2012年1月31日星期二

團購末日 無甚可購?!

曾經,我也在在這裏分享過,團購活動是網絡商貿的明日之星、天之驕子.....


重溫請click:I like「快閃團購網」!http://yokotsang.blogspot.com/2010/08/i-like.html

籍住收集網絡各用家的購買力,然後向商戶爭取比零售價低至批發價的價錢,做到三贏:即係買賣雙方加團購中介三者,一同獲利!
三贏模式看似三贏,但穩守道德底線的,必定是中介的團購網站!例如團購網站在斟介賣方時,他們所爭取的優惠,是否真的比市場價格更勝一籌?


以我過去的觀察,真的極筍極受歡迎的團購產品,以戲票為首!團購價$30一張戲飛,以common sense的經驗,都知道比市場價格平一大截,因為普羅市民的知識、熟悉程度及購買經驗都知道團購戲飛的價格比正價平!

好,當團購產品是一件大眾非經常接觸,以及欠缺相關購買經驗的物品,它所標示的團購價,又是否真係比市場價格平?尤其係當價格資訊混亂、不透明的產品遇上團購網,一般市民又怎樣判定團購價格的真確?

就以盜用我肖像相片的某團購網為例,早兩日我看到他們有一個團購價$68購買個人訂造年曆,五人成團,就可以向某印刷商購買一個連12月份及個人度身訂造、由自己提供圖片的年曆。哈哈哈,睇完真係笑了!恰巧我今年就係造了一個咁樣的年曆,就係幫襯號稱全港最平的印刷商,售價就係$68!這例子說明,這類一年才會買一次,根本不熟悉行情的人,可能會因為相信團購網真的為用家爭取比市場更低的價格而購買!可惜事與願違。

又例如團購網的另一招數係同美容院合作,爭取一個極平的減肥、護理、按摩療程,合共總值幾千的療程,居然可以$138搞掂!首先我並非質疑價格是否合理,我反而想問大家,有幾多位好似我以美容院為第二個家的人,會熟悉所有療程在不同地方的所有價格?一個美白保濕facial,應該值幾錢?facial唔同戲飛,唔係大家都熟知的商品,你可以問一個普通男人,一張戲飛要幾錢,答案誤差少於十蚊;但你問一個普通男人,做一個facial要幾錢,誤差一定多過十蚊,甚至好幾百蚊吧!

於是乎,團購網的防線,係非常容易失手於不良的美容院;又或者,團購網只權充一個中介角色,買賣雙方不關己事,總之收足佣金,就再冇手尾跟!總之作到個原價大一大,團購價就只係原價5%,即係0.5折,就滿足團購宗旨,到頭來,就係苦了購買者,又或者,製造一個惡夢給消費者就,因為團購網正正送羊入虎口,面像美容院的硬式銷售,又點抵抗呢?

唉,如此感慨,就係因為盜用我肖像圖片的團購網及美容院的姊妹店,就係上述「經典個案」!
我上網起一起那美容院底蘊,以及根據曾留言給我的讀者資料中(在此特別感激你們的支持及幫忙!),呢間美容院的眾多投訴個案上晒新聞,就在上年10月尾刊登,最新受害人女士,居然被屈花費近二百萬買減肥療程,幸而結果自殺不事件中某形象健康正面的代言也被無辜牽連,被拖落水騙人之嫌
咁我想問,團購網又知唔知呢間美容院惡名遠昭呢?係咪自己放棄了嚴謹監察的角色?為錢就可以不顧消費者利益?


因為另一宗親身經歷,係我朋友的一間餐廳,與團購網合作一個優惠,一隻燒雞加一杯汽水再加沙律同甜品,坐落銅鑼灣地段,團購價只係$49。呢個抵到爛的餐,商戶期望客人再點其他菜式?冇可能吧!食得晒冇剩已經偷笑啦!本來傾好晒,最多只賣200名額,埋單一計,一共賣出1100份!咁仲唔三贏?你以為啦,餐廳只有一個焗爐,每次可以燒四隻雞,每次燒40分鐘完成,結果計一計,餐廳日日坐滿客兼人人食燒雞,都要開爐半年先賣得晒,但係有效期只得三個月!團購網賺晒錢,就掉低一個爛攤子俾買賣雙方,即係有人冇雞食,問你服未?

團購網的差劣經營手法,係近年傳媒經常探討的事情,我覺得最經典的個案,就係上年情人節,團購情人花束但貨不對辦,甚至送貨甩底的經典個案!可惜,今年又有同樣銷售手法,咁,又有幾多人學精呢?但又有幾多人又再落入陷阱?


大概只能講句,良莠不齊的團購網,就係害死團購意義的兇手!
——————————————————————————————————
本週《MORE》專欄精采內容:
定妝碎粉 挑剔竅門
上星期我推介了西班牙電視台指定選用的「高清粉底」新貴,今回講解至合拍的定妝碎粉 Finishing Powder
詳情請留意今期《MORE》雜誌內我的專欄。

沒有留言:

發佈留言

注意:只有此網誌的成員可以留言。