2013年5月2日星期四

解構!點解去日本買錶平?

因為呢一篇blog:趁Yen跌,再去日本買Rolex!
成個星期,無論出席任何活動,遇上PR的標準寒喧內容,就係:點解去日本買錶平?朋友間多了些Whatsapp問到底點平法,點先為之最抵?讀者留言又好、email又好,個個都問應該點買法之餘,其實大家已經手握日本機票,磨拳擦掌準備去日本買錶!
以上呢張相,就係我去到中野手錶名店Jackrord時,偷偷用iPhone影的,店內講明不準拍攝,但為了話俾大家知,只係一個飾櫃已經有咁強大陣容,我冒呢個險又點話!

首先要解構的,係點解呢個時候去日本買錶平?著眼於一點,日圓匯率急跌的時機!
舉個例子,因日圓這兩年升幅近三成,日本買手去日本以外國家入貨,從前要用100萬Yen先買到的錶,因Yen升於是就可以用大約八折的價錢買到,即是約80萬Yen。
先天的匯率優勢,因3月份日本宣佈量化寬鬆政策日圓匯率急跌20%,我們可以用較平的價錢兌換日圓,但對日本的商人而言,用80萬Yen成本入貨,加上合理利潤後,只要收回相同的Yen數,對他們而言也是一宗有賺冇蝕的交易,於是乎,他們用較平的成本入貨,現在我們用較平的匯率買入,就是我所說的「能夠獲得折扣的空間」!
不過,目前日本買手的入貨成本便高了,因日圓跌,到外國買錶的成本高了,額外的增幅當然轉嫁落消費者身上,於是新入貨的手錶自然會以較高的Yen價來定價,我們可以獲得「折扣」的空間就會少了,甚至失去,所以去日本買錶,要趁早。仲係唔明?總之坎坷過後冇艇搭啦!

無錯,目前真係坎坷過後無艇搭,因為已經有好多精明的香港人去日本掃錶,例如羽田機場的免稅店已經係重災區, 友人剛從日本經羽田回港,說Rolex的運動錶款幾乎一件不留。Jackroad一類水貨店的錶款逐少逐少的加價,賣得比香港便宜的空間拉近了不少,咁點算?
買  二  手!
如果你本身好介意買二手,都唔好放棄睇埋落去,因為日本的二手錶,未必係你想像中的二手!以我為例,其實未出發日本之前,我的第一志願,其實係呢隻Rolex Daytona「四大美人」之一的Yellow Beach 白金黃色皮帶Daytona:
點解叫四大美人?話說呢款Daytona一共有淺黃、淺藍、淺綠及粉紅四種錶帶顏色,是Rolex少有的「女性向」Daytona款式,大約在2000-2001年推出過,之後一直冇出現過,直至上年又再度推出市場,但都算非常少量,由於有四種錶帶顏色及錶面,加上女性向,所以俗稱為「四大美人」!
四大美人,以粉紅為首選,可惜冇現貨(我自己就非常鍾意,在香港也見過實物,美不勝收!),其餘只有Yellow Beach吸引到我去睇下。售價方面,香港官方定價:$230,900(有人問我點解咁清楚Rolex的官方定價?這個討論區有詳細價錢:勞力士價目表),日本定價:¥2,761,500,Jackroad「二手價」:¥1,728,000,退稅後:¥1,645,714,約港幣:$131,657。

咁你會話,二手梗係咁平啦!其實,呢隻錶暗藏玄機,睇下呢隻Yellow Beach的簡評:
唔識日文唔緊要,請睇漢字:「完全未使用品」!其餘日文字解埋俾你知:黃蝶貝文字盤、18K白金錶殼、錶側、錶腳、底蓋、錶帶的原裝保護貼紙未撕、V Serial Number,保證書發出日2012年6月。
我現場親眼check過,的確係一隻未戴過的全新錶。咁點解新錶居然被當二手賣?日本通老公講過一次俾我聽,可惜我冇心裝載,左耳入右耳出,總之係日本的一個獨有的「套現文化」。可惜,呢隻錶睇相就靚,實物的錶面暗淡無光,完全睇唔出係一隻咁名貴的手錶,同場亦有粉藍色,同樣不入我眼光,只有粉紅係真真正正靚錶一隻!所以才轉買116515LN。

分享完我的故事,其實要帶出一點,如果仲想去日本搵平錶,真係要試下在二手區入面,搵出「完全未使用品」去買,抵住佢會將新錶當二手賣,價錢比新錶再平,只係比真正二手稍貴。再者,呢類「完全未使用品」手錶,每間日本錶鋪總有三五七隻,不妨諗諗。

俾多個貼士大家,定期留意Jackroad.co.jp呢個網,指向「中古」就會出現品牌列,第一個出現的ロレックス就係Rolex,搵到心水「完全未使用品」,抄低產品編號,立即發一個email畀Jackroad(china-customer@jackroad.co.jp),預留手錶,講明畀對方知你幾時會到日本睇(留幾日好啦,留超過一星期都唔應該,佢地亦唔會咁做),咁就最方便。

教你地去日本買錶教到咁詳細,去到日本有乜買錶趣事,記得留言話番俾我知呀!


————————————————————————————————-
本週《MORE》專欄精采內容:
攻日搜刮新發亮美容<妝品篇>
想睇東京購物最新資訊,除了我的blog,仲有我的專欄介紹。今次我想講,日本的睫毛真係頂呱呱,好過韓國同台灣的不知幾多倍!想知有幾好同去日本邊度買得到?請留意今期《MORE》雜誌內我的專欄

1 則留言:

  1. Hi Yoko,

    I read your posts related to Rolex and they are detail and useful. I learn more channels to buy Rolex with good price now. Hope can visit Jackrord and find my dream watches very soon.

    I operate this site, http://rolexguide.com.hk , hope you can visit and give some opinions.

    /kelvin

    回覆刪除

注意:只有此網誌的成員可以留言。