人自備一部相機,喪影!我當然帶備自拍神器出席啦,果然,神器一出,女士尖叫,男士詫異,點解一部普通DC仔,甚至誤以為係手電添,佢哋質疑自拍神器點解有咁大吸引力?
除了全桃紅色機身,他們難以想像女士愛爆原因。

其實原因好簡單,男士只會對非常專業的相機感興趣,例如生日主角Alex,搞呢個「街童潮拍」主題背後目的,係要俾位另一主角出埸,他最新入手、價值$12,000的Fujifilm X-Pro 1相機,我除了聽到「識貨」兩字此起彼落,真係聽唔到在場男士有其他形容詞去形容呢部機,我都有興趣了解過萬銀相機有幾勁同點樣勁 !

大家睇相,唔講又點會到係我自拍呢?!
Angle完全是自己最喜歡的,掌握在自己手裏!


我部自拍神器點樣勁?相信我形容DC相機的能力,應該不比男士們差。
如果講拍攝質素, 自拍神器只屬合格的DC仔,冇得操控鏡頭zoom(只得數碼zoom),閃燈只係LED燈仔(同iPhone一樣),男士們話同電腦芒頂上支webcam仔一樣之嘛!
咁我好想講,如果買齊最貴最頂級的攝影器材,係咪可以變成攝影大師?
影相要講構圖,冇美感冇角度冇意境,即係普通相。
我記得當年狗仔隊影了一張張國榮世紀拖住唐唐的偷拍相,雙方拖住加上哥哥回相輕蔑攝影師的眼神,一張相就係一個故事,俾你用Leica M8影一萬次都未必捕捉得到,所以相靚同相機級數不成正比!

自拍神器正正係方便我搵出最佳拍攝角度的DC仔,擁有最佳拍攝角度,就可以得到最佳的構圖,拍出來相片特別有感情。相機被數碼化,最大優點係拍攝不再受限,傳統相機要透過觀景鏡取景,一定要將相機擺在眼前先可以睇位影相,邊似現在,用單反都可以將部機擺正丹田影o靚模,高低炒盡所有角度!
自拍神器正正用盡數碼的極限,影人可以用不同角度,毋須將自己肢體扭曲,只須將機身架270度任意旋轉扭曲,就能夠搵到理想角度,拍攝時都可時刻保持住女士的優雅姿態。

源---club.china.com  /www.gucheng.com

睇住個芒就捕捉到最佳角度,步驟簡單卻幾乎完美表現!
難怪微博紅人郭美美,都被網民評「因為自拍神器而成為上鏡靚真人醜的最佳示範」;用自拍神器自拍就等如照鏡一樣,睇住個芒擺到最靚角度,一按就留'chok倩影'。
-

而我,則非喜歡自拍而愛上,是方便工作,其270度扭動模式,加上鏡頭有21mm wide,自拍的廣闊程度,尤如有人幫你影相一樣......
我最近去日本,全程只靠自己,
但相片就好似張張都係由其他人幫我影一樣


而我平日拍攝一些示範美容療程的相片,9成是自己揸機,無望鏡頭齋狂襟,放回電腦才揀選啱位合用的,最緊要影得多有得揀,直至有咗自拍神器的幫助,我終於擁有最理想的facial過程示範相,甚至自拍按相都得啊,正相不求人!
-

而另一最大優點,係女士們去旅行冇化妝至啱用,歸功於Casio的美顏功能,今次得我歡心的TR15仲首度加入了美白效果添!
測試:即使冇化妝,相中皮膚都見得人---
1級美白+1級美顏效果
但close up唔sharp影ok使

好多年前,我已經有用Casio的美顏相機,當時真係驚為天人,冇化妝都可以影到皮膚滑溜無瑕,到後來各大相機品牌加入美顏戰團,美顏得來最自然(我喜歡用1或2級)今次加入新的美白功能,對於「美白控」女性,可以膚色亮白均勻,一定好冧!
我對TR15唯一投訴是電量唔夠襟用,在日本某天幾小時影咗唔夠一百張相(中間有熄機免浪費電),就在最重要關頭自動熄咗機,我要影出專欄相啊!我決定,要買多一嚿後備電池。


自拍神器當紅原因,淺的真正改變了傳統的拍攝概念,特別是自拍近代攝影非常重要的攝影方法,如果你仲笑人玩自拍,其實係咪代表你out呢?




沒有留言:

發佈留言

注意:只有此網誌的成員可以留言。