2013年2月25日星期一

我的自拍神器

終於相信,機仔可以影到靚相!
早前羅列出我自己的2013購物清單,當然唔會只講唔做,名單中我想購買的Casio自拍神器TR150,售價太貴,我終於在香港找到,炒到$5,980!呢個價錢可以買到質素及性能更佳的M4/3可換鏡頭相機啦!
結果,我揀了同品牌的另一部自拍機ZR1000,售價只係$3,380。
揀ZR1000的原因,除了TR150售價太不合理外,在微博上,有網友留言說TR150的相片質素不佳,雖然我沒有用過TR150,但這句留言對我著實有點影響。再問過一些DC的專家意見,他們也推介ZR1000,只因TR150的性價比一般(冇計,售價太貴,拉低了其性價比)。
何況我自己亦曾是Casio美顏相機的用家,當時Casio破天荒推出首部具美顏功能的相機,我簡直驚為天人,影人無敵靚,素顏變有化妝,所以我相信已經升級多次的美顏功能(點升級法,我都唔知,但靚就得啦),在ZR1000身上應該有不錯表現!
至於我揀的自拍神器有點樣的表現?首先,一般相機拍攝應該好似下圖咁樣:
呢部自拍神器,強在背後的熒光幕可以180度反出來:
變成呢個自拍模式,影相的設定會有一點改變,除了可以同以前的相機一樣一按便拍攝,ZR1000多了兩個特別功能,只要在設定上調較了自拍倒數模式,以後一翻起個熒幕,就識得進入2秒倒數自拍,先望實熒幕,計好位置,按掣!熒幕立即出現倒數數字,之後你的眼神由熒幕轉番去鏡頭,咁就避免晒冇望鏡頭的傻瓜眼神。呢個情況,好多時心現在用手機自拍,望實個熒幕自拍而忽略其實係要望鏡頭。
另一個要讚的自拍功能,叫做「揮手自拍」,最適合一班人一齊自拍時用。呢個時候,熒幕會出現一個「手掌」,成班人度好晒位,拿機的人只需確保鏡頭準確,其他人就負責在閃光閃旁邊的sensor揮手,一揮手就例數2秒拍攝,叻叻!今次就係帶埋佢去澳門旅行,成班朋友都讚呢個功能好得,仲搞到成班朋友自拍時個個爭住揮手,笑鬼死我!
其實,我一直都好想搵一部適合自拍的相機,因為我平時的化妝、護膚示範相,都係好低能咁拎起牛龜咁大部相機自拍。就算去到美容院做facial的介紹相時,我自己都盡量自拍,因為交給美容師主理,張相出來我多數唔滿意,始終她們並非攝影師,或對攝影有研究,構圖上以至操作上都使我最終以自拍解決,所以人家有冇發現,好多我的美容院示範相都冇右手出現呢!
自拍滿分,咁到底相片質素又如何?首先當然要試美顏功能,由最弱的1級美顏到最強的12級美顏,比以前的更加有進步,先睇下我的自拍示範,由1級、3級、8級及 12級,逐張俾你睇:
我個人認為,1-3級已經非常足夠,自然而不造作,相片亦全無塑膠感;去到第8級已經等同護膚品廣告的「PS大師級數」,12級就真係稍嫌過火,膠得滯!
帶得出澳門,當然再加環境相示範啦!
24mm廣角加16000萬像素,去舊建築影古蹟,幾有氣勢。
微距的表現亦唔錯,方便我影細細支的美容產品。
食物都影得靚,去到大利來記食豬扒波蘿飽,返香港後,好多朋友睇完相後都好想過澳門!
上星期同一班美女好友午聚,只係用了1級美顏,個個都話影得自己好靚,冇化妝都肯上鏡,全靠美顏自拍神器咋!
———————————————————————————-–
本週《MORE》專欄精采內容:
裸妝加分的秘密武器
看似無添加的妝容最能留住別人艷羨目光!試幻想沒眼線、沒胭脂、沒紅唇刻意修飾,皮膚自然的透出光澤、眼神精靈睫毛纖長、珠唇柔軟粉嫩,這似有若無裸妝比起濃妝艷沫更惹人喜愛!點樣可以做到?詳情請留意今期《MORE》雜誌內我的專欄。

沒有留言:

發佈留言

注意:只有此網誌的成員可以留言。