2012年10月22日星期一

舌尖上的台北(2)平價台灣國宴

讓大家久等的「舌尖上的台北系列」,終於有第二回!我對於吃的執著,不下於我對美容的堅持。難得來到台北,我通常都會找一些沒有被香港旅遊雜誌或傳媒介紹過的餐廳,一嚐最正宗的台灣美食。
繼上一次去「二空眷村菜」後(詳情可重溫:台灣美食之二 萬元牛肉麵+台式平民眷村美食), 我又再獲食神眷顧,獲地道台灣朋友推介去一間台灣小館,但卻擁有前台灣總統御廚坐鎮的「湘鼎坊」!
話晒叫前總統御廚主理,會是富麗堂煌的裝修嗎?也不是,普通到你唔信:
店面就在橫巷內的不起眼角落!窗內用手寫出由前總統御廚主理的字樣及曾經有那些傳媒介紹過的紀錄!
但係我見到有蘋果日報同壹週刊介紹喎,仲唔係香港傳媒介紹過?唔係架,係台灣蘋果同壹週刊,香港讀者係冇緣睇到!
到底食乜好?台灣友人推介一定要食「養生菇土雞鍋」,甚麼是養生菇?經試食後,可以這樣解讀:具有養生療效並加些菇類植物再加隻台灣養的土雞煮成的湯,咁大家就易明一點!入口是非常重藥材味的雞湯,如果你並不喜愛藥味湯,這不是你杯茶,但我對這類滋補食療一向偏愛,用埋新鮮老雞煮,香港一定食唔到。都係媽咪夠眼光,一睇就知係重四至五斤的老雞先煲到,但肉質一D都唔鞋,我自己仲食了好幾件雞添!
另一個一定要點的是砂鍋魚頭煲,又係貨真價實的「小菜」!因為一上桌係見到一隻非常大的炸魚頭,至少有兩斤半,鋪面的炸枝竹又係高水準,一路滾一路淋湯,將湯底餵入魚頭。炸完的魚頭一點腥味都沒有,連我唔鍾意食魚的老公都肯放入口,「厭魚症」都醫得好,就知真係好好味。
比較怪異的推介係炸德國咸豬手,莫講話大家,連我當時聽到都打個突,去台灣食豬手,唔夠台灣喎!不過好友推介得,我一定信,結果真係喜出望外,單係睇相,你都未必可以在香港搵到相近的貨色,炸到皮脆肉嫩的豬手,真係第一次食到。好多時都係炸到皮 火農 肉乾,豬手變豬肉乾,我唔食油炸唔食肥膩都食左幾件呀。
 另一味特式小菜叫「彭家豆腐」,點解叫彭家豆腐?其實同來自潮州的普寧豆腐相近,但彭家豆腐來自南京,特點是非常嫩滑,和玉子豆腐接近,但比玉子豆腐更滑,卻沒有蛋味,係正宗的豆腐味,在香港我自己就從未遇過這一道菜。
 上述是比較有特色的小菜,其餘炸大腸、蒜苗炒咸豬肉、五更腸旺、塔香海瓜子都非常出色。但最令你意外的,是一行七人不停喪食暢飲,埋單只不過新台幣$2,900,即約HK$800,實在合理得非常過份,但食到御廚級數菜式,真係非常值得!雖然店面環境實在非常普通,但也有台灣人的認真整潔,比香港不少餐廳更乾淨,可以放心去食!

 地址?影埋咭片畀你睇,仲有簡單地圖,非常方便大家架!
—————————————————————————
本週《MORE》專欄精采內容:
轉季 提升妝容的秘技 
時值初秋轉季間,皮膚狀態最容易不穩,尤其在化妝時候特別多問題浮現,如乾燥脫皮難上妝、面色暗啞如灰水、幼紋皺紋愈遮愈現。如何解救?情請留意今期《MORE》雜誌內我的專欄。




1 則留言:

注意:只有此網誌的成員可以留言。